သျှမ်းပြည်တစ်ဝှမ်းတွင် စက်သုံးဆီများ ပြတ်လပ်လုနီးပါးဖြစ်ပြီး၊ ဆီးစျေးများလည်း အပြိုင်အဆိုင် စျေးတက်နေကြောင်း စုံစမ်းသိရှိရသည်။

သျှမ်းပြည်မြောက်ပိုင်း မူဆယ်မြို့တွင် စက်သုံးဆီ (92) တစ်လီတာကို (၄,၀၀၀) ကျပ် ရှိနေပြီး ပြင်ပဆိုင်ငယ် ဆီဆိုင်များတွင်လည်း ၎င်းဆီဈေးနှုန်းထက် နှစ်ဆ မြင့်တက်နေသဖြင့် ဒေသခံများ အခက်အခဲများစွာ ကြုံတွေ့နေရကြောင်း မူဆယ်ဒေသခံ တစ်ဦးက သျှမ်းသံတော်ဆင့်ကို ပြောသည်။

“ မနေ့က ဓာတ်ဆီ 92 တစ်လီတာကို (၄,၀၀၀) ကျပ်ထိ တက်နေတယ်။ တချို့ဆိုင်တွေလည်း ပိတ်ကြတော့ ရှိတဲ့ဆီဆိုင်တွေ ဈေးတအားတက်နေတယ်။ ဘူးနဲ့ဝယ်တဲ့သူကိုလည်း မပေးဝယ်တော့ဘူး “ ဟု ၎င်းဒေသခံတစ်ဦးက ပြောသည်။

ထို့အပြင် မူဆယ်-မန္တလေး ပြေးဆွဲနေသည့် လိုင်းကားများ ဆီများကိုဝယ်ယူရန် ခက်ခဲလာသဖြင့် စားဝတ်နေရေးအတွက် လိုင်းကားပြေးဆွဲရန် အခက်အခဲများစွာရင်ဆိုင် ကြုံတွေ့နေရကြောင်း မူဆယ်လိုင်းကားသမား တစ်ဦးက ပြောသည်။

“ မူဆယ်မှာတော့ ဖြည့်လို့မရဘူး။ ဆီဆိုင်တွေက ပြတ်လပ်၊ ရှိတဲ့ဆိုင်တွေကလည်း အဆမတန် ဈေးတက်နေတယ်။ လားရှိုးမြို့မှာ သွားဖြည့်ရတယ်၊ တစ်နာရီလောက်တန်းစီပြီး စောင့်ရတယ်။ ဒါတောင်သူတို့က ဆိုင်ကယ်နဲ့ အိမ်သုံးကားကိုပဲ ဦးစားပေးနေတယ်။ လိုင်းကားတစ်စီးကို (၅) သောင်းဖြည့်ဖို့ သတ်မှတ်ထားတယ်။ ဆီအပြည့်မထည့် ထားရင်လည်း လိုင်းကားကမဆွဲရဘူး “ ဟု ၎င်းကဆိုသည်။

အလားတူ သျှမ်းတောင် လင်းခေးမြို့တွင် စက်သုံးဆီ (92) တစ်လီတာလျှင် (၃,၀၀၀) ကျပ် ၊ ပင်လောင်းမြို့တွင် (92) တစ်လီတာ (၃,၅၀၀)ကျပ် ၊ ကွန်လုံမြို့တွင် 92 တစ်လီတာ (၃,၁၀၀) ကျပ်၊ မိုင်းရှုးမြို့တွင် 92 တစ်လီတာ (၃,၁၀၀) ကျပ် နှင့် ကာလိမြို့တွင် 92 တစ်လီတာ (၃,၀၀၀) ကျပ်ကျော်အထိ မြင့်တက်နေကြောင်းသိရသည်။

ဆက်လက်ပြီး တောင်ကြီးမြို့တွင် စက်သုံးဆီများ 92 တစ်လီတာကို (၂,၄၅၀) ကျပ် ၊ 95 တစ်လီတာလျှင် (၂,၆၃၀) ကျပ် ထိရှိနေပြီး တချို့ဆီဆိုင်များလည်း ပိတ်ထားလျက်ရှိကြောင်း သိရသည်။

“ ဓာတ်ဆီဆိုင်တွေက ထုံးစံအတိုင်းပါပဲ။ သစ်တောဂိတ်နားက BOC ဆိုင်က (95) မရဘူး၊ ( 92/ 97 ) တော့ရတယ်။ လွိုင်နမ့်ခုံးနားကတော့ (95) ရတယ်။ တောင်ကြီး Denko ကတော့ (92) ပဲရတယ်။ ဆိုင်တွေ ကတော့ ရတဲ့ဆိုင်လည်းရ ပြတ်နေတဲ့ဆိုင်တွေလည်း ရှိတာပေါ့ “ ဟု တောင်ကြီး ဒေသခံတစ်ဦးက သျှမ်းသံတော်ဆင့်ကို ပြောသည်။

စစ်အာဏာသိမ်းပြီး တနှစ်ခွဲကာလ နီးပါးရှိလာပြီးနောက် မြန်မာပြည်တဝှမ်း စက်သုံးဆီ၊ စားသုံးကုန် ပစ္စည်းများနှင့် လူသုံးကုန်ပစ္စည်းများအစစအရာရာ စျေးမြင့်တက်လာသည်။

စစ်ကောင်စီ၏ မကြာခဏပြောင်းလဲသည့် မူဝါဒ နှင့် ဒေါ်လာစျေး အရှိန်အဟုန် မြင့်တက်မှုကြောင့် စက်သုံးဆီ ဝယ်ယူသိုလှောင်ရန်လည်း ခက်ခဲနေကြကြောင်း သိရသည်။