သျှမ်းပြည်တောင်ပိုင်း မိုးဗြဲမြို့ အနီးဝန်းကျင်ရှိ စစ်ရှောင်စခန်းတွင်နေထိုင်သည့် ကလေးများ ရာသီတုပ်ကွေး ဖြစ်ပွားနေကြောင်း စုံစမ်းသိရသည်။
မိုးဗြဲ စစ်ရှောင်စခန်းတွင် စစ်ရှောင် ဦးရေ (၁၅၀၀) ကျော်ရှိပြီး ထိုထဲတွင်အသက် ၁၀ နှစ်အောက် ကလေး (၅၀၀) ကျော်ဝန်းကျင် ရှိသည်။
ထိုထဲမှ ကလေး (၃၀၀) ဝန်းကျင်သည် ယခုမိုးရာသီ ၌ ရာသီတုပ်ကွေး၊ ဝမ်းပျက်၊ ဝမ်းလျော များဖြစ်ပွားနေပြီး ဆေးကုသရန် ခက်ခဲနေကြောင်း မိုးဗြဲစစ်ရှောင် ကူညီသူတစ်ဦးက သျှမ်းသံတော်ဆင့်ကို ပြောသည်။
“ တော်တော်ဖျားကြတယ်။ ပျှမ်းမျှ နဲ့ဆိုရင် ကလေးဦးရေ (၅၀၀) လောက်မှာ (၃၀၀) လောက်တော့ ဖျားနာနေကြတာ ဝမ်းပျက် ဝမ်းလျှောကြတယ်။ ကျနော်တို့ သီးသန့်ခွဲခြားထားတော့ မသိဘူး။ ဆေးကုသဖို့လည်း ခက်ခဲနေတယ်“ ဟု ၎င်းကပြောသည်။
အဆိုပါ တုပ်ကွေးဖြစ်ပွားသော ကလေးများ (၃၀၀) ကျော်ဝန်းကျင်သည် မည်သည့် ဆေးရုံဌာနမှ သွားရောက်ကူညီမှု မရှိသောကြောင့် စစ်ရှောင်စခန်းရှိ ကျန်းမာရေး အဖွဲ့များကိုသာ အားကိုးနေရသည်။
“ပညာရေးပဲဖြစ်စေ၊ ကျန်းမာရေးပဲဖြစ်စေ တခြားဌာနကနေ လာကူတာမရှိဘူးဗျ။ အလှူရှင်ကနေပဲ အားကိုးနေရတယ်။ ဆေးဝါးတွေမှာရတယ်။ ဆေးဝါးလုံလုံလောက်လောက်တော့မရှိဘူး” ဟု အထက်ပါ ပုဂ္ဂိုလ်က ဆိုသည်။
ယခုကာလသည် မိုးတွင်းကာလဖြစ်ပြီး မိုးဗြဲစစ်ရှောင်များအတွက် မိုးကာများ ၊ ဆေးဝါးများ နှင့် စားနပ်ရိက္ခာများ အရေးပေါ် လိုအပ်နေကြောင်း လည်း မိုးဗြဲစစ်ရှောင်ကူညီသူများက ပြောသည်။
ထိုအတူ မိုးဗြဲစစ်ရှောင်စခန်းတွင် ကိုယ်ဝန်ဆောင်မိခင် (၃၀) ဦးရှိပြီး ကလေးမွေးဖွားရန် အတွက်လည်း ခက်ခဲကြောင်း၊ မွေးဖွားလာသော ကလေးတွင် အသားဝါရောဂါ ဖြစ်မည်ကို စိုးရိမ်ကြောင်း စစ်ရှောင်ကူညီသူ တစ်ဦးက ထပ်လောင်းပြောသည်။
“ သူတို့ခက်ခဲတာကတော့ လွိုင်ကော်ဖက် ဆေးရုံသွားဖို့ လည်းငွေကြေးအတွက် ခက်ခဲတယ်။ ပြည်သူ့ဆေးရုံလည်း မဖွင့်ဘူး။ ဒီတောတောင်ထဲ စစ်ရှောင်စခန်းထဲမှာ မွေးပေးမယ်လို့ ဆုံးဖြတ်ထားတယ်။ ကျနော်တို့မှာ ဆေးဝါးလုံလုံလောက်လောက် မရှိတော့ မွေးလာတဲ့ကလေးတွေ အသားဝါရောဂါကို စိုးရိမ်တယ်” ဟု ၎င်းကပြောသည်။
လက်ရှိ စစ်ကောင်စီသည် ဖယ်ခုံမြို့နယ် နှင့် မိုးဗြဲမြို့အတွင်းရှိ ကျေးရွာများထဲတွင် တပ်စွဲထားပြီး၊ စစ်ကောင်စီ နှင့် ပြည့်သူကာကွယ်ရေးတပ် (PDF) တို့ မကြာခဏ တိုက်ပွဲဖြစ်ပွားကာ ဒေသခံ ထောင်ချီ ထွက်ပြေးတိမ်းရှောင်နေရသည်။
Leave a Comments