သျှမ်းပြည်မြောက်ပိုင်း မူဆယ်ခရိုင် ကွတ်ခိုင်မြို့နယ်အတွင်း စစ်ကောင်စီ နှင့် သျှမ်းမြောက် ပြည်သူ့လုံခြုံရေး နှင့် ကာကွယ်ရေးတပ်ဖွဲ့ (PSDA) တို့ တိုက်ပွဲဖြစ်ပွားပြီး စစ်ကောင်စီဘက်က (၃) ဦးထက် မနည်းသေဆုံးခဲ့ကြောင်း စုံစမ်းသိရှိရသည်။
အဆိုပါ တိုက်ပွဲသည် ပြီးခဲ့သည့် ဇွန် (၂၄) ရက်တွင် လားရှိုး – မူဆယ် ပြည်ထောင်စုလမ်းမကြီးဘေး တောင်ကုန်းတစ်ခုပေါ် မှ စစ်ကောင်စီ တပ်ဖွဲ့ တပ်မ (၉၉) လက်အောက်ခံ တပ်ရင်း ခမရ (၄၁၇) ၏ ကင်းကုံးဝပ်ပြီး စစ်ရေးလှုပ်ရှားမှု ပြုလုပ်နေချိန် တိုက်ပွဲဖြစ်ပွားခဲ့ကြောင်း (PSDA) က ထုတ်ပြန်ထားသည်။
သျှမ်းမြောက်ပြည်သူ့ကာကွယ်ရေးတပ်ဖွဲ့ (၁၁၁) တပ်ရင်း နှင့် (၂၂၂) တပ်ရင်း ပူးပေါင်းအဖွဲ့တို့နှင့် တိုက်ပွဲဖြစ်ပွားခဲ့ပြီး စစ်ကောင်စီမှ (၃) ဦး ထက်မနည်း ကျဆုံးခဲ့ပြီး ပြည်သူ့ကာကွယ်ရေးတပ်ဖွဲ့ဘက်မှ တစ်စုံတစ်ယောက် ထိခိုက်ဒဏ်ရာ ရရှိမှု မရှိခဲ့ပေ။
သျှမ်းပြည်မြောက်ပိုင်းသည် မူဆယ်ခရိုင်အတွင်း စစ်ကောင်စီ အပါအဝင်၊ တိုင်းရင်းသားလက်နက်ကိုင်များဖြစ်ကြသော TNLA၊ SSPP၊ KIA၊ MNDAA နှင့် မြောက်ပိုင်း ပြည်သူ့လုံခြုံရေး နှင့် ကာကွယ်ရေးတပ်ဖွဲ့ တို့ လှုပ်ရှားမှုရှိပြီး စစ်ကောင်စီနှင့်လည်း မကြာခဏ တိုက်ပွဲများ ဖြစ်ပွားလေ့ရှိသည်။
Leave a Comments