သျှမ်းပြည်တောင်ပိုင်း ဖယ်ခုံဘက်မှ စစ်ရှောင်ပြည်သူများကို စစ်ဆေးရေးဂိတ်စောင့် PNA နှင့် စစ်ကောင်စီ တပ်သားများက စစ်ရှောင်ခွင့် မပေးဘဲ တားမြစ်ပိတ်ပင်နေကြောင်း စုံစမ်းသိရသည်။
သျှမ်းပြည်တောင်ပိုင်း ညောင်ရွှေမြို့နယ် လွယ်လုံကျေးရွာရှိ လွယ်တုံတောင်ခြေအနီး စစ်ဆေးရေးဂိတ်မှ စစ်ကောင်စီ စစ်သားနှင့် PNA တပ်သားများသည် စစ်ရှောင်ပြည်သူများကို တားမြစ်ခြင်းဖြစ်ကြောင်း သတင်း သိရသည်။
“မေ ၁၃ ရက် မွန်းလွဲပိုင်း ၃ နာရီလောက်ကနေ စပြီးတော့ ဂိတ်စောင့်တဲ့ စစ်သားတွေက ပြည်သူတွေကို ဒီနယ်ထဲ ကနေ အပြင်ထွက်ခွင့်မပေးတော့ဘူးတဲ့၊ ဆိုလိုချင်တာတော့ တခြားဒေသကိုလည်းစစ်ရှောင်သွားလို့ မရဘူးတဲ့၊ စစ်ရှောင်မဲ့ ပြည်သူတွေက အဲ့ဂိတ်နားမှာ အကြာကြီးစောင့်ကြပေမဲ့ သူတို့က ဂိတ်ကို ပေးမဖြတ်ဘူး” ဟု အဆိုပါ ဒေသမှ အမျိုးသားတစ်ဦးက သျှမ်းသံတော်ဆင့်ကို ပြောသည်။
စစ်ကောင်စီနှင့် ဒေသခံပြည်သူ့ကာကွယ်ရေး တပ်ဖွဲ့တို့ တိုက်ပွဲဖြစ်ပွားနေသည့် ဖယ်ခုံမြို့နယ် နှင့် ညောင်ရွှေမြို့ နယ်တို့မှ ပြည်သူဦးရေ ၁၀၀ ကျော်သည် ဘေးလွတ်ရာသို့ စစ်ဘေးရှောင်သွားလိုသော်လည်း စစ်ကောင်စီ တပ်သားနှင့် PNA တပ်သားတို့ တားမြစ်ပိတ်ပင်သည့် အတွက် နောက်ကြောင်း ပြန်လှည့်လာရကြောင်း သိရသည်။
အဆိုပါ လွယ်တုံတောင်ခြေမှ စစ်ဆေးရေးဂိတ်စောင့်စစ်သားများသည် စစ်ရှောင်သည့် ပြည်သူများကို နောက်ကြောင်း ပြန်လှည့်ခိုင်းသည့် အပြင် ပိုက်ဆံတောင်းယူမှုများ ရှိနေကြောင်း ကြုံတွေ့ရသည့် စစ်ရှောင်အမျိုးသား တစ်ဦးက သျှမ်းသံတော်ဆင့်ကိုပြောသည်။
“ကျနော်တို့ ထီရီကျေးရွာနဲ့ လွယ်ပေါင်းကျေးရွာဘက်မှာ တိုက်ပွဲဖြစ်တော့ ထွက်ပြေးကြတာပေါ့၊ ဒီလွယ်တုံ စစ်ဆေးရေး ဂိတ်ရောက်တော့ သူတို့(စစ်သားများ) စစ်ဆေးတာ ခံလိုက်ရတယ်၊ ကျနော်တို့က စစ်ရှောင်တွေပါ ပြောလည်း ဖြတ်လို့မရဘူးတဲ့၊ စစ်ရှောင်တွေ တင်လာတဲ့ကားတစ်စီးကို ၁၀၀၀၊ ၂၀၀၀ အဲ့လောက်တောင်းတာ၊ ပြီးတော့ နောက်ကြောင်းပြန်လှည့်ခိုင်းတယ်” ဟု အဆိုပါ စစ်ရှောင်အမျိုးသားက သျှမ်းသံတော်ဆင့်ကို ပြောသည်။
ပြီးခဲ့သည့် (မေ ၁၂)ရက် နံနက် အစောပိုင်းမှစတင်ကာ တိုက်ပွဲများ ပြန်လည်ပြင်းထန်လာသည့် ဖယ်ခုံမြို့နယ်အတွင်းတွင် စစ်ကောင်စီတပ်ဖွဲ့တို့မှ တိုက်လေယာဥ်ဖြင့် ဗုံးများပစ်ချနေသည့်အပြင် လက်နက်ကြီး လက်နက်ငယ်များဖြင့်လည်း ပစ်ခတ်နေသည့်အတွက် ရာနှင့်ချီသော ဒေသခံများ ထွက်ပြေးနေရကြောင်း စုံစမ်းသိရသည်။
Leave a Comments