သျှမ်းပြည်တောင်ပိုင်း ရွာငံမြို့နယ်အတွင်း ဖေဖော်ဝါရီ မှ ဧပြီလအထိ စစ်ကောင်စီမှ ပြည်သူ ၁၀ ဦးကို ရက်စက်စွာ သတ်ဖြတ်ခဲ့ကြောင်း ရှမ်းလူ့အခွင့်အရေးမဏ္ဍိုင် SHRF က ထုတ်ပြန်ခဲ့သည်။
ရွာငံမြို့နယ်တွင် စစ်ကောင်စီမှ ပြည်သူ (၁၀) ဦးကိုသတ်ဖြတ်ခဲ့ကြောင်း၊ နေအိမ် (၁၃) လုံးကို မီးရှို့ဖျက်ဆီးပြီး၊ ဒေသခံ ပြည်သူ (၂၅) ဦးကို ဖမ်းဆီးထားကြောင်း SHRF က ယနေ့ (မေ ၁၁) ရက်စွဲဖြင့် ထုတ်ပြန်ခဲ့သည်။
“ ကျနော်တို့ ဒီစာကိုထုတ်ပြန်ရတဲ့ အကြောင်းရင်းက ဒီစစ်အာဏာသိမ်းတစ်နှစ်ကြာ ပြီးနောက်ပြည်သူတွေ အပေါ်လုပ်ရပ်က လူ့အခွင့်ရေးတွေကိုပဲ ချိုးဖောက်နေတာမဟုတ်ဘူး။ သူက အကြမ်းဖက်မှုတွေ ဆက်တိုက်ဖြစ်နေတယ်။ ပြည်သူတွေ ကို ကာကွယ်ရမဲ့ အစား အခုက ပြည်သူ့ရန်သူကြီးဖြစ်နေတာ၊ ဒီလုပ်ရပ်ကို ကျနော်တို့ ကန့်ကွက်ပါတယ်။ ဒါကြောင့် စာကိုထုတ်ပြန်ရတာပါ” ဟု ရှမ်းလူ့အခွင့်အရေးမဏ္ဍိုင် SHRF စိုင်းဟော်ရှဲန်က ပြောပါသည်။
ထိုအပြင် လွန်ခဲ့သည့် ဖေဖော်ဝါရီ ၁၅ ရက်နေ့က ကရင်နီပြည်နယ်မှ အလုပ်သွားလုပ်ပြီး ပြန်လာသည့် မောင်ဇင်မင်းခိုင် (၂၁) နှစ်ကို ရွာငံမြို့နယ် နဘန်းကြီးကျေးရွာ လမ်းတဝက်တွင် စစ်ကောင်စီက သေနတ်ဖြင့် ပစ်သတ်ခဲ့ကြောင်း သိရသည်။
ပစ်ခတ်ပြီးနောက် မောင်ဇင်မင်းခိုင် ရုပ်အလောင်းကို ကလောဆေးရုံသို့ယူဆောင်သွားပြီး ၎င်း၏မိသားစုဝင်ကို အကြောင်းမကြားပဲ သဂြိုလ်ခဲ့သည်။
အဆိုပါ စစ်ကောင်စီ၏ အကြမ်းဖက်မှုကြောင့် ရွာငံမြို့နယ် နဘန်းကြီး ၊ လွှစင်၊ လယ်ကိုင်း နှင့် ပဲရင်းတောင်ကျေးရွာ များမှ ဒေသခံ ပြည်သူ ၈၀၀ ကျော်သည် နေအိမ်များကို စွန့်ခွာကာ ကျေးရွာအနီးရှိ တောတောင်များအတွင်း ရှောင်တိမ်း နေထိုင်ရကြောင်း သိရသည်။
မတ်လအတွင်းတွင် စစ်ကောင်စီက ပြည်သူ (၃) ဦးကို ဖမ်းဆီးခဲ့ပြီး နေအိမ် (၅) လုံးကို ပစ္စည်းဝင်လုပြီး ဖျက်ဆီးခဲ့ကြောင်း၊ ဧပြီလအတွင်းတွင် ပြည်သူ (၇) ဦးကို ဖမ်းဆီးခဲ့ပြီး နေအိမ် (၈) လုံးကို မီးရှို့ဖျက်ဆီးခဲ့ကြောင်း ထုတ်ပြန်ချက်တွင် ရေးသား ထားသည်။
Leave a Comments