သျှမ်းပြည်အတွင်းရှိ တောင်ကြီး၊ လားရှိုး နှင့် တခြားသော မြို့ကြီးများမှ စက်သုံးဆီ အရောင်းဆိုင်များ တချို့တွင် ဆီများ ပြတ်လပ်နေကြကြောင်း သတင်းသိရသည်။

ယနေ့ (ဧပြီလ ၁၉) ရက်တွင် သျှမ်းပြည်အပါအဝင် နိုင်ငံတဝှမ်းလုံး ဆီ ပြတ်လပ်တော့မည့် သတင်းများ ထွက်ပေါ်လာပြီးနောက် ဆီဆိုင်များတွင် တန်းဆီစောင့်ဆိုင်းနေကြသူများ များပြားလာပြီး တချို့ဆိုင်များတွင် ရောင်းချရန် ဆီမကျန်သည့် အတွက်ပိတ်ထားရကြောင်း သိရသည်။

“မနက်တုန်းကတော့ ကားတွေယာဥ်တွေကို အပြည့်ဖြည့်ပေးလို့ရသေးတယ်၊ ဒါပေမဲ့ ဒီနေ့လည်ပိုင်း ရောက်တော့ ဘယ်ယာဥ်မျိုးမဆို ငွေတန်ဖိုးကျပ် ငါးသောင်းထက် ပိုပြီးမထည့်ပေးနိုင်ဘူး၊ ဆီတွေ လည်း ပြတ်ခါ နီးပြီလေ၊ တချို့ဆိုင်တွေ ပိတ်ကုန်ပြီ” ဟု လားရှိုးမြို့မှ အမည်မဖော်လိုသူ ပန့်ဆီဆိုင်မှ အမျိုးသမီးဝန်ထမ်း တစ်ဦးက သျှမ်းသံတော်ဆင့်ကို ပြောသည်။

သျှမ်းပြည်မြောက်ပိုင်း လားရှိုးမြို့နယ်အတွင်းတွင် ဆီထည့်ရန်အတွက် တန်းဆီစောင့်ဆိုင်းနေကြသည့် ယာဥ်တန်းများကို တစ်စီးလျှင် တန်ဖိုးကျပ်ငွေ (၅၀၀၀၀) ကျပ် အထိသာ ရောင်းချပေးနိုင်ပြီး ပုံးဖြင့် လာဝယ်သူများကို ရောင်းချမှု မပေးနိုင်တော့ကြောင်းလည်း သိရသည်။

ယခုလို ဖြစ်ပေါ်နေသည့် ဆီဈေးကွက်များနှင့် ပက်သက်ပြီး ဧပြီလ ၄ ရက်နေ့တွင် အာဏာသိမ်း စစ်ကောင်စီလက်အောက်ခံ ဗဟိုဘဏ်မှ ထုတ်ပြန်ခဲ့သည့် နိုင်ငံခြားငွေ ကန့်သတ်ထိန်းချုပ်ထားမှု ကြောင့် စက်သုံးဆီဈေးကွက် ပြဿနာဖြစ်ပေါ်လာခြင်း ဖြစ်ကြောင်း ဆီရောင်းဝယ်ရေးလုပ်ကိုင်နေသူ သျှမ်းလူငယ်အမျိုးသားတစ်ဦးက ပြောသည်။

“စကစက တစ်ဒေါ်လာကို မြန်မာငွေ ၁၈၅၀ ကျပ်နှုန်းနဲ့ ၂၄ နာရီအတွင်း လဲရမယ်လို့ ထုတ်ပြန်ခဲ့တယ်လေ၊ အဲ့ဒါကြောင့် နိုင်ငံခြားက တင်သွင်းမှုတွေ ထိခိုက်တာပေါ့၊ မြန်မာဘက်ကအရှုံးပေါ်မှာကိုး၊စက်သုံး ဆီတင်သွင်းဖို့ နိုင်ငံခြားငွေကို အဲ့လိုကန့်သတ်ထိန်းချုပ်မှုတွ မဖြေလျော့ပေးရင်တော့ ကျနော်တို့ သျှမ်းပြည်မှ မဟုတ်ဘူး မြန်မာတစ်ပြည်လုံးလည်း စက်သုံးဆီပြတ်ရမှာပဲ” ဟု သျှမ်းမြောက်မှ ဆီရောင်းဝယ်ရေးလုပ်ငန်း ကို လုပ်ကိုင်နေသည့် သျှမ်းလူငယ် စိုင်းစန္ဒာက သျှမ်းသံတော်ဆင့်ကို ပြောသည်။

ယနေ့ ဧပြီလ ၁၉ ရက်နေ့ သျှမ်းပြည်မှ စက်သုံးဆီဈေးကွက်များသည် အောက်တိန်း ၉၂ တစ်လီတာ လျှင် ၂၃၀၀ ကျပ်ဝန်းကျင်၊ ဓာတ်ဆီ ၉၅ တစ်လီတာလျှင် ၂၃၃၀ ကျပ်၊ ဒီဇယ်တစ်လီတာလျှင် ၂၄၃၀ ကျပ်၊ ပရီမီယံဒီဇယ်တစ်လီတာလျှင် ၂၄၆၀ ကျပ်ဝန်းကျင် ပေါက်ဈေးရှိနေပြီး မှောင်ခိုဈေးကွက်၌မူ တစ်လီတာလျှင် ၃၀၀ ကျပ်ကျော် ပိုမို၍ ပေါက်ဈေးရှိနေကြောင်း သိရသည်။

လက်ရှိတွင်လည်း သျှမ်းပြည်အတွင်းရှိ စက်သုံးဆီ အရောင်းဆိုင်များတချို့တွင် ဆီများပြတ်လပ်နေကြပြီး အရံဆီအဖြစ်ထားရှိသည့် ပန့်အတွင်းမှဆီများကို အရှုံးခံရောင်းချပေးရန် စစ်ကောင်စီတို့က ညွှန်ကြားပြောဆိုနေကြောင်း သတင်းသိရသည်။