သျှမ်းပြည်မြောက်ပိုင်း မူဆယ်မြို့နယ်မှ ကောင်းမူးတုံရပ်ကွက်ရှိ နေအိမ်တစ်အိမ်ကို ဖောက်ထွင်းဝင်ရောက်ပြီး မီးခံသေတ္တာနှင့် အိမ်တွင်းပစ္စည်းများကို ခိုးခံရသော်လည်း အိမ်ရှင်မှ ပြန်လည်ရရှိခဲ့ကြောင်း စုံစမ်းသိရသည်။

ယမန်နေ့ (မေလ ၁၅ )ရက် ည ၉ နာရီခန့်တွင် ကောင်းမူးတုံရပ်ကွက်ရှိ နေအိမ်တစ်အိမ်ထံသို့ ကားတစ်စီး နှင့် အမည်မသိ လက်နက်ကိုင် လူတစ်စုက ဖောက်ထွင်းဝင်ရောက်ပြီး မီးခံသေတ္တာနှင့် ဖုန်းနှစ်လုံး အပါအဝင် ပိုက်ဆံငါးသိန်းကျပ်ကိုလည်း ယူဆောင်ထွက်ပြေးသွားကြောင်း  ဖြစ်စဥ်များကို သိရှိသည့် ဒေသခံ အမျိုးသား တစ်ဦးက သျှမ်းသံတော်ဆင့်ကို ပြောသည်။

“အမျိုးသားလေးယောက်ပါ ကားတစ်စီးနဲ့ ရောက်လာကြတယ်၊ အိမ်ထဲက မီးခံသေတ္တာနဲ့ ဖုန်းနှစ်လုံးကို ယူသွားတယ်၊ ပြီးတော့ အိပ်ခန်းတစ်ခန်းထဲက ခေါင်းအုံးအောက်ကို ဝင်ရှာပြီး တွေ့တဲ့ မြန်မာငွေ ငါးသိန်းကျပ်ကိုလည်း ယူသွားတယ်၊ သူတို့က သေနတ်တွေလည်း ကိုင်ထားတယ်” ဟု အထက်ပါ အမျိုးသားက သျှမ်းသံတော်ဆင့်ကို ပြောသည်။

အဆိုပါ လက်နက်ကိုင် လူတစ်စုသည် ၄ ဦးရှိပြီး သက်လတ်ပိုင်း လူငယ်များဖြစ်ကြောင်း နှင့် ၎င်းတို့ ထွက်ပြေးစဥ် ပြည်သူများ ဝိုင်းဝန်းဖမ်းဆီးမှုကြောင့် win စီးကရက်စက်ရုံနားအရောက်တွင် ပါဂျရိုကားနှင့် တိုက်မိပြီး ဓားပြတိုက်သူတို့ စီးလာသည့်ကား ပျက်စီးကာ ၎င်းတို့က ထွက်ပြေးလွတ်မြောက်သွားကြောင်း သတင်းသိရသည်။

“သူတို့ထွက်ပြေးတော့ win စီးကရက်စက်ရုံနားအရောက်မှာ ရှေ့ကကားတစ်စီးနဲ့တိုက်မိပြီး သူတို့ကား ပျက်စီးသွားတယ်၊ ကား နဲ့ မီးခံသေတ္တာကိုထားပြီး သူတို့က ထွက်ပြေးသွားတယ်၊ သူတို့ကတော့ ထွက်ပြေးလွတ်မြောက်သွားတယ်၊ ပိုက်ဆံငါးသိန်းလည်းသူတို့နဲ့ အတူပါသွားတယ်။ မီးခံသေတ္တာကတော့ အိမ်ရှင် ပြန်ရတယ်” ဟု မူဆယ်မြို့ခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ယင်းဖြစ်စဥ်များနှင့် ပက်သက်ပြီး ဆုံးရှုံးမှုပမာဏနှင့် အသေးစိတ်ဖြစ်စဥ်များကို ဆက်လက်စုံစမ်းနေဆဲ ဖြစ်ကြောင်း နှင့် ထိခိုက်နစ်နာသူ မိသားစုများမှ အမှုဖွင့်တိုင်တန်းမှုများရှိမရှိကိုလည်း ဆက်လက် စုံစမ်းနေဆဲ ဖြစ်သည်။

ထို့အတူ ယမန်နေ့ (မေလ ၁၅) ရက် နေ့ခင်းပိုင်း ၁ နာရီဝန်းကျင်တွင်လည်း စယ်လန့်ကျေးရွာမှ မူဆယ်မြို့သို့ တက်ကာ ဆေးဝယ်ရန် ဆိုင်ကယ်တစ်စီးနှင့်ထွက်လာသည့် အသက် ၆၀ ဝန်းကျင်သက်ကြီးပိုင်း အမျိုးသားတစ်ဦးလည်း ဓားပြတိုက်လုယက်ခံရကြောင်း သျှမ်းသံတော်ဆင့်မှ စုံစမ်းသိရှိရသည်။

“ကျနော့်အဖေက ဆိုင်ကယ်တစ်စီးနဲ့ မူဆယ်ဘက်ကို ဆေးဝယ်ဖို့သွားခဲ့တာ စယ်လန့်နဲ့ မူဆယ်ကြားက ဆုတောင်းတောင် အနီးမှာ အမည်မသိ မျက်နှာဖုန်းနဲ့ လူနှစ်ဦးက တားပြီး လုယက်ဓားပြတိုက်တာခံရတယ်၊ အဖေက အသက်လည်းကြီးတော့ သူတို့ကို မလွန်ဆန်ရဲဘူး၊ ပိုက်ဆံ တစ်သိန်းနဲ့ KenBo 125 ဆိုင်ကယ် တစ်စီး ဆုံးရှုံးလိုက်ရတယ်” ဟု ဓားပြတိုက်ခံရသူ၏ သားဖြစ်သူက သျှမ်းသံတော်ဆင့်ကို ပြောသည်။

မူဆယ်မြို့နှင့် စယ်လန့်ကျေးရွာသည် ၆ မိုင်ခန့်ကွာဝေးပြီး လွိုင်ဆုတာင်း (ဆုတောင်းတောင်) အနီးပတ်ဝန်းကျင်သည် လူသွားလူလာပြတ်သည့်နေရာလည်းဖြစ်သည့်အတွက် လုယက်မှု၊ ဓားပြတိုက်မှုများ မကြာခဏ ဖြစ်ပွားလေ့ရှိကြောင်းလည်း ဒေသခံများက ပြောသည်။

မူဆယ်မြို့နှင့် အနီးပတ်ဝန်းကျင်သည် စစ်ကောင်စီတပ်ဖွဲ့အပြင် တိုင်းရင်းသားလက်နက်ကိုင်များ ပြည်သူ့စစ် တပ်ဖွဲ့ဝင်များ သွားလာလှုပ်ရှားနေလေ့ရှိသော်လည်း ပြည်သူများအနေဖြင့် လုံခြုံစိတ်ချရသည် မရှိဘူး စိုးရိမ်ကြောက်လန့်မှုများဖြင့် နေ့စဥ်ဘဝကို ဖြတ်သန်းနေရကြောင်း ဒေသခံများက ပြောဆိုကြသည်။

ထို့အပြင် စစ်တပ်မှ နိုင်ငံတော် အာဏာသိမ်းပြီးနောက်ပိုင်း ဒေသအသီးသီးတို့မှာလည်း တရားဥပဒေ စိုးမိုးမှု ကင်းမဲ့နေပြီး ရဲတပ်ဖွဲ့များက မတရားမှုကို စုံစမ်းဖော်ထုတ်ရေးထက် စစ်တပ်အာဏာသိမ်းမှု ဆန့်ကျင်သူများကို ဖမ်းဆီးရေးဘက် အားသာနေကြောင်း သတင်းသိရသည်။