သျှမ်းပြည် အရှေ့ပိုင်း၊ ကျိုင်းတုံခရိုင် မိုင်းပျဥ်းမြို့ အနီးပတ်ဝန်းကျင်တွင် ယနေ့ (ဇွန် ၈)ရက် နံနက် ၉နာရီ ၅၆ မိနစ်တွင် ငလျင်တစ်ခု လှုပ်ခတ်သွားကြောင်း သတင်းသိရသည်။
ကျိုင်းတုံမြို့နယ်တွင်း လှုပ်ခတ်သွားသည့် မြေငလျင်သည် ပြင်းအား ရစ်ချ်တာစကေး ၅ ဒသမ ၀ အဆင့် အင်အားအသင့်အတင့်ရှိ မြေငလျင် ဖြစ်ကြောင်းလည်း မိုးလေဝသနှင့်ဇလဗေဒမှ သတင်းထုတ် ပြန်ထားသည်။
အဆိုပါ ငလျင်လှုပ်ခတ်မှုသည် ကျိုင်းတုံ မြေငလျင်စခန်းမှ အနောက်မြောက်ဘက် ၅၇ ခန့်ကွာဝေး သည့် မိုင်းပြင်းမြို့ရဲ့ အနောက်မြောက်ဘက် ၂၂ မိုင်ခန့်အကွာကို ဗဟိုပြုပြီး မြေငလျင်လှုပ်သွားကြောင်းလည်း သိရသည်။
“ ဟုတ်တယ်။ ငလျင်လှုပ်သွားတယ်။ အရမ်းမပြင်းဘူး။ ခဏလေးပဲ။ အိမ်တွေလည်း နည်းနည်းလှုပ်သွားတယ်” ဟု ကျိုင်းတုံ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
မြေငလျင် လှုပ်ခတ်မှုများကြောင့် ထိခိုက်ပျက်စီးမှုများရှိ/မရှိကို သျှမ်းသံတော်ဆင့်အနေဖြင့် အတည်ပြုချက် မရှိသေးပေ။
သျှမ်းရှေ့ တွင် မြေငလျင်မကြာခဏ လှုပ်ခတ်ကြောင်း၊ လွန်ခဲ့သည့် ၂၀၁၁ခုနစ် မတ်လတွင်လည်း သျှမ်းရှေ့ တာချီလိတ်မြို့နယ် တာလေ ဒေသတွင် ပြင်းအား ၆ ဒသမ ၈ ရစ်ချ်တာစကေး လှုပ်ခတ်ခဲ့ကြောင်းသိရသည်။
ထိုသျှမ်းရှေ့ တကြောတွင်လည်း ရွှေ သတ္တုတူးဖော်ခြင်းကို လုပ်ဆောင်နေသဖြင့် ဒေသခံများကလည်း စိုးရိမ်ပူပန်မှုများရှိနေကြောင်းသိရသည်။
Leave a Comments