သျှမ်းပြည်တောင်ပိုင်း ဟိုပုံးမြို့နယ်တွင် ယမန့်နေ့ ဧပြီ ၂၇ ရက် သျှမ်းပြည်ဝန်ကြီးချုပ် နှင့် လူမှုဝန်ကြီး လာချိန်တွင် ပြည်သူများက မြက်နုတ်၊ အမှိုက်လာကောက်ပြရကြောင်း စုံစမ်းသိရသည်။
ယမန်နေ့က စစ်ကောင်စီခန့် သျှမ်းပြည်ဝန်ကြီးချုပ်တို့သည် ဟိုပုံးမြို့ကို မနက် (၉) နာရီအချိန်တွင်လာကြပြီး သီရိမင်္ဂလာလမ်းတွင် နေထိုင်သည့် ပြည်သူများက ထိုနေရာအနီးတစ်ဝိုက်တွင် မဖြစ်မနေ သွားရောက်အမှိုက်ကောက်၊ မြက်နုတ်၊ သန့်ရှင်းရေး သွားလုပ်ပြရကြောင်း သိရသည်။
ထိုထဲတွင် ဌာနဆိုင်ရာ အထွေထွေအုပ်ချုပ်ရေးမှူး ဝန်ထမ်းများလည်း လိုက်ရကြောင်းသိရသည်။
“ ဌာနဆိုင်ရာတွေ ထွေအုပ်ရုံးက လူတွေလာကြရတယ်။ ပြည်သူတွေလည်း လာရတယ်။ အဲသီရိမင်္ဂလာလမ်းမှာ နေတဲ့သူတွေ အကုန်လာရတာ။ မဖြစ်မနေသွားရတယ်။ အမှိုက်ကောက်၊ မြက်နုတ် ၊ သန့်ရှင်းရေးတွေ သွားလုပ်ရတာ။ ဘုရားကြီးရှေ့ကနေ ဈေးထိ အဲနားတစ်ဝိုက် အကုန်သွားကြရတာ” ဟု ဟိုပုံးမြို့ ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။
ထိုအပြင် စစ်ကောင်စီခန့် ဝန်ကြီးချုပ် လာချိန်တွင် လုံခြုံရေး အင်အားအပြည့်ဖြင့် တင်းကြပ်ထားကြောင်းသိရသည်။
“ စစ်ကား (၅) စီးရှိတယ်။ လုံခြုံရေးကတော့ အတင်းကြပ်ထားထားတာ။ လက်နက်အပြည့်စုံနဲ့ပဲ စောင့်ကြည့်နေတာ။ မိုင်းရှင်းတဲ့ ကားတွေပါ ယူလာကြတာ” ဟု အထက်ပါ အမျိုးသားက ပြောသည်။
အမှိုက်ကောက်ခြင်း၊ မြက်ရိတ်ခိုင်းခြင်းသည် စစ်အုပ်ချုပ်မှု လက်အောက်တွင် လုပ်နေကြ နည်းလမ်းတရပ်ဖြစ်ကြောင်း၊ ယခုလည်း ဟန်ပြအဖြစ်သာ ပြည်သူများကိုခေါ်ပြီး ဒုက္ခပေး နေကြောင်းလည်း ဟိုပုံးမြို့နေ အမည်မဖော်လိုသည့် လူငယ်တစ်ဦးက ပြောသည်။
“ အခုက အရင်ခေတ်ကို ပြန်ရောက်သွားတဲ့သဘောပဲ။ လူကြီးတွေ လာရင် ပြည်သူတွေက နေပူပူ မိုးရွာရွာ သန့်ရှင်းလုပ်ရမယ်။ မလုပ်ရင် ဒဏ်ရိုက်မယ်။ အဲ့လိုခေတ်ကို ပြန်မရောက်ချင်လို့ ကျနော်တို့တွေ စစ်အာဏာရှင်ကို အမြစ်ဖြတ်ရမယ်။ တော်လှန်ရမယ်” ဟု ၎င်းလူငယ်က ဆိုသည်။
ဟိုပုံးမြို့နယ်သည် စစ်ကောင်စီ အာဏာသိမ်းပြီးနောက်ပိုင်း လူငယ်များက နည်းမျိုးစုံဖြင့် ဆန့်ကျင် ဆန္ဒ ထုတ်ဖော်နေလျက်ရှိနေသေးသည်။
Leave a Comments