သျှမ်းပြည်မြောက်ပိုင်း ကွက်ခိုင်မြို့နယ် နမ့်ကွတ် – နောင်ဆွေ ကားလမ်းမကြီးပေါ်တွင် တအာင်း (ပလောင်) လွတ်မြောက်ရေးတပ်မတော် (TNLA) တို့ က ခရီးသွားပြည်သူများထံ ဆက်ကြေးကောက်နေကြောင်း စုံစမ်းသိရသည်။
ယနေ့ (ဧပြီ ၈)ရက် မနက် (၁၀)နာရီ ဝန်းကျင်မှ စတင်ပြီး လက်ရှိချိန်ထိ နမ့်ကွတ် – နောင်ဆွေ ကားလမ်းမကြီးပေါ်တွင် လက်နက်အပြည့်အစုံ နှင့် ခရီးသည်ကားများကို တားဆီးပြီး ဆက်ကြေးကောက်နေကြောင်း ကိုယ်တိုင်ကြုံတွေ့ရသည့် ခရီးသွားပြည်သူ တစ်ဦးက သျှမ်းသံတော်ဆင့် ကိုပြောသည်။
“လက်နက်အပြည့်အစုံ နဲ့ ကားတွေကို တားပြီး ကောက်နေကြတာ။ ခုထိပဲ။ တစ်ချို့က လွိုင်ဆမ်ဆစ် မှာ အလှူအတန်းလာလုပ်ဖို့ လုပ်နေတာ ခုထိ မလာရသေးဘူး” ဟု ခရီးသည် တစ်ဦး ကပြောသည်။
ထို ဆက်ကြေးကောက်မှုမှာ ကားအမျိုးအစားပေါ် မူတည်ပြီး ကောက်ခံလျက်ရှိကာ တစ်စီးလျှင် (၃) သိန်းအောက် ကောက်ခံနေကြောင်း သိရှိရသည်။
“မပေးရင် မရဘူးတဲ့ ကြောက်ဖို့ကောင်းတယ်။ တစ်စီးမှာ ၂ ယောက် ၃ ယောက်လောက် လက်နက်တွေနဲ့ ကားမှာ လာတောင်းတယ်တဲ့။ သူတို့တောင်းသလောက် ငွေက မရှိဘူးလေ။ အခက်ခဲဖြစ်တယ်” ဟု ခရီးသွား ပြည်သူ တစ်ဦးကပြောသည်။
ပြီးခဲ့သည့် ဧပြီ (၅) ရက်နေ့တွင်လည်း ကွက်ခိုင်မြို့နယ်အတွင်း TNLA တပ်ဖွဲ့မှ ကားလမ်းပေါ် ဆက်ကြေး ကောက်ခဲ့သေးကြောင်း သိရသည်။
ကွက်ခိုင်မြို့နယ်အတွင်း တအာင်း (ပလောင်) လွတ်မြောက်ရေးတပ်မတော် (TNLA)၊ ကချင်လွတ်မြောက်ရေး တပ်မတော် (KIA) ၊ သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) နှင့် စစ်ကောင်စီအုပ်စုတို့ လှုပ်ရှားရာ နယ်မြေဖြစ်သည်
