သျှမ်းပြည်တောင်ပိုင်း ပုံးအင်းဒေသတွင် မိုးများအဆက်မပြတ် ရွာသွန်းနေသောကြောင့် ယနေ့ (သြဂုတ် ၈) ရက်တွင် စပါးများ ရေလွှမ်းကာ ပျက်စီးမှုများရှိနေကြောင်း စုံစမ်းသိရသည်။

ပုံးအင်းဒေသတွင် တောင်တန်းများဖြင့် ဝိုင်းရံထားသော မြေပြန့်ဒေသတစ်ခုဖြစ်ပြီး ရေကြီးရေလျှံများကို နှစ်စဉ်နှစ်တိုင်း ခံစားရကာ ယခုနှစ်တွင် မိုးများသောကြောင့် ချောင်းမှတစ်ဆင့် အဖက်ဖက်မှ စီးဆင်းနေသော မိုးရေများကြောင့် ပုံးအင်းဒေသ တစ်ခုလုံးတွင် ရေကြီးရေလျှံများ ကြုံတွေ့နေရသည်။

ဟိုပုံးမြို့နယ် ပုံးအင်းဒေသမှ ဟိုတပ်ကျေးရွာသည် အမြင့်ဒေသဖြစ်ပြီး ယခင်နှစ်တွင် ရေကြီးရေလျှံမှု ဖြစ်ပွားမှုနည်းခဲ့သော်လည်း ယခုနှစ်တွင် လမ်းပေါ်ထိ ရေကြီးရေလျှံမှု ဖြစ်ရာမှ ဈေးဆိုင်တချို့ထဲသို့ ရေများဝင်ရောက်သည့် အထိ ဖြစ်နေကြောင်း ပုံးအင်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ ဟိုတပ်ရွာမှာ အရင်နှစ်တွေက ရေကြီးတာ သိပ်မရှိဘူး။ သူတို့က အမြင့်ပိုင်း ဒေသဖြစ်တယ် ။ အခုနှစ်က သူတို့အမြင့်ပိုင်း ဒေသရွာတွေမှာတောင် လမ်းပေါ်ထိ ရေတွေမြုပ်နေတယ် ။ တချို့လမ်းဘေးက ရှိတဲ့ဈေးဆိုင် တချို့တွေလည်း ရေဝင်နေတယ် ။ အခုအမြင့်ပိုင်း ကျေးရွာမှာတောင် စပါးရေလွှမ်းတယ်ဆိုတော့ အနိမ့်ပိုင်းက ကျေးရွာတွေလည်း စပါးတွေက တော်တော်များရေလွှမ်းနေတယ် “ ဟု ၎င်အမျိုးသားတစ်ဦးက ပြောသည်။

သို့သော်လည်း ရေလွှမ်းခံရသော စပါးများ ပျက်စီးမှုရှိနေသော်လည်း လက်ရှိအချိန်မှာ ဆုံးရှုံးမှု မသိသေးပေ။

ပုံးအင်းဒေသတွင် မိုး (၁၀) ရက်ကျော် အဆက်မပြတ် ရွာသွန်းသဖြင့် မိုးရေချိန်လည်း တနေ့လျှင် (၁) ပေကျော် ရေတက်ကာ စပါးများလည်း ရေလွှမ်းမိုးမှုကို ကြုံတွေ့နေရသည်။

“ အခုစပါးရိတ်ရင်လည်း ကားတွေကဆင်းလို့မရတော့ မိုးရေကြီးတဲ့ကြား ဆင်းရိတ်နေရပြီ ၊ရတဲ့ဟာရှိ၊ မရတဲ့ဟာလည်း ရှိတယ်။ အခုက နေ့စားလယ်ရိတ်ခက စျေးကြီးတော့ ရိတ်မယ့်သူတော့ ရှိတယ်။ ရေထဲဆင်းရိတ်ရတော့ နာရီပိုင်းပဲရိတ်တယ်။ လူငယ်တွေက သိပ်မရှိတော့ အခု (ကျား-မ) မရွေး လူလတ်ပိုင်း အသက်ကြီးတဲ့သူတွေ ဆင်းရိတ်နေရတယ်၊ တစ်ရွာနဲ့တစ်ရွာရှိတဲ့သူတွေနဲ့ ကူပြီး ရိတ်နေရတယ် “ ဟု ၎င်းပုံးအင်းလယ်သမားတစ်ဦးက ပြောသည်။

အဆိုပါ လယ်ကွင်းထဲ ရေကြီးမှုကြောင့် ဒေသခံများက နှစ်စဉ်ရေအောက်တွင် စပါးကို ရိတ်သိမ်းကြရပြီး၊ ရေကြီးမှု ပြသာနာကို ဖြေရှင်းပေးနိုင်ရန်အတွက် ဒေသခံများက သက်ဆိုင်ရာ အစိုးရထံ အမြန်ဆုံး လာရောက်ဖြေရှင်းပေးရန် တောင်းဆိုနေကြကြောင်း သိရသည်။

ယခင်တွင် လယ်သမားများ နေ့စားခ တစ်ယောက်လျှင် (၅,၀၀၀) ကျပ် ဖြင့် ရိတ်သိမ်းရပြီး ယခုနှစ် နေ့စားခ တစ်ယောက်လျှင် (၈,၀၀၀) ကျပ် မြင့်တက်နေပြီး ပုံးအင်းတောင်သူများ၏ စပါးစျေးနှုန်းမှာ မြင့်တက်မှု မရှိသေးကြောင်း သိရသည်။