သျှမ်းပြည်အရှေ့ပိုင်း ကျိုင်းတုံမြို့နယ် ယဉ်းခကျေးရွာရှိ လင်မယား (၂) ဦး အိပ်ပျော် နေစဉ် မိုးသည်းထန်စွာ ရွာသွန်းမှုကြောင့် တောင်ကျရေစီးကြောင်း နှင့် အတူမျောပါသွားကြောင်း စုံစမ်းသိရသည်။
ပြီးခဲ့သည့် သြဂုတ် ၁၃ ရက် ညအချိန်တွင် မိုးသည်းထန်စွာရွာသွန်းနေပြီး တောင်ပေါ်ရေများ စီးဆင်းလာကာ နေအိမ်ထဲ အိပ်ပျော်နေသည့် လင်မယား (၂) ဦး ရေစီးထဲမျောပါသွားကြောင်း ကျိုင်းတုံဒေသခံ တစ်ဦးထံမှသိရသည်။
“ကျိုင်းတုံ နဲ့ မိုင်းဖြတ် နယ်စပ်ဖြစ်တဲ့ ယဉ်းခရွာမှာ လင်မယား (၂) ဦးက အိပ်နေတုန်း ရေကြီးရေလျှံမှုကြောင့် ရေထဲပါသွားတာ။ အခု သူ့ယောကျာ်းဖြစ်သူကိုတော့ တွေ့ပြီ။ သူ့မိန်းမတော့ ရေထဲပါသွားလို့ အခုထိရှာလို့မတွေ့သေးဘူး“ ဟု ၎င်း ဒေသခံတစ်ဦးက ပြောသည်။
၎င်း လင်မယား (၂) ဦးနေထိုင်သော ဒေသသည် တောင်ခြေအောက်တွင် နေထိုင်ပြီး သက်ကယ် အိမ်ခေါင်မိုးဖြင့် တည်ဆောက်ထားသော အိမ်များဖြစ်သဖြင့် တောင်ပေါ်ရေစီးကြောင်း ရိုက်ခတ်မှုကြောင့် နေအိမ်လည်း ရေထဲသို့ မျောပါသွားကြောင်း ၎င်းက ထပ်လောင်း ပြောသည်။
အလားတူ ကျိုင်းတုံမြို့တွင်လည်း (၂) ရက်ဆက်တိုက် ရေကြီးရေလျှံမှုကို ကြုံတွေ့နေရပြီး နေအိမ် နှင့် လယ်ယာများ ပျက်စီးမှုရှိနေကြောင်း ယနေ့ သြဂုတ် ၁၅ ရက် နံနက်ပိုင်းတွင် ရေများကျသွားပြီး သန့်ရှင်းရေးများ လုပ်ဆောင်နေကြကြောင်း သိရသည်။
“ရေဆည်က ရေတွေလျှံပြီး ရေတွေလယ်ထဲဝင်တာ။ စပါးပင်တွေခိုင်တော့ သိပ်မစိုးရိမ်ရဘူး။ ရေတွေအိမ်အောက်ထိ ဝင်တယ်။ တချို့ကပစ္စည်းတွေ မရွေ့ရဘူး ပစ္စည်းတွေတော့ပျက်စီးတာတွေ တော်တော်များများတော့ ပျက်စီးတယ်။ ဒီနေ့တော့ ရွံ့တွေထုတ်နေရတယ်“ ဟု ၎င်းကဆိုသည်။
ထို့အပြင် သျှမ်းပြည်အရှေ့ပိုင်းရှိ တာချီလိတ်မြို့တွင်လည်း (၂) ရက်ဆက်တိုက် ရေကြီးရေလျှံမှု ဖြစ်ပွားသဖြင့် နေအိမ် နှင့် ဈေးသည်များ၏ ပစ္စည်းအများအပြား ပျက်စီးဆုံးရှုံးခဲ့ရကြောင်း သိရသည်။
Leave a Comments