ကောက်ရသည့် လက်ပစ်ဗုံးပေါက်ကွဲ ကလေးငယ်တစ်ဦးသေဆုံး အမျိုးသမီးငယ်တစ်ဦး လက်ဖြတ်ခံရ

0

သျှမ်းပြည်တောင်ပိုင်း ဟိုပုံးမြို့နယ် မိုင်းပျဥ်းအတွင်း ကလေးငယ်များသည် ကောက်ရသည့် လက်ပစ်ဗုံးတလုံးကို ဆော့နေချိန် ပေါက်ကွဲမှု ဖြစ်ပွားသဖြင့် အသက် ၇ နှစ်အရွယ် ကလေးငယ်တစ်ဦး သေဆုံးကာ အမျိုးသမီးငယ် တစ်ဦးလည်း ညာဘက်လက် ဖြတ်လိုက်ရကြောင်း စုံစမ်းသိရသည်။

ပြီးခဲ့သည့် ဧပြီလ ၂၆ ရက် နေ့လည်ပိုင်းတွင် ဟိုပုံးမြို့နယ် မိုင်းပျဥ်းဒေသ ရေသပြေကျေးရွာမှ ကွန်ကုန်းကျေးရွာ သို့ ပြောင်းခြံလာလုပ်ကြသည့် မိဘများ နှင့် အတူလိုက်ပါလာသည့် ကလေးငယ်များသည် လက်ပစ်ဗုံးကောက်ပြီး ဆော့ကစားရာမှ ပေါက်ကွဲမှုဖြစ်ပွားကာ ကလေးငယ် တစ်ဦးသေ၊ ၄ ဦးဒဏ်ရာရရှိခဲ့ ကြောင်း ဒေသခံများထံမှ သိရသည်။

“ကလေးတွေက လမ်းဘေးမြောင်းထဲမှာ ဆော့နေရင်း နဲ့ ဗုံးကိုတွေ့မိတာ၊ အရုပ်တွေလို့ထင်ပြီး ခြံစောင့် တဲဆီယူလာဆော့လိုက်တာ ဗုံးပေါက်ကွဲတော့ ကလေးတစ်ယောက်ပွဲချင်းပြီးသေတယ်၊ အတူဆော့တဲ့ တခြား ကလေး ၃ ဦးလည်း ဒဏ်ရာရတယ်၊ အဲ့တဲ ထဲရှိနေတဲ့ အသက် ၁၆ နှစ်အရွယ် အမျိုးသမီးငယ်လည်း ဒဏ်ရာရသွားတယ်” ဟု ယင်းဒေသမှ ရပ်ကျေးအုပ်ချုပ်ရေးမှူးက သျှမ်းသံတော်ဆင့်ကို ပြောသည်။

ပေါက်ကွဲသည့် လက်ပစ်ဗုံး

ထိုပေါက်ကွဲမှုကြောင့် အသက် ၇ နှစ်အရွယ်ရှိ ဦးအိုက်ထွေ့၊ ဒေါ်အေးခင်းတို့၏ သားဖြစ်သူ ပွဲချင်းပြီး သေဆုံးသွားကာ အတူဆော့ ကစားနေသည့် အသက်မတိမ်းမယိမ်း ကလေးငယ် ၃ ဦးနှင့် တဲပေါ်မှ အမျိုးသမီးငယ်တစ်ဦး ထိခိုက်ဒဏ်ရာ ပြင်းထန်စွာ ရရှိသွားကြောင်း သိရသည်။

အဆိုပါ ဒဏ်ရာရသူများကို တောင်ကြီးမြို့ စဝ်စံထွန်းဆေးရုံသို့ ပို့ဆောင်ကုသထားပြီး အသက် ၁၇ နှစ်ဝန်းကျင်ရှိ ၁၀ တန်းဖြေဆိုပြီးသူ အမျိုးသမီးငယ်က ရရှိထားသည့် ဗုံးဒဏ်ရာများဖြင့် ညာဘက်လက် ဖြတ်ပစ်လိုက်ရကြောင်းလည်း ရပ်ကျေးအုပ်ချုပ်ရေးမှူးက သျှမ်းသံတောဆင့်ကို ပြော သည်။

“သေသွားတဲ့ ကလေးငယ်ကိုတော့ ဒီနေ့မှာပဲ မြေချလိုက်ပါပြီ၊ ဒဏ်ရာရထားတဲ့ကလေးငယ်တွေက အကြီး ဆုံးဖြစ်တဲ့ ကလေးမကတော့ လက်ဖြတ်လိုက်ရတယ်၊ သူ့လက်ကို ထိထားတာများလို့ဆိုပဲ၊ ဒီမိသားစု တွေကလည်း ပြောရရင် သူတို့ခက်ခဲနေပါတယ်၊ ဆေးကုသစရိတ်တွေ ကူညီလို့ရနိုင်ရင် ကူညီပေးချင်ပါတယ်” ဟု ၎င်းက ပြောသည်။

ဗုံးပေါက်ကွဲမှုကြောင့် ထိခိုက်ထားသည့် ဒဏ်ရာများဖြင့် စဝ်စံထွန်းဆေးရုံတွင် ဆေးကုသမှုခံယူနေသော ကလေးငယ်များ၏ မိဘများကလည်း သာမာန်အလုပ်သမားများဖြစ်နေကြရာ ဆေးကုသမှု စားရိတ် အတွက် ခက်ခဲနေကြောင်း သိရသည်။

ဗုံးပေါက်ကွဲမှု ဖြစ်ပွားခဲ့သည့် မိုင်းပျဥ်းဒေသအတွင်းတွင် ပအိုဝ့်တိုင်းရင်းသားလက်နက်ကိုင်များ၊ စစ်ကောင်စီ လက်အောက်ခံပြည်သူ့စစ်များနှင့် သျှမ်းလက်နက်ကိုင်တပ်ဖွဲ့များ သွားလာလှုပ်ရှားလေ့ရှိ ကြောင်းနှင့် ယခု ဗုံးပေါက်ကွဲမှုသည် ယင်းဒေသမှ ပထမဆုံးအကြိမ်ဖြစ်ကြောင်း ဒေသံများက ပြောသည်။

Leave a Comments