ကျောက်မဲမြို့နယ် စာသင်ကျောင်းများ CDM ပညာရေးဝန်ထမ်းများသာ ခန့်အပ်ရန် TNLA ညွှန်ကြား

0

သျှမ်းပြည်မြောက်ပိုင်း ကျောက်မဲမြို့နယ် မိုင်းတင်းကျေးရွာအုပ်စုရှိ စာသင်ကျောင်းများတွင် CDM ဆရာ/ ဆရာမ များကိုသာ ခန့်အပ်ရန် တအာင်း (ပလောင်) အမျိုးသားလွတ်မြောက်ရေးတပ်မတော် (TNLA ) တို့မှ ညွှန်ကြားထားကြောင်း သတင်းသိရသည်။

ပြီးခဲ့သည့် ဇွန်လ ၁ ရက်နေ့မှ စတင်ကာ မိုင်းတင်းကျေးရွာအုပ်စုအတွင်းရှိ အခြေခံစာသင်ကျောင်းများတွင် စစ်ကောင်စီခန့် ဆရာ/ဆရာမများ လာရောက်သင်ကြားခွင့် မပြုကြောင်း (TNLA) မှ ထုတ်ပြန်ညွှန်ကြားထားကြောင်း သိရသည်။

“ဒီအုပ်စုမှာ စာသင်ကျောင်း စုစုပေါင်း ၅ ကျောင်းရှိပါတယ်၊ ဒါပေမဲ့ TNLA က စစ်ကောင်စီခန့်ထားတဲ့ ဆရာ/မတွေ လာသင်လို့ မရဘူးတဲ့၊ CDM လုပ်ထားတဲ့ ဆရာ/မတွေကိုပဲခေါ် သင်ဖို့ ဒေသခံတွေကို ညွှန်ကြားလာတယ်၊ ဒါပေမဲ့ CDM ဆရာ/မရဲ့ လုံခြုံရေးကို တွေးမိပြီး ရွာသားတွေလည်း မခေါ်ရဲသေးဘူး၊ TNLA ကတားမြစ်ထားတဲ့ စစ်ကောင်စီခန့် ဆရာဝန်တွေကလည်း ကြောက်ပြီးမလာရဲကြလို့ အခုထိကျောင်းက မဖွင့်နိုင်သေးဘူး” ဟု မိုင်းတင်းဒေသခံအမျိုးသား တစ်ဦးက သျှမ်းသံတော်ဆင့်ကိုပြောသည်။

ကျောက်မဲမြို့နယ်က မိုင်းတင်းကျေးရွာ ဘုန်းကြီးကျောင်း

အဆိုပါ မိုင်းတင်းကျေးရွာအုပ်စုအတွင်းရှိ အခြေခံစာသင်ကျောင်းများအနက် မူလတန်းကျောင်း ၄ ကျောင်းနှင့် အထက် တန်းကျောင်းခွဲ ၁ ကျောင်းရှိနေကြောင်း သိရသည်။

ဇွန်လ ပထမပတ်အတွင်းတွင် စာသင်ကျောင်း ၃ ရက်ဖွင့်လှစ် သင်ကြားနိုင်ခဲ့ပြီး TNLA တပ်သားတို့၏ ခြိမ်းခြောက်ပြောဆို တားမြစ်မှုများကြောင့် စစ်ကောင်စီလက်အောက်ခံ ဆရာ/မများ ကြောက်လန့်ကာ ကျောင်းဆက်မဖွင့်နိုင်ဘဲ ကျောင်း ပိတ်လိုက်ရကြောင်း ဒေသခံများကပြောသည်။

“ငွေကြေးတတ်နိုင်တဲ့သူတွေကျတော့ သူတို့သားသမီးတွေကို မြို့ပေါ်ကိုယ်ပိုင်ကျောင်းတွေမှာ သွားအပ်ကြတယ်၊ ငွေကြေးမတတ်နိုင်တဲ့သူတွေအဖို့ကျတော့ ကျောင်းမဆက်တက်နိုင် စာမသင်နိုင်ကြတော့ဘူး” ဟု မိုင်းတင်းကျေးရွာ အုပ်စုမှ ဒေသခံက ဆက်ပြောသည်။

လက်ရှိအချိန်အထိ မိုင်းတင်းကျေးရွာအုပ်စုအတွင်းမှ စာသင်ကျောင်းများ ပြန်ဖွင့်နိုင်သည့် အခြေအနေမရှိသည့်အတွက် ကျောင်းသားမိဘများက ကလေးများ၏ ပညာရေးကို စိုးရိမ်နေကြောင်း သတင်းသိရသည်။

“ကိုယ်ပိုင်ကျောင်းတွေ မြို့ပေါ်ကျောင်းတွေမှာ မတက်နိုင်တဲ့ ကလေးတွေကိုတော့ သနားမိတယ်၊ အာဏာမသိမ်းခင်မှာ ကိုဗစ်ကြောင့် ကျောင်းတစ်နှစ် နားထားရသလို အခုလည်း စစ်အာဏာသိမ်းလို့ ကျောင်းပိတ်ထားရတာနဲ့ဆိုရင် သူတို့ နစ်နာတာ နှစ်နှစ် ရှိပြီလေ” ဟု မိုင်းတင်းမှ အသက် ၃၀ အရွယ်ရှိ အမျိုးသားတစ်ဦးက သျှမ်းသံတော်ဆင့်ကို ပြောသည်။

မိုင်းတင်းကျေးရွာအုပ်စုအတွင်းမှ အခြေခံစာသင်ကျောင်းများသည် နမ့်ဆော့ကျေးရွာ၊ ဝမ်လုံကျေးရွာ၊ ဝမ်စန်းကျေးရွာ၊ ပြိန်းခါးကျေးရွာနှင့် နားမွန်းကျေးရွာတို့တွင် တည်ရှိနေကြောင်းနှင့် လက်ရှိ TNLA တပ်သားများမှ သွားလာလှုပ်ရှား နေကြောင်း ဒေသခံများက ပြောသည်။

Leave a Comments