သျှမ်းပြည်မြောက်ပိုင်း ကျောက်မဲမြို့နယ် ပန်လင်ကျေးရွာအတွင်းတွင် နေထိုင်သည့် ကလေးငယ်နှစ်ဦးသည် မြေမြုပ်မိုင်းနင်းမိပြီး ဆေးကုသရန်အတွက် အခက်အခဲရှိနေကြောင်း စုံစမ်းသိရသည်။

ပြီးခဲ့သည့် မေလ ၅ ရက် မွန်းလွဲပိုင်းအချိန်တွင် ကျေးရွာ နှင့် တစ်မိုင်ခန့်ကွာဝေးသည့် ယာတောဘက် မြင်းသွားရှာသည့် ပန်လင်ကျေးရွာမှ ကလေးငယ်နှစ်ဦးသည် မြေမြုပ်မိုင်းနင်းမိပြီး ပြင်းထန်စွာ ဒဏ်ရာရရှိသွား ကြောင်း သတင်းသိရသည်။

“တစ်ယောက်က ၇ နှစ်၊ တစ်ယောက်က ၉ နှစ် ကလေးငယ်နှစ်ယောက်ပါ၊ သူတို့မြင်းပျောက်လို့ သွားရှာတာတဲ့၊ မြေမြုပ်မိုင်းနင်းမိပြီးတော့ နှစ်ယောက်လုံးက ဒဏ်ရာတော်တော်များများသွားတယ်၊ တစ်ယောက်က ဒဏ်ရာ စိုးရိမ်ရတဲ့ အခြေအနေပေါ့၊ အဲ့ကြောင့် လူမှုကူညီရေးအသင်းတွေကို ဖုန်းဆက်အကူညီတောင်းခဲ့ရတယ်” ဟု ပန်လင်ကျေးရွာမှ အမည်မဖော်လိုသူ တာဝန်ရှိသူတစ်ဦးက ပြောသည်။

အဆိုပါ မြေမြုပ်မိုင်းနင်းမိသည့် ကလေးငယ်နှစ်ဦးကို အိုမ်တမာ၀် လူမှုကူညီရေးအသင်းမှ သွားရောက် သယ်ဆောင်ခဲ့ခြင်းဖြစ်ပြီး ကျောက်မဲမြို့နယ်မှ တစ်ဆင့် လားရှိုးမြို့ ပြည်သူ့ဆေးရုံသို့ ပို့ဆောင်ခဲ့ရကြောင်း သတင်းသိရသည်။

ဒဏ်ရာရ ကလေးငယ်နှစ်ဦးသည် ကျေးလက်နေပြည်သူများဖြစ်သည့်အပြင် လက်လုပ်လက်စားမိသားစုဝင်များ လည်းဖြစ်သည့်အတွက် ဆေးကုသမှု ခံယူရန်လည်း အခက်အခဲများရှိနေကြောင်း အိုမ်တမာ၀် လူမှုကူညီရေး အသင်းမှ တာဝန်ရှိသူတစ်ဦးက သျှမ်းသံတော်ဆင့်ကိုပြောသည်။

“သူတို့မိဘတွေလည်း လက်လုပ်လက်စားတွေပဲဆိုတာ့ ဒီကလေးငယ်တွေအတွက် ဆေးကုသမှုစားရိတ် အခက် အခဲတွေရှိနေပါတယ်၊ တစ်ရွာလုံးလိုလိုကလည်း လက်ဖက်ခြံနဲ့ ယာတောတွေ လုပ်တာပဲရှိတယ်ဆိုတော့ ချေးဖို့ ငှားဖို့က မလွယ်ဘူး၊ အလှူရှင်တွေ ရှိလာရင်ကောင်းတယ်” ဟု အိုမ်တမာ၀် လူမှုကူညီရေးအသင်းက သျှမ်းသံတော်ဆင့် ကိုပြောသည်။

ပြီးခဲ့သည့် ၂၀၂၀ ခုနှစ်နှောင်းပိုင်းမှ စတင်ကာ ကျောက်မဲမြို့နယ်အတွင်း နှင့် သီပေါမြို့နယ်အတွင်းတွင် တိုင်းရင်းသားလက်နက်ကိုင်တပ်ဖွဲ့တို့အကြား တိုက်ပွဲဖြစ်ပွားခဲ့ပြီးနောက်ပိုင်း မြေမြုပ်မှိုင်းများကြောင့်ဒဏ်ရာရရှိသူ (၁၁) ဦးရှိခဲ့ပြီး ၃ ဦး သေဆုံးခဲ့ကြောင်းသိရသည်။

ထို့ကြောင့် လက်နက်ကိုင်တပ်ဖွဲ့များ အနေဖြင့် မြေပြင်တိုက်ပွဲများ ပြီးဆုံးသွားပါက တပ်ဆင်ထားသည့် မြေမြုပ်မိုင်းများ ပြန်လည်ဖြုတ်ပေးရန် နှင့် အဓိက ပြည်သူများ သွားလာလှုပ်ရှားမှုရှိသည့် နေရာများတွင် မြေမြုပ်မှိုင်းများ မထားရှိရန် ဒေသခံပြည်သူများက တောင်းဆိုနေကြောင်း သတင်းသိရသည်။