သျှမ်းပြည် မြောက်ပိုင်း နမ့်ခမ်းမြို့နယ်မှ လူငယ်တစ်ဦးသည် ဧပြီ ၁၆ရက် (သင်္ကြန်အတက်နေ့) ကတည်းမှ မူဆယ်ချောင်းထဲ ရေနစ်ပျောက်ဆုံးခဲရာ ယနေ့ အချိန်ထိအလောင်းရှာမတွေ့သေးကြောင်း သတင်းသိရသည်။ 

ပြီးခဲ့သည့် ဧပြီလ ၁၆ ရက်တွင် နမ့်ခမ်းမြို့နယ်၊ စယ်နေကျေးရွာအုပ်စု စယ်နေကျေးရွာမှ အသက် ၁၉ နှစ်အရွယ်ရှိ မိုင်းနိုင်ဖောင်သည် မူဆယ်မြို့ရှိ မင်္ဂလာမူဆယ်ချောင်းတွင် ရေဆော့ကစားရာမှ ရေနစ်ပြီး ပျောက်ဆုံးသွားခဲ့ကြောင်း မိသားစုဝင်များက သျှမ်းသံတော်ဆင့်ကို ပြောသည်။

“သူ့သူငယ်ချင်းတွေနဲ့ မင်္ဂလာမူဆယ်နားက ချောင်းသာနားမှာ ရေကစားနေခဲ့ရာကနေ ရေနစ်ပြီးတော့ ပျောက်ဆုံးသွားတယ်၊ အဲ့နေ့က သူ့သူငယ်ချင်းတွေလည်း လိုက်ရှာတယ်မတွေ့ဘူး၊ မနေ့ကလည်း မီးသတ် တပ်ဖွဲ့တွေက အဲ့အနီးနားထိ ကူရှာပေးတာ မတွေ့သေးဘူး” ဟု မိုင်းနိုင်ဖောင်၏ မိသားစုဝင်က သျှမ်းသံတော်ဆင့်ကို ပြောသည်။ 

မိုင်းနိုင်ဖောင်သည် ရေနစ်ပျောက်ဆုံးနေသည်မှာ ၃ ရက်ရှိနေပြီဖြစ်ပြီး ယနေ့ (ဧပြီလ ၁၈) ရက်တွင် အလောင်းကို ကူညီရှာပေးရန် မည်သူမှ မရှိကြောင်း အထက်ပါ မိသားစုဝင်က ပြောသည်။ 

“ဒီနေ့နဲ့ဆို သူပျောက်နေတာ သုံးရက်ရှိနေပြီ၊ မနေ့ကလည်း တစ်နေကုန်ရှာပေမဲ့ မတွေ့တော့ ဒီနေ့ က လာရှာကူတဲ့သူတွေ မလာတော့ဘူး၊ ကျနော်တို့လည်း မြို့ပေါ်က မဟုတ်တဲ့အတွက်ဒီလိုကိစ္စဆို ဘယ်မှာ သွားပြောရမှန်းမသိဘူး၊ တချို့ပရဟိတအသင်းတွေဆီတော့ အကြောင်းကြားထားပါတယ်” ဟု ၎င်းက ပြော သည်။

လက်ရှိတွင် မိုင်းနိုင်ဖောင် အလောင်းကို ကူညီရှာဖွေပေးရန်အတွက် အကူအညီများလိုအပ်နေကြောင်း သိရသည်။

ယခုနှစ် သင်္ကြန်ကာလအတွင်းတွင် သျှမ်းပြည်မှ တခြားမြို့နယ်များတချို့တွင်လည်း ရေဆော့ကစားရာမှ ရေနစ်သေဆုံးရမှုများ ရှိကြောင်းသိရသည်။