သျှမ်းပြည်တောင်ပိုင်း ရွာငံမြို့နယ်အတွင်း အခြေစိုက်လှုပ်ရှားနေသည့် ဒေသခံပြည်သူ့ကာကွယ်ရေး ပူးပေါင်း တပ်ဖွဲ့တို့၏ စခန်းနေရာ ထိုးစစ်ဆင်ခံရပြီးနောက် စစ်ကောင်စီမှ ဒေသခံ နေအိမ် (၂) လုံးကို မီးရှို့ဖျက်ဆီး ခဲ့ကြောင်း သတင်းသိရသည်။

ယမန်နေ့ (ဧပြီ ၂၀) ရက် ရွာငံမြို့ရှိ နဘန်းကြီးကျေးရွာ၏ မြောက်ဘက်တွင် စစ်ကောင်စီတပ်ဖွဲ့နှင့် ဒေသခံပြည်သူ့ကာကွယ်ရေးပူးပေါင်းတပ်ဖွဲ့တို့က ပြင်းထန်စွာတိုက်ပွဲဖြစ်ပွားခဲ့ပြီးနောက် စစ်ကောင်စီတို့က ကျေးရွာအတွင်းသို့ စစ်ကြောင်းထိုးကာ နေအိမ်များကို ဖျက်ဆီးလိုက်ကြောင်း ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“မနေ့က ပစ်ခတ်သံတွေ ပေါ်လိုက်ပျောက်လိုက်ဖြစ်နေတာ၊ ညနေပိုင်းကတော့ အပြင်းဆုံးပေါ့၊ အဲ့နောက်တော့ စစ်ကောင်စီတွေက ရွာထဲကို စစ်ကြောင်းထိုးပြီး အိမ်တွေကို ဖျက်ဆီးပစ်တယ်၊ နဘန်းကြီးကျေးရွာမှာ နေအိမ် ၂ လုံး၊ ၃ လုံးဖျက်ဆီး ခံလိုက်ရတယ်၊ ပြည်သူတချို့လည်း ဖမ်းဆီးခံထားရတယ်” ဟု အထက်ပါ အမျိုးသမီးက သျှမ်းသံတော်ဆင့်ကို ပြောသည်။

စစ်ကောင်စီတို့သည် နဘန်းကြီးကျေးရွာအပြင် ပဲရင်တောင်ကျေးရွာနှင့် ဗွေးနှခါး တို့မှ ပြည်သူပိုင်နေအိမ်များ လည်း ဖျက်ဆီးခံလိုက်ရပြီး အသက် ၁၈ နှစ်အောက် ကလေးငယ်များနှင့် အမျိုးသမီးများအပါအဝင် ဒေသခံများ ဖမ်းဆီးခံရမှု ရှိနေကြောင်းလည်း သိရသည်။

“ကြောက်လို့ ပိုင်ရှင်တွေ ထွက်ပြေးတိမ်းရှောင်နေတဲ့ အိမ်တွေရော၊ လူရှိနေလျက်နဲ့ လာခြိမ်းခြောက်ပြောဆိုပြီး အိမ်ပေါ်က ဆင်းခိုင်းပြီး ဖျက်ဆီးလိုက်တာရော တော်တော်များများရှိနေတယ်၊ အခုက အိမ် ၇ လုံး၊ ၈ လုံးလောက် ရှိနေပြီ၊ ပြီးတော့ သူတို့လိုချင်တဲ့သူကို လာရှာလို့ မတွေ့ရင် ကျန်တဲ့ မိသားစုဝင်တွေကို ဖမ်းသွားတာ၊ ကလေး ရော အမျိုးသမီးရောမရှောင်ဘူး” ဟု အထက်ပါ အမျိုးသမီးက ပြောသည်။

ထွက်ပြေးတိမ်းရှောင်ခြင်း မပြုနိုင်ဘဲ ရွာထဲ ကျန်ရှိနေသည့် ဒေသခံများအနေဖြင့်လည်း စစ်ကောင်စီတပ်သား တို့ကို ကြောက်ရွံ့သဖြင့် အိမ်အပြင်မထွက်ရဲကြောင်း၊ အိမ်ထဲနေထိုင်သော်လည်း လုံခြုံမှုမရှိသလို ခံစားရ ကြောင်း ဒေသခံများက ပြောသည်။

လက်ရှိတွင် ရွာငံမြို့အတွင်း၌ စစ်ကောင်စီတပ်ဖွဲ့တို့ တပ်စွဲလှုပ်ရှားနေလျက်ရှိပြီး ရွာသားများကို ဓားစာခံအဖြစ် ဖမ်းဆီးထားခြင်း၊ ၎င်းတို့စားသောက်ဖို့အတွက် ဒေသခံများကို ဖမ်းဆီးကာ ချက်ပြုတ်ကျွေးမွေးခိုင်းခြင်းနှင့် နေအိမ်အဆောက်အအုံများကို ဖျက်စီးခြင်း၊ ပစ္စည်းများကို ယူဆောင်ခြင်းစသည့် အကြမ်းဖက် လုပ်ရပ်များ ကျူးလွန်နေကြောင်း ဒေသခံများက ပြောသည်။