သျှမ်းပြည်မြောက်ပိုင်း နမ့်ခမ်းမြို့နယ် မိုခမ်းရပ်ကွက်တွင် နေထိုင်သည့် အမျိုးသားတစ်ဦးကို မူးယစ်ဆေး အကြောင်းပြကာ TNLA တပ်ဖွဲ့တို့မှ ဖမ်းဆီးခေါ်ဆောင်သွားခဲ့ပြီး ပြန်လွှတ်လာသော်လည်း ရိုက်နှက်ဒဏ်ရာဖြင့် သေဆုံးသွားကြောင်း သတင်းသိရသည်။

ပြီးခဲ့သည့် သြဂုတ် ၅ ရက်တွင် အင်အား ၃၀ ခန့်ရှိသည့် တအာင်း(ပလောင်) အမျိုးသားလွတ်မြောက်ရေး တပ်မတော် (TNLA) မှ နမ့်ခမ်းမြို့နယ်အတွင်း ဒေသခံများကို မူးယစ်ဆေးဝါးအကြောင်းပြကာ လာရောက်ဖမ်းဆီးသွားခဲ့ကြောင်း သိရသည်။

ထိုထဲတွင် အသက် (၆၀) အရွယ်ရှိ လုံးကျော်ဆွေလည်းပါဝင်ခဲ့ပြီး မိသားစုဝင်များ နှင့် သက်ဆိုင်ရာ ရပ်ရွာလူကြီးများ၏ ထောက်ခံမှုကြောင့် သြဂုတ် ၇ ရက်တွင် ခြေလက်ရောင်ကိုင်းဒဏ်ရာ နှင့် ဝမ်းဗိုက်တလျှောက် ညိုမဲဒဏ်ရာဖြင့် ပြန်လွှတ်လာကြောင်း နီးစပ်သည့် ဆွေမျိုးအမျိုးသားတစ်ဦးက သျှမ်းသံတော်ဆင့်ကို ပြောသည်။

“TNLA စစ်သားတချို့က အရပ်ဝတ်နဲ့ ရပ်ကွက်ထဲဝင်ဖမ်းတဲ့ စစ်သားကျတော့ အင်အား ၃၀ လောက်ရှိတယ်၊ မိုခမ်းရပ်ကွက်ဘက်လာဖမ်းတဲ့အချိန် ဒေသခံအယောက် ၁၀ နီးပါးမှာ သေဆုံးသွားရတဲ့ ဒီအသက် ၆၀ ကျော် လုံးကျော်ဆွေလည်းပါသွားတာပေါ့၊ ဖမ်းခံရပြီး နှစ်ရက်အကြာ ပြန်လွှတ်လာပေမဲ့ နှိပ်စက်ထားတဲ့ဒဏ်တွေ ကြောင့် မနေ့ကပဲ သေဆုံးသွားတယ်” ဟု ၎င်းဆွေမျိုးက ပြောသည်။

ထို့အပြင် ပြန်လည်လွှတ်မြောက်လာသည့် နေ့ရက်မှ စတင်ကာ အစာရေဆာစားသောက်နိုင်ခြင်း မပြုနိုင်သည့် အတွက် ကိုယ်ခံအားကျဆင်းကာ ယမန်နေ့ (သြဂုတ် ၁၄) ရက် နံနက် ၅ နာရီဝန်းကျင်တွင် နေအိမ်၌ပင် သေဆုံးသွားကြောင်း သိရသည်။

“ပြန်လွတ်လာကတည်းက ဘာမှကောင်းကောင်းစားလို့မရဘူး၊ နာတယ်လို့လည်း ခနခနညည်းပြောလေ့ရှိတယ်၊ ဒီလောက်အသက်ကြီးတဲ့ လူကို ဒီလောက်ထိ ရိုက်နှက်နှိပ်စက်တာ မသင့်တော်ဘူးလို့ထင်တာပဲ၊ အခုတော့ သူက သေဆုံးသွားပြီ” ဟု နီးစပ်သူ ဆွေမျိုးအမျိုးသားတစ်ဦးက သျှမ်းသံတော်ဆင့်ကို ပြောသည်။

ယင်းကဲ့သို့ မူးယစ်ဆေးအကြောင်းပြကာ ဒေသခံကို သေဆုံးရသည်အထိ ရိုက်နှက်ခြင်း ကိစ္စဖြစ်စဥ်များနှင့် ပတ်သက်ပြီး ဖြစ်စဥ်အကြောင်းရင်းကို မေးမြန်းသိရှိနိုင်ရန်အတွက် TNLA ပြောရေးဆိုခွင့်ထံ ကြိုးစားဆက်သွယ် ခဲ့သော်လည်း အဆက်အသွယ်မရခဲ့ပေ။

TNLA တပ်ဖွဲ့သည် ပြီးခဲ့သည့် ဇူလိုင် ၁၇ ရက်တွင်လည်း အရပ်ဝတ်များဖြင့် မိုင်းဝီးကျေးရွာအုပ်စု အတွင်းမှ ဒေသခံ ပြည်သူများကို မူးယစ်ဆေးအကြောင်းပြ ဖမ်းဆီးထားပြီး ယနေ့အချိန်ထိ ပြန်လည်လွှတ်မြောက် လာခြင်း မရှိသေးကြောင်း သတင်းသိရသည်။

မူးယစ်ဆေးဝါး အကြောင်းပြကာ ဖမ်းဆီးခံရသည့် ရွာသားများကို သျှမ်းပြည်မြောက်ပိုင်း မိုင်းခတ်အတွင်းရှိ လယ်ကွင်းပျက်များ ထွန်ယက်ရန်အတွက် ခိုင်းစေမည်ဖြစ်ကြောင်းလည်းသိရသည်။