Friday, December 2, 2022

အသိတရားနဲ့ သတိအမြဲထားသင့်တဲ့ စကစ ငြိမ်းချမ်းရေး

Must read

ဧပြီလ ၂၂ ရက်နေ့တုန်းက အာဏာသိမ်း စစ်ကောင်စီ ခေါင်းဆောင် ဗိုလ်ချုပ်မှူးကြီးမင်းအောင်လှိုင် က ငြိမ်းချမ်းရေးတွေ့ဆုံဆွေးနွေးဖို့ သက်ဆိုင်တဲ့ တိုင်းရင်းသားလက်နက်ကိုင်တော်လှန်ရေး ခေါင်းဆောင်တွေ မေလ ၉ ရက်နေ့ နောက်ဆုံးထားပြီး စာရင်းပေးပို့ဖို့ ရုပ်မြင်သံကြားကနေ အသိပေး ဖိတ်ကြားလိုက်ပါတယ်။

အယ်ဒီတာ့ အာဘော်

မေလ ၉ ရက်နေ့မှာတော့ အာဏာသိမ်း စစ်ကောင်စီ ပြောခွင့်ရ ဗိုလ်ချုပ်ဇော်မင်းထွန်းက ငြိမ်းချမ်းရေး တွေ့ ဆုံ ဆွေးနွေးဖို့ တက်ရောက်မယ့် တိုင်းရင်းသားလက်နက်ကိုင်တော်လှန်ရေးတပ်ဖွဲ့တွေရဲ့ အမည်စာရင်းကို သတင်းမီဒီယာမေးမြန်းချက်တွေ မှာ ထုတ်ဖေါ်ပြော ကြားပါတယ်။

လက်ရှိ တိုင်းပြည်အနေအထားအရလဲ ငြိမ်းချမ်းရေးဆွေးနွေးပွဲက အမြန်ဆုံး လုပ်သင့်လုပ်ထိုက်ပါတယ်။

ငြိမ်းချမ်းရေးဆွေးနွေးပွဲလုပ်ရာမှာလဲ စစ်မှန်တဲ့ ငြိမ်းချမ်းရေးဆွေးနွေးပွဲဖြစ်ဖို့လိုပါတယ်။ ၂၀၁၁ ခုနှစ် သြဂုတ်လ ၁၈ ရက်နေ့ တုန်းက နိုင်ငံတော် သမ္မတ ဉီးသိန်းစိန်က ငြိမ်းချမ်းရေးကမ်းလှမ်းတာကို အားလုံးက ကြိုဆိုကြတယ်။ လက်တွေ့လုပ်ဆောင်ရာမှာတော့ ဟိုအဖွဲ့ကိုချန် ဒီအဖွဲ့ကိုချန်ထားလို့ သျှမ်းပြည်မြောက် ပိုင်းက မကြုံခဲ့ဖူးတဲ့ သမိုင်းဝင် စစ်မီးတွေ အခုထက်ထိ ကူးစက်လောင်ကျွမ်းနေပါတယ်။

ဒါ့ကြောင့် လက်ရှိ အာဏာသိမ်း စစ်ကောင်စီ ခေါင်းဆောင် ဗိုလ်ချုပ်မှူးကြီးမင်းအောင်လှိုင် ဉီးဆောင်လုပ် မယ့် ငြိမ်းချမ်းရေးက စစ်မှန်တဲ့ငြိမ်းချမ်းရေးဖြစ်နိုင်ပါ့မလား ဆိုတာစဉ်းစားစရာပါ။ ပထမတစ်ချက်တိုင်းပြည် အာဏာကို အင်အားသုံးပြီး ဗိုလ်ချုပ်မှူးကြီးမင်းအောင်လှိုင်က ထိန်းချုပ်ထားတယ်။ ဒုတိယ တစ်ချက်က အာဏာသိမ်းမှုကြောင့် ပြည်ထောင်စုတစ်ဝှမ်းလုံး ဆူပူအုံကြွ ၊ ဒေသခံ လူထုကာကွယ်ရေးတပ် PDF တွေ ပေါ်ပေါက်လာတယ်။ လူထု ဒီမိုကရေစီ တိုင်းပြည်အာဏာ ပြန်ရဖို့ အမျိုးသား ညီညွတ်ရေးအစိုးရ NUG ရှိလာတယ်။ 

ဒါပေမယ့် NUG နဲ့ PDF ကို စစ်ကောင်စီက ဖိတ်ခေါ် ဆွေးနွေးမှာမဟုတ်ပဲ အကြမ်းဖက်အဖွဲ့အစည်းအဖြစ် သတ်မှတ်ထားပြီး အပြတ်ချေမှုန်းရေး ဆက်လုပ်သွားမယ်လို့ ကြွေးကြော်ထားပါတယ်။

ဒါ့ကြောင့် စစ်ကောင်စီ ခေါင်းဆောင်ကြီးကနေ ဉီးဆောင်ကျင်းပမဲ့ ငြိမ်းချမ်းရေးဆွေးနွေးပွဲ က စစ်မှန်တဲ့ ငြိမ်းချမ်းရေး ဆွေးပွဲဖြစ်ဖို့ သံသယ ဝင်နေကြတာလဲ မထူးဆန်းပါဘူး။

အခု စစ်ကောင်စီ ခေါ်တဲ့ ငြိမ်းချမ်းရေးမှာပါဝင်ဖို့ ဆုံးဖြတ်ထားတဲ့ တိုင်းရင်းသားတွေက စစ်ကောင်စီ ထံက ဘာတွေမျှော်လင့်နေလဲ၊ စစ်ကောင်စီကကော ဘာတွေ ပေးနိုင်မလဲ။ NUG နဲ့ PDF ကို အမြတ်ပြတ်ချေမှုန်းဖို့ တိုင်းရင်းသားလက်နက်ကိုင်တပ်ဖွဲ့တွေကို ခေါ်ယူကျောသပ် ထားတဲ့ အနေအထားပဲလား။  

တိုင်းရင်းသားလက်နက်ကိုင်တော်လှန်ရေးတပ်ဖွဲ့နဲ့ ပတ်သက်ပြီး ၂၀၂၀ သြဂုတ်လ ၁၉ ကနေ ၂၄ ရက်နေ့ အထိ ကျင်းပ တဲ့ ပြည်ထောင်စုငြိမ်းချမ်းရေးညီလာခံ (၂၁)ရာစု ပင်လုံ ညီလာခံ အဖွင့် ( သြဂုတ်လ ၁၉ ရက် ၂၀၂၀) မိန့်ခွန်းမှာ ဗိုလ်ချုပ်မှူးကြီး မင်းအောင်လှိုင်က အခုလိုပြောထားပါတယ်။

“တိုင်းရင်းသား လက်နက်ကိုင်တွေဟာ နိုင်ငံတော်ကို ဆန့်ကျင်နေတာဖြစ်ပါတယ်။ တက်လာတဲ့ အစိုးရတွေ ကို ဆန့်ကျင်နေတာဖြစ်ပါတယ်။ ဒါကြောင်ႉ နိုင်ငံတော်နဲ့ အစိုးရတိုင်းကို တပ်မတော်က ကာကွယ်နေပေး တယ်ဆိုတာ ဖြစ်စဉ်ဖြစ်ရပ်များ အပေါ် ဓမ္မဓိဋ္ဌာန်ကျကျ လေ့လာကြည့်ရင် တွေ့နိုင်ပါတယ်”

ဒီ စကားကို အောင့်မေ့ပြီး စစ်ကောင်စီ ကမ်းလှမ်းတဲ့ ငြိမ်းချမ်းရေး မှာ အသိတရား နဲ့ သတိအမြဲထား ဖို့ လိုပါတယ်။ လူထုလိုလားတဲ့ ဖက်ဒရယ်ဒီမိုကရေစီပြည်ထောင်စု အမြန်ပေါ်ပေါက်ပါစေ။

အယ်ဒီတာ့အာဘော်

သျှမ်းသံတော်ဆင့်

Leave a Comments

- Advertisement -spot_img

Latest article