သျှမ်းပြည်တောင်ပိုင်း ပင်လုံမြို့၏ မြောက်ပိုင်းတွင် ပစ်ခတ်သံများ စတင်ကြားရသည့်အတွက် ဒေသခံတချို့ ကြောက်လန့်ပြီး မြို့ပေါ်အမျိုးများ နေအိမ်သို့ တိမ်းရှောင်လာကြောင်း စုံစမ်းသိရသည်။
ယမန်နေ့ (ဇူလိုင် ၁၉ ) ရက် ညနေပိုင်းတွင် ပင်လုံမြို့ နှင့် ၁၀ မိုင်ခန့်ကွာဝေးသည့် ပင်လုံ – လဲချား လမ်းမကြီးဘေးတွင် ပစ်ခတ်သံများ ကြားရကြောင်း ပင်လုံမြို့မှ အသက် ၅၀ အရွယ်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။
“၃ နာရီလောက်မှာ ပစ်ခတ်သံတွေ စကြားရပါတယ်၊ သေနတ်သံတွေပေါ့၊ ဘယ်အဖွဲ့နဲ့ အဖွဲ့က ပစ်ခတ်နေကြမှန်း မသိရဘူး၊ ပစ်ခတ်သံက ငါးမိနစ်လောက်ပဲကြာပါတယ်” ဟု အထက်ပါ အမျိုးသားက ပြောသည်။
ယင်းပစ်ခတ်သံများကြောင့် လယ်ယာလုပ်ငန်းခွင်အတွင်း ရောက်နေကြသည့် ဒေသခံ ပြည်သူများ နေအိမ်သို့ ပြေးပြန်ကြရပြီး တချို့က မြို့ပေါ်ရှိ အမျိုးများ၏ နေအိမ်သို့ ထွက်ပြေးတိမ်းရှောင်မှုများရှိလာကြောင်း သိရသည်။
“လယ်ယာသွားနေကြတဲ့သူတွေလည်း အိမ်ကို ပြေးပြန်ပြီး ပစ္စည်းတွေ သိမ်းကြတယ်၊ တချို့ကတော့ အမျိုးတွေ ရှိတဲ့ မြို့ပေါ်မှာ ရှောင်သွားကြတယ်၊ စစ်ရေးတင်းမာမှုတွေက နေ့တိုင်းလိုလို ကြားနေကြတော့ အခုလိုပစ်ခတ်သံ ကြားရတာနဲ့ တိုက်ပွဲပြင်းထန်မှာကို ကြောက်ကြတယ်လေ” ဟု ပင်လုံမြို့မှ အမျိုးသမီး တစ်ဦး က သျှမ်းသံတော်ဆင့်ကို ပြောသည်။
လက်ရှိ ပင်လုံမြို့ပေါ်သို့ တိမ်းရှောင်လာသည့် စစ်ရှောင်အများစုသည် သက်ကြီးရွယ်အိုများနှင့် ကလေးငယ်များ ဖြစ်ကြပြီး ကျေးရွာအတွင်း ကျန်ရှိသည့် တချို့ဒေသခံများကလည်း စစ်ရှောင်ရန်အတွက် ကြိုတင်ပြင်ဆင်မှုများ ရှိနေကြောင်းလည်း သိရသည်။
ပင်လုံမြို့အတွင်း သွားလာလှုပ်ရှားနေသည့် လက်နက်ကိုင် တပ်ဖွဲ့များ အနေဖြင့် အာဏာသိမ်း စစ်ကောင်စီ တပ်ဖွဲ့တို့အပြင် ပြည်သူ့စစ် PNA၊ သျှမ်းတပ်ဖွဲ့ နှစ်တပ် တို့က သွားလာလှုပ်ရှားနေသည့် နယ်မြေဖြစ်သည်။
Leave a Comments