မြန်မာ – တရုတ် နယ်စပ်ကုန်သွယ်ရေးတွင် တရုတ်ဘက်မှ ပြုလုပ်နေသည့် ကိုဗစ် စစ်ဆေးမှုများရှိနေရာ မြန်မာပြည်မှ တရုတ်ဘက်သို့ တင်ပို့သည့် သစ်သီးများတွင် ကိုဗစ်ပိုးတွေ့ရှိပါက မီးရှို့ဖျက်ဆီးပစ်မည်ဟု တရုတ်ဘက်မှ ခြိမ်းခြောက်ပြောဆိုထားကြောင်း စုံစမ်းသိရသည်။

ပြီးခဲ့သည့် ဧပြီလနှောင်းပိုင်းမှ စတင်ကာ တရုတ်တို့သည် မြန်မာပြည်၊ သျှမ်းပြည် နှင့် မြန်မာပြည် ထုတ်ကုန်နှင့် သစ်သီးများကို စတင်လက်ခံခဲ့ပြီး စစ်ဆေးမှုများလည်း ပြင်းထန်စွာ ပြုလုပ်ခဲ့ခြင်းဖြစ်သည်။

ထိုကိစ္စများနှင့် ပတ်သက်ပြီး တရုတ်ဘက်မှ ပြုလုပ်သည့် ကိုဗစ် စစ်ဆေးမှုများတွင် မြန်မာပြည်ဘက်မှ ကားသမား ဆေးစစ်ခ ၃၂၀ ယွမ်ပေးဆောင်ရကြောင်း မူဆယ်နှင့် တရုတ်ဘက်သို့ ကုန်ကား မောင်းနေသည့် သျှမ်းအမျိုးသားတစ်ဉီးက သျှမ်းသံတော်ဆင့်ကို ပြောသည်။

“တရုတ်ဘက်က ကျနော်တို့ဆီ သစ်သီးတွေ မယူခင် ဆေးစစ် ဆေးဖျန်းပါတယ်၊ အခုကတော့ သရက်သီးတွေ ပေါ့၊ သူတို့က အဲ့သရက်သီးတွေမှာ ဆေးတွေဖျန်းလိုက်လို့ အသီးတွေက မဲပြာသွားတယ်၊ အဲ့ဆေးဖိုးအတွက် လည်း ကျနော်တို့ ကားသမားတွေက ၃၂၀ ယွမ် ပေးဆောင်ရတယ်” ဟု ၎င်းအမျိုးသားက ပြောသည်။

ဆေးဖျန်းပြီးနောက် ကိုဗစ်ပိုးရှိ/မရှိလည်း ထပ်မံစစ်ဆေးပြီး ကိုဗစ်ပိုး စစ်ဆေးတွေ့ရှိပါက ကားတစ်စီးနှင့် အပြည့်တင်ထားသည့် သရက်သီးများလည်း မီးရှို့ဖျက်ဆီးခံရမည်ဟု တရုတ်ဘက်က ပြောဆိုထားကြောင်း မြန်မာပြည်မှ သရက်သီးကုန်သည်တစ်ဦးက ပြောသည်။

“သရက်သီးတွေကတော့ မြန်မာပြည် အလယ်ပိုင်းနဲ့ သျှမ်းပြည်က လာတယ်၊ အရင်တုန်းက ၁၆ ကီလိုရှိတဲ့ သရက်သေတ္တာကို ၁၄၀ ယွမ်၊ သေချာထုပ်ပိုးထားတဲ့ သရက်သီးဆိုရင် ၁၆၀ ယွမ်အထိ ဈေးရတယ်၊ ဒါပေမဲ့ လမ်းမှာ ကိုဗစ် စစ်ဆေးပြုလုပ် ရတဲ့အခါမှာတော့ တကယ်စိန်ခေါ်မှုပဲ၊သရက်သီး တစ်လုံးမှာ ပိုးတွေ့တာနဲ့ တစ်ကားလုံးက အသီးတွေလည်း မီးရှို့ခံရမယ်လေ” ဟု ကားသမားက ပြောသည်။

လက်ရှိအချိန်တွင် သရက်သီးဈေးနှုန်း/ဈေးကွက် ကောင်းနေသော်လည်း မိုးဦးကာလအတွင်းကျလာသည့် လေပြင်းမုန်တိုင်းနှင့် မိုးသီးများကြောင့် သရက်သီးများ ကြွေကျပျက်စီးရကြောင်းလည်း သျှမ်းပြည်ထဲမှ သရက်သီး ခြံလုပ်ငန်းရှင်များက ညည်းတွားပြောဆိုနေကြသည်။

ယခင် နိုင်ငံရေးကောင်းစဥ်ကာလတွင် မြန်မာ-တရုတ်နယ်စပ်ကုန်သွယ်ရေးမှ မြန်မာပြည်မှ သရက်သီးများကို တရုတ်ကုန်သည်များက တရက်လျှင် ၁၀၀ တန်ထက် မနည်း ဝယ်ယူခဲ့ကြသော်လည်း လက်ရှိမှာတော့ တရက်လျှင် ၅၀ တန်ဝန်းကျင်ခန့်သာ ဝယ်ယူနေကြောင်းလည်း သိရသည်။