သျှမ်းပြည်တောင်ပိုင်း ရပ်စောက်မြို့နယ်များက သျှမ်းတပ် (၂) တပ် တို့ တိုက်ပွဲဖြစ်ပွားမည်ကို ဒေသခံများက စိုးရိမ်နေကြပြီး ထွက်ပြေးရန် အဝတ်ထုတ်ပြင်ဆင်နေရကြောင်း စုံစမ်းသိရသည်။
ဇူလိုင်လမှ စတင်ပြီး ရပ်စောက်မြို့နယ် နောင်ဝိုးကျေးရွာအုပ်စု၊ နောင်လုံကျေးရွာအုပ်စု နှင့် ကျောက်ဂူကျေးရွာအုပ်စုတို့တွင် စစ်ကောင်စီတပ် အပါအဝင် SSPP/SSA နှင့် RCSS/SSA တို့ စစ်ရေးတင်းမာနေပြီး ဒေသခံများက တိုက်ပွဲဖြစ်ပွားမှာကို စိုးရိမ်နေကြောင်း သိရသည်။
“ဖြစ်နိုင်ရင်တော့ သူတို့ကို တိုက်ပွဲမဖြစ်စေချင်ဘူး။ လောလောဆယ်တော့ သေနတ်ပစ်ဖောက်သံတွေ မကြားရသေးဘူး။ အခုရက်ပိုင်းမှာ သူတို့ တပ် ၃ ခုလုံးက စစ်ရေးတင်းမာနေကြတာ။ ကျနော်တို့ အခုကတော့ တိုက်ပွဲဖြစ်ရင် ရှောင်တိမ်းဖို့ အထုတ်တွေ ပြင်ဆင်ထားရပြီ” ဟု နောင်ဝိုးကျေးရွာအုပ်စုတွင် နေထိုင်သည့် ဒေသခံ အမျိုးသားတစ်ဦးက ပြောသည်။
လက်ရှိတွင် ပြည်သူများက လုပ်ငန်းခွင်ဝင်ချိန်၊ လယ်ယာသွားချိန် နှင့် စားဝတ်နေရေးအတွက် ရှာဖွေနေရချိန်ဖြစ်သည့် အတွက်ကြောင့် တိုက်ပွဲမဖြစ်ပွားရန်အတွက် ပြည်သူများက တောင်းဆိုနေကြသည်။
“အခုက ကျနော်တို့ လယ်ယာ တွေ သွားတဲ့ချိန်ဖြစ်တယ်။ အခုမှပဲ စိုက်ပျိုးရေးတွေလုပ်ရတာ။ သူတို့ တိုက်ပွဲဖြစ်ရင် ကျနော်တို့ အတွက် စားဝတ်နေရေးအတွက်က ခက်ခဲလာတယ်။ သူတို့ကို ဒီချိန်တိုက်ပွဲ မဖြစ်ဖို့ ကျနော်တို့ တောင်းဆိုပါတယ်” ဟု နောင်ဝိုးကျေးရွာအုပ်စု ဒေသခံတစ်ဦးက ပြောသည်။
လက်ရှိတွင် စစ်ကောင်စီ တပ်က ရပ်စောက်မြို့နယ်၊ ညောင်ရွှေမြို့နယ် ၊ ရွာငံမြို့နယ်တို့တွင် စစ်ဆေးရေး တင်းကြပ်နေလျက်ရှိကြောင်း သိရသည်။
Leave a Comments