သျှမ်းပြည်မြောက်ပိုင်း မူဆယ်မြို့တွင် ယခုရက်ပိုင်း လက်နက်ကြီး ပစ်ခတ်မှု ဆက်တိုက် ကြားနေရသဖြင့် ဒေသခံများက စိုးရိမ်ထိတ်လန့်နေကြောင်း စုံစမ်းသိရသည်။

ယခု ရက်သတ္တပတ်အတွင်း မူဆယ်မြို့နယ်တွင် ပစ်ခတ်မှုများ၊ အုပ်စုလိုက်လက်နက်ကိုင် လုယက်မှုများ နှင့် လက်နက်ကြီးသံများ အဆက်မပြတ်ကြားနေရမှုတို့ကြောင့် စိုးရိမ်ထိတ်လန့်စွာ နေထိုင်နေရကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

“ကျနော်တို့မူဆယ်မှာတော့ လက်နက်ကြီးလက်နက်ငယ်သံတွေ ရက်ဆက်တိုက် ကြားနေရတယ်၊ လုယက် ဓားပြတိုက်လုပ်တဲ့ အဖွဲ့ကလည်း လက်နက်တွေ ကိုယ်စီနဲ့၊ မနေ့ကလည်း အကြောင်းရင်းမသိတဲ့ လက်နက်ကြီး သံတွေလို ပေါက်ကွဲသံတွေက အချက် ၂၀ လောက် ဆက်တိုက်ကြားနေရတယ်၊ နေရတာမလုံခြုံသလို ခံစားရတယ်” ဟု ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

စစ်တပ်မှ နိုင်ငံတော်အာဏာသိမ်းပြီးနောက်ပိုင်း မူဆယ်မြို့နယ်အတွင်းတွင် ခိုးယူလုယက်မှုများနှင့် ပစ်ခတ်မှုများ ဆက်တိုက်ရှိလာကြောင်း ဒေသခံများက ပြောသည်။

ယမန်နေ့ (မေ ၁၈) ရက်တွင် အကြောင်းရင်းမသိပေါက်ကွဲသံ အချက် ၂၀ ကျော်ကြားရပြီး၊ ယခု ရက်သတ္တပတ် အတွင်း မူဆယ်မြို့တွင် နေအိမ်ထဲအထိ လက်နက်ကိုင်လူတစ်စုမှ ဓားပြတိုက်လုယက်မှု၊ စစ်ဝတ်စုံနှင့် လူတစ်စုမှ ရပ်ကွက်ထဲအထိ ပစ်ခတ်ဖောက်ခွဲမှု သုံးရက်ဆက်တိုက် ဖြစ်ပွားခဲ့ကြောင်း သိရသည်။

“ အခုအနေအထားတော့ အိမ်ပြင်ထွက်မှ သတိထားရမှာမဟုတ်တော့ဘူး၊ အိမ်ထဲနေရင်လည်း ဓားပြသူခိုးရန်တွေကို အစစအရာရာ သတိထားရတယ်၊ အပြင်ထွက်တဲ့အခါကျတော့ ပစ်ခတ်မှုတွေကြား ဓားစာခံဖြစ်သွားမှာလည်း ကြောက်ရတယ်၊ ဒီဘက်မှာ အဖွဲ့အစည်းတွေလည်းများတော့ ဘယ်သူဘယ်ဝါမှန်းလည်း သိကြတာ မဟုတ်ဘူး” ဟု စိုင်းဆိုင် (နာမည်လွဲ) က သျှမ်းသံတော်ဆင့်ကို ပြောသည်။

ယခုလို အဖြစ်အပျက်များ မကြာခဏ ဖြစ်ပွားနေပြီး ပြည်သူများ စိုးရိမ်ထိတ်လန့်နေသော်လည်း ဒေသတွင်းရှိ ပြည်သူ့စစ်အပါအဝင် မည်သည့်လက်နက်ကိုင်အဖွဲ့မှ တာဝန်ယူ ဖြေရှင်းပေးနိုင်ခြင်း မရှိကြောင်း ဒေသခံများက ပြောသည်။

“ကျနော်တို့ဒေသမှာ လက်နက်ကိုင်အဖွဲ့အစည်းတွေ၊ ပြည်သူ့စစ်တွေ၊ စစ်ကောင်စီတပ်ဖွဲ့တွေ အများကြီး ရှိနေပေမယ့်  ဘယ်အဖွဲ့အစည်းကမှ ပြည်သူကိုကာကွယ်ပေးနေတာ မရှိဘူး၊ ရဲဝတ်စုံနဲ့ဓားပြတိုက်မှုဖြစ်သွားတဲ့ မင်္ဂလာမူဆယ်ဘက်မှာဆို ပြည်သူ့စစ်တပ်ဖွဲ့တွေ အဲ့လောက်များတာ တရားခံကိုမမိဘူး၊ ဒါကထူးဆန်းတယ်” ဟု စိုင်းဆိုင် ကဆိုသည်။

ပြီးခဲ့သည့် မေလ ၁၆ ရက်နေ့ညတွင် အင်အားအယောက် ၂၀ ဖြင့် လာရောက်ပစ်ခတ်သွားသည့် မူဆယ်မြို့ စွမ်စော်ရပ်ကွက်မှ အမျိုးသားတစ်ဦးကလည်း လက်ရှိတွင် ရရှိသည့် ဒဏ်ရာများဖြင့် ဆေးရုံမှာ ဆေးကုသမှု ခံယူနေရသော်လည်း တရားခံများကို စုံစမ်းဖော်ထုတ်နိုင်ခြင်း မရှိကြောင်းသိရသည်။

မူဆယ်မြို့သည် မြန်မာ – တရုတ် နယ်စပ်ကုန်သွယ်ရေးမြို့ ဖြစ်ရာ မြန်မာနိုင်ငံမှ တိုင်းရင်းသားများ အပြင် တရုတ်နိုင်ငံသားများနှင့် တခြားဒေသမှ လူမျိုးပေါင်းစုံတို့လည်း စီးပွားရေးလာရောက်လုပ်ကိုင်ရာ ဖြစ်သည့်အတွက် လူမျိုးပေါင်းစုံ အဖွဲ့အစည်းပေါင်းစုံရှိသည့် မြို့ဖြစ်သည်။