Kaung for you ကျောင်းတွင် စာသင်ကြားပေးနေသည့် ဆရာ/မ များကို ဖမ်းဆီးခြင်းသည် လွတ်လပ်စွာ ပညာသင်ကြားခွင့်ကို ချိုးဖောက်ခြင်းဖြစ်ပြီး ယုတ်မာစွာလူမဆန်မှုဟု (NUG) ပညာရေးဒုဝန်ကြီး ဂျာထွယ်ပန် ကပြောဆိုလိုက်သည်။
Kaung 4u ကျောင်းဖြစ်ပျက်ခဲ့သည့် ကိစ္စများကို ပညာရေးဝန်ကြီးဌာနမှ စုံစမ်းစစ်ဆေးနေစဉ်အတွင်း ဆရာကောင်းသိုက်စိုး အဖမ်းခံရသည့် သတင်း နှင့် အတူ ဆရာ/ မ တချို့လည်းဖမ်းခံရသည်။
“Kaung 4u အနေနဲ့ စီမံခန့်ခွဲမှု လိုအပ်ချက်တွေရှိခဲ့ပြီး ကျောင်းအုပ်ချုပ်ရေးအဖွဲ့အနေနဲ့ တာဝန်ရှိကြောင်းခံယူပြီးဖြစ်ပါတယ်။ ဒီအဖြစ်အပျက်အပေါ် အခွင့်ကောင်းယူပြီး စာသင်ကြားပေးနေတဲ့ ဆရာ/မတွေကိုဖမ်းဆီးတာ က လွတ်လပ်စွာပညာသင်ကြားခွင့်ကို ချိုးဖောက်တာဖြစ်ပြီး ယုတ်မာလူမဆန်မှုတွေပဲဖြစ်ပါတယ်” ဟု NUG ပညာရေး ဒုဝန်ကြီး ဂျာထွယ်ပန် က ပြောဆိုလိုက်သည်။
လက်ရှိအချိန်တွင် လုံခြုံရေး သတိဖြင့် နေထိုင်ကြရန် နှင့် ပညာရေးဝန်ကြီး ဌာနမှ အဖြစ်အပျက်များအပေါ် ပြည်သူကို အသိပေးစာထုတ်ပေးရန် ပြင်ဆင်နေသည်ဟုလည်း ပညာရေးဒုဝန်ကြီးက သူမ ၏ လူမှုကွန်ရက် စာမျက်နှာတွင် ရေးသားခဲ့သည်။
စစ်အာဏာသိမ်းပြီးနောက်ပိုင်း စစ်ကောင်စီလက်အောက်ခံ ကျောင်းများတွင် မတက်ချင်သော ကျောင်းသူ၊သား များအတွက် (Kaung for you) ပညာရေးအွန်လိုင်းကျောင်းများ ဖွင့်လှစ်လာခြင်း ဖြစ်သည်။
ထိုသို့ ဖွင့်လှစ်လာပြီးနောက် (kaung for you ) ကျောင်းတွင် စာသင်နေသော ကျောင်းဆရာ၊မ များကို စစ်ကောင်စီမှ နေရပ်လိပ်စာ အတိအကျ နှင့် ဖမ်းဆီးခဲ့ပြီးနောက် ထိုကျောင်းမှ စာသင်ကြားနေသော ကျောင်းသူတစ်ဦးက မိမိလုံခြုံရေးအတွက် စိုးရိမ်နေလျက်ရှိကြောင်း သျှမ်းပြည်တောင်ပိုင်း နဝမတန်းကျောင်းသူ တစ်ဦးက သျှမ်းသံတော်ဆင့်ကို ပြောသည်။
“ကျောင်းက ဆရာ၊မ တွေဖမ်းခံရတယ်ကြားပြီး ညီမတို့တောင် ပိတ်ထားရတယ်၊ အရင်ကလည်း ခြိမ်းခြောက်ခံရတယ် ၊ အဲ့ကျောင်း တက်တဲ့သူကို လိုက်ဖမ်းမယ်လို့လည်း ပြောတယ်၊ ညီမတို့လည်း သတိထားပြီး နေနေရတယ်၊ လုံခြုံရေးစိုးရိမ်နေရတယ်” ဟု (Kaung for you) ကျောင်းသူတစ်ဦးက ပြောသည်။
အဆိုပါ ကျောင်းတွင်စာသင်ပေးနေသော ကျောင်းဆရာ၊မများမှ မကွေးတိုင်းတွင် (၅) ဦး ၊ မန္တလေးတိုင်း မြစ်သားမှ (၄) ဦးနှင့် သျှမ်းပြည်တောင်ပိုင်း ကလောတွင် (၁) ဦး တို့သည် စစ်ကောင်စီ ဖမ်းဆီးထားခဲ့ကြောင်း သိရသည်။
