သျှမ်းပြည်မြောက်ပိုင်း မူဆယ်မြို့တွင် ယမန့်နေ ဇူလိုင် (၁၃) ရက်၌ အမှတ် ၂ အထက်တန်းကျောင်း ဗုံးပေါက်ကွဲမှု ဖြစ်ပွားပြီးနောက် စစ်ကောင်စီမှ စစ်အင်အားအပြည့်ဖြင့် ကျောင်းတိုင်းကို လုံခြုံရေးတိုးမြှင့်ထားကြောင်း စုံစမ်းသိရသည်။
ယနေ့ ဇူလိုင် (၁၄) ရက် မူဆယ်မြို့ စာသင်ကျောင်းတိုင်းတွင် လုံခြုံရေး အရ ဟုဆိုပြီး စစ်ကောင်စီက စစ်အင်အား အများအပြားယူထားကြောင်း သိရသည်။
“ဒီနေ့ ကျောင်းတိုင်းမှာ စစ်အင်အားအများကြီးနဲ့ စောင့်နေတာ။ လက်နက်ပါတယ်။ ဒီနေ့ ကျနော်ဖြတ်လာတဲ့ ကျောင်းဆို ကား ၃ စီးလောက်ရှိတဲ့စစ်သားတွေက လာစောင့်နေတာ။ သူတို့လုံခြုံရေးတိုးမြှင့်ထားတာ” ဟု မူဆယ်မြို့ ဒေသခံ အမျိုးသားတစ်ဦးက ပြောသည်။
မူဆယ်မြို့ရှိ စာသင်ကျောင်းများကို ယခင်က စစ်သားများ လာရောက် စောင့်ကြည့်နေသော်လည်း ယနေ့ကဲ့သို့ စစ်အင်အား အများအပြားမရှိကြောင်း သိရသည်။
“အရင်ကတည်းကစောင့်တာရှိပါတယ်။ ဒါမယ့် အရင်ကစောင့်ရင် တစ်ကျောင်းကို ၃ ယောက်လောက်ထိပဲစောင့်တယ်။ ဒီနေ့ အများလာစောင့်တယ်” ဟု ၎င်းအမျိုးသားက ပြောသည်။
အဆိုပါ စစ်သားများ ကျောင်းများကိုစောင့်ကြည့်နေပြီး လုံခြုံရေးယူပေးနေသည့် အပေါ် ကလေးများအတွက် လုံခြုံရေးရကြောင်း ၊ အလားတူ တစ်ဖက်တွင်လည်း မိဘများအနေဖြင့် ကလေးကို စိုးရိမ်ရကြောင်း ကျောင်းသားမိဘများက ပြောသည်။
“သူတို့ ဒီလိုမျိုးလာစောင့်တာ ကလေးတွေအတွက် လုံခြုံရေးအတွက်တော့ တစ်မျိုးကောင်းပါတယ်။ တစ်ဖက်မှာလည်း ကိုယ်ပိုင်ကျောင်းမထားနိုင်တဲ့ မိဘတွေအတွက်လည်း အဆင်ပြေတာပေါ့။ ဒါမယ့်လည်း စစ်သားက ဒီလိုမျိုးစောင့်နေတာကြောင့် မိဘတွေအတွက်တော့ စိုးရိမ်ရတာပေါ့။ ကျောင်းမထားလည်း အဆင်မပြေဘူး။ စစ်သားတွေ ဒီလိုမျိုးကျောင်းမှာလာစောင့် တာတော့ သူ့နေရာမဟုတ်ဘူးပေါ့” ဟု ကျောင်းသားမိဘက ပြောသည်။
ထိုသို့ ဗုံးပေါက်ကွဲမှုကြောင့် ယမန်နေ့ ဇူလိုင် (၁၃) ရက်တွင် မူဆယ်မြို့ရှိ စာသင်ကျောင်းများကို ပိတ်လိုက်ရကြောင်း သိရသည်။
စစ်ကောင်စီ အနေဖြင့် ကလေး သူငယ်များ၏ ပညာသင်ကြားပိုင်ခွင့် (Right to Education) ကို မျက်ကွယ်ပြုကာ နိုင်ငံရေး အကျိုးအမြတ်အတွက် အသုံးချရန် ကြိုးစားနေကြောင်း စစ်အုပ်စု ဖွင့်လှစ်မည့် စာသင်ကျောင်းများ အပေါ် အကြမ်းဖက် စစ်အုပ်စု တပ်ဖွဲ့ဝင်များ ကိုယ်တိုင် အကြမ်းဖက် တိုက်ခိုက်နိုင်သည် ဟူသည့် ဖြစ်နိုင်ချေကို ပေါ့ပေါ့တန်တန် မမှတ်ယူ အပ်ကြောင်း တော်လှန်ရေး အင်အားစုများ အနေဖြင့် စစ်ဘက်ဆိုင်ရာ ကျင့်ဝတ်များကို တင်းကျပ်စွာ လေးစား လိုက်နာကြရန်အတွက် တိုက်တွန်းကြောင်း စာသင်ကျောင်းများကို တိုက်ခိုက်ခြင်းအား မည်သည့်ဘက်၊ မည်သည့်အစုအဖွဲ့က တိုက်ခိုက်သည် ဖြစ်စေ လုံးဝ လက်ခံမည် မဟုတ်ဘဲ ရှုတ်ချမည် ဖြစ်ကြောင်း အမျိုးသား ညီညွတ်ရေး အစိုးရ (NUG) ၏ ပညာရေး ဝန်ကြီးဌာနက ဇွန်လ ၃ ရက်နေ့တွင် ထုတ်ပြန်ထားသည်။
