သျှမ်းပြည်မြောက်ပိုင်း ပန်ဆိုင်းမြို့အတွင်းတွင် တရက်တည်း ပစ်ခတ်မှုနှစ်ကြိမ် ဖြစ်ပွားခဲ့ပြီး ထိခိုက်သေဆုံးမှုလည်း ရှိနေကြောင်း သတင်းသိရသည်။
ယမန်နေ့ (သြဂုတ် ၁၅) ရက် နံနက် ၁၁ နာရီဝန်းကျင်တွင် ညီနောင်မဟာမိတ်တပ်ဖွဲ့ဖြစ်သည့် တအာင်း (ပလောင်) အမျိုးသားလွတ်မြောက်ရေးတပ်မတော် (TNLA)၊ ရခိုင့်တပ်မတော် (AA)၊ ကိုးကန့်တပ်မတော် (MNDAA) တို့မှ စစ်အင်အား ၃၀၀ ဝန်းကျင်သည် ပန်ဆိုင်းမြို့နယ်အတွင်းသို့ ရောက်ရှိလာသည်။
၎င်းတို့မှ ပန်ဆိုင်းမြို့ကို ဖြတ်သန်းသွားပြီး နာရီဝက်ခန့်အကြာတွင် ပန်ဆိုင်းမြို့ အခြေစိုက် ကောင်းမူးတပ်မှ စစ်ကောင်စီတပ်ဖွဲ့သည် အဆိုပါ စစ်ကြောင်းနောက် လက်နက်ကြီး လက်နက်ငယ်များဖြင့် ပစ်ခတ်လိုက်ကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ညီနောင်မဟာမိတ်တပ်ဖွဲ့တွေက ပန်ဆိုင်းမြို့ကိုဖြတ်ပြီး မုံးကိုးဖက် သွားမယ့်ပုံပါပဲ၊ ခန့်မှန်း အင်အား ၃၀၀ နီးပါး လောက်ရှိတယ်၊ သူတို့စစ်ကြောင်း ပန်ဆိုင်းမြို့ အလွန်ရောက်ခါနီးလောက်မှာ စစ်ကောင်စီတပ်က ကောင်းမူးတပ် ကနေ လှမ်းပစ်လို့ လက်နက်ကြီး/ငယ်သုံးပြီး နှစ်ဖက်တိုက်ပွဲက နာရီဝက်နီးပါးကြာတယ်” ဟု အထက်ပါ အမျိုးသားက ပြောသည်။
ယင်းပစ်ခတ်မှုတွင် စစ်ကောင်စီတပ်ဖွဲ့သည် တောင်ကုန်းပေါ် နေရာယူပြီး လက်နက်ကြီး လက်နက်ငယ်တို့ဖြင့် လှမ်းပစ်နေသည့်အတွက် ညီနောင်မဟာမိတ်များမှ ခံပစ်ရင်း ဆုတ်ခွာသွားခဲ့ကြောင်း ဒေသခံများ၏ ပြောကြား ချက်အရ သိရသည်။
ထို့အပြင် ယင်းနေ့ တစ်နေ့တည်း ည ၉ နာရီဝန်းကျင်တွင်လည်း ပန်ဆိုင်းမြို့ရှိ လောင်းကစားနယ်မြေဘက်မှ ပစ်ခတ်သံများ ကျယ်လောင်စွာ ထွက်ပေါ်လာပြီး ထိခိုက်သေဆုံးမှုများလည်းရှိကြောင်း အမည်မဖော်လိုသူ ဒေသခံ အမျိုးသားတစ်ဦးက ဆက်လက်ပြောဆိုထားသည်။
“ပန်ဆိုင်းမြို့ရဲ့ အပြင်ဘက် နည်းနည်းကျတဲ့ လောင်းကစားဝိုင်းတွေ ဖဲဝိုင်းတွေ များတဲ့နယ်မြေဘက်မှာ ည ၉ နာရီလောက်က ပစ်ခတ်သံတွေကြားရတယ်၊ ဘယ်အဖွဲ့နဲ့ ဘယ်အဖွဲ့ပစ်ကြမှန်းတော့ မသိရဘူး၊ အဲ့ဖက်က သီးသန့်နယ်မြေလိုဖြစ်နေတော့ သာမာန်ပြည်သူတွေ သွားမစပ်စုရဲဘူး” ဟု ၎င်းက ပြောသည်။
လက်ရှိ ပန်ဆိုင်းမြို့နယ်အတွင်းတွင် ဝမ်းတိန်ဘက်မှ တရုတ်လူမျိုးများနှင့် ဆက်စပ်ပတ်သက်နေသည့် လောင်းကစားဝိုင်းများရှိနေပြီး သွားရောက် ဆော့ကစားလိုသူများကို လောင်းကစားရုံမှ ကြို၊ ပို့မှသာ သွားရောက်နိုင်ကြောင်းလည်း သိရသည်။
Leave a Comments