သျှမ်းပြည်မြောက်ပိုင်း မူဆယ်မြို့နယ် တိန်းလုံကျေးရွာမှ ဒေသခံ အမျိုးသားတစ်ဦးကို စစ်ကောင်စီတပ်သားတို့မှ သေနတ်ဖြင့် ပစ်သတ်ပြီး အလောင်းကိုလည်း မိသားစုဝင်ထံ ပြန်မပေးကြောင်း သတင်းသိရသည်။
ယမန်နေ့( သြဂုတ် ၉) ရက် ည ၈ နာရီတွင် မူဆယ်မြို့ တိန်းလုံကျေးရွာမှ ဒေသခံအမျိုးသား တစ်ဦး ဆိုင်ကယ်တစ်စီးဖြင့် နေအိမ်မှ ထွက်လာစဥ် ရွာထိပ်အဝင်လမ်းအနီး၌ စစ်ကောင်စီတပ်သားတို့က အကြောင်းမဲ့ ပစ်သတ်လိုက်ပြီး လက်ရှိအချိန်အထိ အလောင်းပြန်မရသေးကြောင်း နီးစပ်သည့်မိသားစုဝင်တစ်ဦးက သျှမ်းသံတော်ဆင့်ကို ပြောသည်။
“စစ်ကားနှစ်စီးနဲ့ ရဲကားတစ်စီးက တိန်းလုံရွာဘက် ရောက်လာတယ်၊ အဲ့ထဲမှာ မြို့မ ပြည်သူ့စစ်တပ်ဖွဲ့တွေ လည်း ပါတယ်၊ သေနတ်နှစ်ချက်နဲ့ သူ့ကို ပစ်သတ်သွားတာ၊ အကြောင်းရင်းတော့ မသိရသေးဘူး” ဟု ၎င်းမိသားစုဝင်တစ်ဦးက ဆိုသည်။
အဆိုပါ ပစ်သတ်ခံရသူ အမျိုးသားသည် စိုင်းအိုက်ဖွယ်ဟု အမည်ရရှိပြီး သာမာန်အရပ်သား ပြည်သူ ဖြစ်ကြောင်း နှင့် ပစ်ခတ်ခံရမှုကြောင့် ဒဏ်ရာပြင်းထန်စွာ ရရှိပြီးနောက် ဆေးရုံသို့ ပို့ဆောင်ကုသပေးစဥ် သေဆုံး သွားရကြောင်း သိရသည်။
“ပစ်သတ်ခံရပြီးနောက် ပရဟိတသမားတွေ လာသယ်ဖို့လုပ်တာလည်း စစ်ကောင်စီ တပ်သားတွေက ambulance ကားတွေကို ပြန်လှည့်ခိုင်းတယ်၊ နောက်တော့ စကစတွေပဲ ဆေးရုံကို ပို့ပေးတာ၊ ဆေးရုံရောက် တော့ မမှီတော့ဘူးလေ၊ ဆေးရုံမှာပဲ သေဆုံးသွားပါတယ်” ဟုလည်း နီးစပ်သူ အမျိုးသားတစ်ဦးက သျှမ်းသံတော်ဆင့် ကို ပြောသည်။
လက်ရှိအချိန်တွင် စိုင်းအိုက်ဖွယ်၏ ရုပ်အလောင်းသည် စစ်ကောင်စီတို့လက်ထဲတွင် ရှိနေပြီး အမျိုးသမီး နှင့် ဒေသအတွင်းမှ အရပ်ဘက်အဖွဲ့အစည်းများ သွားရောက်တောင်းဆိုသော်လည်း စစ်ကောင်စီတို့ ပြန်မပေးသည့် အပြင် တွေ့ခွင့်လည်း မရကြောင်း သိရသည်။
ယင်းကဲ့သို့ အရပ်သားပြည်သူတစ်ဦးကို စစ်ကောင်စီတပ်သားတို့မှ အကြောင်းမဲ့ ပစ်သတ်ခြင်းနှင့် ပတ်သက်ပြီး တိန်းလုံဒေသခံများအနေဖြင့် စိုးရိမ်ထိတ်လန့်နေကြကြောင်းလည်း သတင်းသိရသည်။
မူဆယ်မြို့နယ်အတွင်းတွင် ပြီးခဲ့သည့် သြဂုတ်လ ၂ ရက်နေ့မှာလည်း မူဆယ်မြို့ အမှတ် ၁ ဈေးနားသို့ ကားတစ်စီး နှင့် ရောက်လာသည့် ပြည်သူ့စစ်ဝတ်စုံနှင့် တရုတ်စကားပြော အမျိုးသားနှစ်ဦးသည် အမည်မသိ လက်နက်ကိုင်တပ်ဖွဲ့တစ်ခု၏ ပစ်ခတ်ခြင်းကို ခံရပြီး ထိခိုက်ဒဏ်ရာ ပြင်းထန်စွာရရှိသွားသည့်ဖြစ်စဥ် ဖြစ်ပွားခဲ့သည်။
Leave a Comments