သျှမ်းပြည်မြောက်ပိုင်း မူဆယ်မြို့ အမှတ် (၁) မြို့လယ်ဈေးတွင် ယနေ့ (ဩဂုတ် ၁) ရက် နံနက် (၁၁) နာရီဝန်းကျင်၌ ဗုံးပေါက်ကွဲမှုဖြစ်ပွားခဲ့ပြီး အမျိုးသမီး တဦးသေဆုံးကာ ပြည်သူ့စစ် (၂) ဦးနှင့် ယာဉ်ထိန်းရဲ (၁) ဦး ထိခိုက်ဒဏ်ရာရရှိကြောင်း သတင်းရရှိသည်။
“ ဒီနေ့ မနက် ဗုံးပေါက်ကွဲမှုဖြစ်တာ။ ပြည်သူ့စစ် ၂ ယောက်နဲ့ ယာဉ်ထိန်းရဲ ၁ ယောက်ထိသွားတာ။ အမျိုးသမီးတစ်ဦး သေဆုံးသွားတယ်။ ယာဉ်ထိန်းရဲက လက်နားထိခိုက်သွားတယ်။ ဗုံးပေါက်ကွဲတဲ့နေရာက မြို့လယ် မီးပွိုင့်နားမှာပဲ ပေါက်ကွဲသွားတာ” ဟု မူဆယ်မြို့ အသက် ၃၅ အရွယ်ရှိ အမျိုးသားက သျှမ်းသံတော်ဆင့်ကို ပြောသည်။
အဆိုပါ နေရာသည် ပြည်သူ့စစ် နှင့် ယာဉ်ထိန်းရဲတို့ အမြဲစောင့် နေလျက်ရှိသည့်နေရာဖြစ်သည်။
“ဘယ်သူက ဗုံးလာထောင်လဲတော့ မသိဘူး။ အဲ့မှာ ဗုံးလာထောင်ထားတာတဲ့။ အဲ့နားတော့ သူတို့အမြဲစောင့် နေတတ်တယ်။ ယာဉ်ထိန်းရဲ နဲ့ ပြည်သူ့စစ် တစ်ယောက်ကတော့ တော်တော်လေးထိသွားတယ်။ ကျန်တဲ့တစ်ယောက်တော့ ဒဏ်ရာသိပ်မပြင်းဘူး” ဟု မူဆယ်မြို့ ဒေသခံအမျိုးသား တစ်ဦးက ပြောသည်။
မူဆယ်မြို့သည် ဇူလိုင်လ အတွင်း (၄) ကြိမ်မြောက် ဗုံးပေါက်ကွဲမှု ဖြစ်ပွားခဲ့ကြောင်းသိရသည်။
Leave a Comments