သျှမ်းပြည်တောင်ပိုင်း ဟိုပုံးမြို့ရှိ မြို့မစျေးဆိုင်အတွင်း စျေးသည်များထံ သင်္ကြန်မဏ္ဍပ် ဆောက်လုပ်ရန်အတွက် စည်ပင်၀န်ထမ်းမှ ငွေကြေး အတင်းအဓမ္မကောက်ခံမှု ရှိနေကြောင်း စုံစမ်းသိရှိရသည်။
ဧပြီ (၇)ရက်မှ စတင်ပြီး ဟိုပုံးမြို့မစျေးအတွင်း စျေးသည်များ၊ မြို့တွင်း လမ်းတစ်လျှောက်ရှိ ကုန်သည်များထံ သင်္ကြန်မဏ္ဍပ် ပြုလုပ်ရန်ဆိုသည့် အကြောင်းပြချက်ပေးပြီး ငွေကြေးများ ကောက်ခံလျှက်ရှိကြောင်း ဟိုပုံးဒေသခံ များက ပြောဆိုကြသည်။
“သင်္ကြန်မဏ္ဍပ်ဆောက်ဖို့အတွက် မထည့်မနေရဆိုပြီး အတင်းအကြပ် လိုက်ကောက်နေတယ်။ မထည့်ချင်လည်း ထည့်နေရတယ်။ တစ်စျေးလုံး အတိုင်းအတာနဲ့ဆို ဆိုင်ခန်းပေါင်း ရာချီရှိတယ်။ စည်ပင်က ကောက်တာ” ဟု ဟိုပုံးဒေသခံ စျေးသည် အမျိုးသမီးတစ်ဦးက သျှမ်းသံတော်ဆင့် ကို ပြောသည်။
ထိုကောက်ခံမှုမှာ ဆိုင်ခန်း တစ်ခန်းလျှင် (၅)ထောင်မှ စပြီး (၅)သောင်းအထိ ပေးဆောင်နေရကြောင်း ဟိုပုံးဒေသခံ များထံမှ သိရှိရသည်။
“ဆိုင်အကြီးဆိုရင် (၅)သောင်းလောက်ပေးရတယ်။ မထည့်မနေရလို့ကြားတယ်။ မြို့မစျေးအတွင်းက စျေးဆိုင်တွေဆို တစ်ဆိုင်ကို အနည်းဆုံး (၅)ထောင် အတင်းအကြပ် တောင်းခံနေတယ်” ဟု ဟိုပုံးကုန်စုံဆိုင် စျေးသည် အမျိုးသမီး တစ်ဦးက ပြောသည်။
စစ်တပ်အာဏာသိမ်းမှုကို လက်မခံသည့် ပြည်သူများနှင့် လက်နက်ကိုင် ဆန့်ကျင်တော်လှန်ရေး တပ်သားများက စစ်ကောင်စီမှ ပြုလုပ်သည့် သင်္ကြန်ပွဲတော်များတွင် ပြည်သူများ ပါဝင်ဆင်နွဲခြင်းမပြုဘဲ သပိတ်မှောက်ကြရန် ပြောဆိုလှုံ့ဆော်မှုများလည်း ရှိနေသည်။
Leave a Comments