သျှမ်းပြည်တောင်ပိုင်း ပင်းတယမြို့ ရွာငယ်ရပ်ကွက် သစ်အယ်ပင်ကျေးရွာအနီးရှိ စစ်ကောင်စီ စစ်ဆေးရေးဂိတ်တွင် ပစ်ခတ်မှုဖြစ်ပွားခဲ့ပြီး PDF ရဲဘော်ဟု ထင်ရသည့် လူငယ်နှစ်ဦးကျဆုံးခဲ့ကာ ရုပ်အလောင်းကို စစ်ကောင်စီတို့ ယူဆောင်သွားကြောင်း သတင်းသိရသည်။
ယမန်နေ့ ဧပြီလ ၄ ရက်နေ့ မွန်းလွဲပိုင်း ၃ နာရီဝန်းကျင်တွင် စစ်ကောင်စီစစ်ဆေးရေးဂိတ်ကို ဆိုင်ကယ်စီးလာသည့် လူငယ်နှစ်ဦးမှ လာရောက်ပစ်ခတ်မှုဖြစ်ပွားခဲ့ပြီး စစ်ကောင်စီတပ်သားများအပြင် လူငယ်နှစ်ဦးလည်း ကျဆုံးခဲ့ကြောင်း ဒေသခံများက ပြောသည်။
”မနေ့ကလူငယ်နှစ်ယောက် ဆိုင်ကယ်နဲ့ ဂိတ်နားအရောက်မှာ သေနတ်အတိုနဲ့ စစ်ဆေးရေးဂိတ်က အစောင့် တွေကို ပစ်ပြီး ထွက်ပြေးတာပေါ့၊ အဲ့ဒီမှာ စစ်ကောင်စီတွေကလည်း ပြန်ပစ်တော့ သူတို့မောင်းထွက်ပြေးတာ မလွတ်လို့ ကျည်ထိတယ်၊ ပြီးတော့ အဖမ်းခံလိုက်ရတယ်” ဟု ဖြစ်စဥ်များကို သိရသည့် ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။
ထို လူငယ် ၂ ဦး၏ အလောင်းကို စစ်ကောင်စီမှ ယူဆောင်သွားပြီး လက်ရှိမှာ ရင်ခွဲရုံတွင်ထားရှိကာ စစ်ကောင်စီ တပ်သားများက စောင့်ဆိုင်းနေကြောင်း သိရသည်။
“မနေ့ကကျသွားတဲ့ ကောင်လေးနှစ်ယောက်အလောင်းကို ရင်ခွဲရုံကို သယ်သွားတယ်။ မနေ့ည နဲ့ ဒီနေ့ မနက်ပိုင်းအထိတော့ အလောင်းတွေ လာလုမှာစိုးလို့ စစ်ကောင်စီတပ်သား ၃၀ ကျော်လောက် ချထားတာတွေ့ရတယ်” ဟု ပင်းတယဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ ပစ်ခတ်မှုတွင် စစ်ကောင်စီတပ်သားတို့ဘက်မှ အနည်းဆုံး ၂ ဦးသေဆုံးပြီးထိခိုက်ဒဏ်ရာရှိသူများလည်း ရှိနေကြောင်း သတင်းသိရသည်။
ယင်းဖြစ်စဉ်နှင့် ပတ်သက်၍ စစ်ကောင်စီ ဝါဒဖြန့် People’s Voice Telegram တွင် ပင်းတယမြို့၊ ရွာငယ်ရပ်ကွက်ရှိ မြို့အဝင် စစ်ဆေးရေးဂိတ်၌ စစ်ဆေးစဉ် လူငယ်နှစ်ဦးနှင့် အပြန်အလှန် ပစ်ခတ်မှု ဖြစ်ပွားခဲ့ရာ အသေ ဖမ်းဆီးခဲ့ပြီး Newington NH USA ပစ္စတို တစ်လက်၊ ၉ မမကျည် ၁၀ တောင့်၊ မှတ်ပုံတင် တစ်ခုနှင့် Redmi ဖုန်း နှစ်လုံး သိမ်းဆည်းခဲ့ကြောင်း ဖော်ပြထားသည်။
ထိုပစ်ခတ်မှု ဖြစ်ပွားပြီးနောက်ပိုင်း ဧပြီ ၄ ရက် ညပိုင်းတွင် ရွာသစ်ရပ်ကွက်နေ လူငယ်တစ်ဦးလည်း အဖမ်းခံရသည့်အပြင် ယနေ့ မတ်လ ၅ ရက်နေ့မှာလည်း ပင်းတယမြို့ တစ်လျှောက်တွင် စစ်ကား ရဲကားများ ကင်းလှည့်သွားလာနေကြောင်း ဒေသခံများထံက သိရသည်။
Leave a Comments