သျှမ်းပြည်မြောက်ပိုင်း မုံးကိုးမြို့နယ်တွင် တိုက်ပွဲများ ငြိမ်သက်နေသော်လည်း ထွက်ပြေးတိမ်းရှောင်နေရသည့် ကျေးရွာ ၃ ရွာမှ ဒေသခံများသည် နေရပ်မပြန်နိုင်သေးကြောင်း စုံစမ်းသိရသည်။

မုံးကိုးမြို့နယ်ရှိ နမ့်ဟကျေးရွာ၊ နမ့်ယန်းကျေးရွာ နှင့် ကောင်းလုံကျေးရွာတို့မှ ပြည်သူများသည် တိုက်ပွဲများ ပြင်းထန်စဥ် ကာလတွင် ရွာတွင်းမှရှောင်တိမ်းရန် ကိုးကန့်တပ်မတော် MNDAA မှ ညွှန်ကြားခြင်း ဖြစ်ပြီး လက်ရှိ တိုက်ပွဲငြိမ်သက်သော်လည်း ရွာပြန်ရန် ခွင့်မပြုသေးကြောင်း အမည်မဖော်လိုသည့် နမ့်ဟဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ကျနော်တို့ရွာမှာ တိုက်ပွဲဖြစ်တော့ ကိုးကန့်တပ်ဖွဲ့တွေက ကျနော်တို့ကို ရှောင်တိမ်းဖို့ ပြောလို့ ကျနော်တို့လည်း မုံးကိုးမြို့ပေါ်ကို ရှောင်လာပါတယ်၊ အခု သေနတ်သံမကြား တိုက်ပွဲမဖြစ်တာကြာပေမဲ့ ကျနော်တို့ ရွာထဲပြန်နေဖို့ ကိုးကန့်တပ်က ခွင့်မပြုသေးဘူး” ဟု အထက်ပါ အမျိုးသားက ပြောသည်။

ပြီးခဲ့သည့် ၂၀၂၁ ခုနှစ်နှောင်းပိုင်းမှ စတင်ကာ မုံးကိုးမြို့နယ်အတွင်း တိုက်ပွဲများပြင်းထန်ခဲ့သည့် MNDAA နှင့် စစ်ကောင်စီတပ်ဖွဲ့တို့သည် မတ်လကတည်းမှ တိုက်ပွဲများနည်းပါးလာပြီး လက်ရှိတွင် တိုက်ပွဲပစ်ခတ်သံများ မကြားရသော်လည်း နှစ်ဘက်တပ်ဖွဲ့က နီးကပ်စွာ စခန်းနေရာယူထားကြောင်း သိရသည်။

ထို့အပြင် လက်ရှိမှာ မုံးကိုးမြို့ပေါ်သို့ ထွက်ပြေးတိမ်းရှောင်နေရသည့် စစ်ဘေးရှောင်ပြည်သူများကို ကူညီထောက်ပံ့ ပေးသည့် အလှူရှင်များလည်း တဖြည်းဖြည်းနည်းပါးလာသည့်အတွက် စစ်ရှောင်များ ကြံခုတ်နေ့စား လုပ်နေရကြောင်း သိရသည်။

“သူတို့လည်း စစ်ရှောင်လာတာကြာပြီဆိုတော့ အလှူရှင်တွေလည်း တဖြည်းဖြည်းနည်းလာပါတယ်၊ အခုကာလ မှာတော့ သူတို့က ကြံခုတ်နေ့စားလိုက်ပြီး သူတို့စားဝတ်နေရေးကို ဖြေရှင်းနိုင်သေးတယ်၊ ရွာတွေလည်း ပြန်လို့ မရသေးတော့ သူတို့က ခက်ခဲနေမှာအမှန်ပဲ” ဟု စစ်ရှောင်များကို ကူညီထောက်ပံ့ပေးနေသူ အမျိုးသားတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် ဖေဖော်ဝါရီလ နှောင်းပိုင်းအထိ စစ်ကောင်စီတပ်ဖွဲ့မှ တိုက်လေယာဥ်အပါအဝင် လက်နက်ကြီး လက်နက်ငယ်များ အသုံးပြုကာ MNDAA တပ်ဖွဲ့ထံ ထိုးစစ်ဆင် တိုက်ခိုက်ခဲ့သည့် မုံးကိုးမြို့နယ်အတွင်းတွင် စစ်ရှောင် ၇၀၀ ကျော်က လက်ရှိ အချိန်ထိ အကူအညီများလိုအပ်နေကြောင်း သတင်းသိရသည်။