သျှမ်ပြည်တောင်ပိုင်းအတွင်းသို့ ရောက်ရှိနေသည့် ရှမ်းပြည်တိုးတက်ရေးပါတီ၊ ရှမ်းပြည်တပ်မတော် (SSPP/SSA) ကို တပ်ပြန်ဆုတ်ခွာရန် စစ်ကောင်စီက ပြောဆိုခဲ့ကြောင်း သတင်းရရှိသည်။

လက်ရှိ SSPP/SSA သည် မိုင်းရှူးမြို့ သံလွင်မြစ်ကမ်းတစ်လျှောက်နှင့် လွိုင်လင်မြို့နယ် ပင်လုံမြို့ ဆနင်းဒေသ အတွင်းထိ တပ်စခန်းချထားပြီး ထိုတပ်စခန်းများကို ပြန်လည်ဆုတ်ခွာပေးရန် စစ်ကောင်စီက ယမန်နေ့ (မတ် ၃၁ ရက်) နေပြည်တော်မှာ တွေ့ဆုံဆွေးနွေးစဥ် ပြောဆိုခဲ့သည် ဟု သိရသည်။

“မိုင်းရှူးဒေသက သံလွင်မြစ်ကမ်းနဲ့ ထုန့်ဆနင်းတောင်ကြောတစ်လျှောက်ရှိနေတဲ့ SSPP/SSA တပ်တွေကို စစ်ကောင်စီက ဆုတ်ခိုင်းတာ SSPP/SSA က လက်မခံဘူး၊ ပြီးတော့ အခုဆိုရင် စကစတွေက အဲ့ဒီနေရာတွေကို အင်အားဖြည့်နေတာတွေလည်းရှိတော့ ထပ်မတိုးဖို့လည်း စစ်ကောင်စီကို SSPP/SSA က ပြောဆိုထားတယ်” ဟု SSPP/SSA မှ တာ၀န်ရှိသူ တစ်ဦးက သျှမ်းသံတော်ဆင့်ကို ပြောသည်။

လက်ရှိစစ်ကောင်စီတို့မှ SSPP ကို ဆုတ်ခွာခိုင်းသည့် ဆနင်းဒေသသည် အရင်ကာလများတွင် RCSS/SSA မှ ထိန်းချုပ်ထားသည့်နေရာများဖြစ်ခဲ့ဖူးသည့်အပြင် အခုချိန်အထိ နယ်မြေငြိမ်းချမ်းခြင်းမရှိသေးသည့် နေရာဖြစ်ကြောင်း သိရသည်။

စစ်ကောင်စီ၏ တောင်းဆိုချက်ကို ငြင်းပယ်လိုက်ခြင်းနှင့် ပတ်သက်ပြီး “တွေ့ဆုံမှုမှာ အဓိက ဦးတည်ထားတာက ငြိမ်းချမ်းရေးအကြောင်းတွေပေါ့၊ ဒါပေမဲ့ စစ်ကောင်စီဘက်က ကျနော်တို့မဆုတ်နိုင်တဲ့ နေရာတွေကို လိုက်ပြီး အင်အားဖြည့်တင်းမှုတွေ ချည်းကပ်မှုတွေ ထပ်လုပ်မယ်၊ ကျနော်တို့မှာလည်း ရှောင်လမ်းမရှိဘူးဆိုရင်တော့ ထိပ်တိုက်တွေ့မှုတွေ ဖြစ်နိုင်တာပေါ့” ဟု SSPP/SSA မှ ဒု-ဗိုလ်မှူး စိုင်းဆုက CNI သတင်းဌာနကို ဖြေဆိုထားသည်။

ပြီးခဲ့သည့် မတ်လ ၂၈ ရက်မှစတင်ကာ စားနပ်ရိက္ခာနှင့် လက်နက်ကိုင်စစ်သားများပါရှိသည့် စစ်ကားအစီးရေ ၇၅ စီးသည် ကလောမြို့မှတစ်ဆင့် သျှမ်းပြည်တောင်ပိုင်းရှိ ရပ်စောက်မြို့၊ လွိုင်လင်ခရိုင် နမ့်စန်မြို့ စသည့် မြို့များသို့ အင်အားဖြည့်တင်းမှုများရှိနေကြောင်းလည်း ဒေသခံများထံမှ သိရသည်။

NSPNC နှင့် SSPP/SSA တွေ့ဆုံမှုတွင် လက်ရှိ ငြိမ်းချမ်းရေးဆောင်ရွက်နေမှု၊ အစိုးရအနေဖြင့် ၂၀၂၂ ခုနှစ်ကို ငြိမ်းချမ်းရေးနှစ်အဖြစ် သတ်မှတ်ပြီး ကြိုတင်သတ်မှတ်ချက်များမရှိဘဲ လက်နက်ကိုင် အဖွဲ့အစည်းများနှင့် တွေ့ဆုံဆွေးနွေးမှု၊ အပစ်အခတ်ရပ်စဲထားမှု၊ ဒေသဖွံ့ဖြိုးတိုးတက်ရေး လုပ်ငန်းများ ဆောင်ရွက်နိုင်ရေး၊ ပဋိပက္ခများလျှော့ချနိုင်ရေးတို့ဖြစ်သည်။

ထို့ပြင် ဒေသခံပြည်သူများ၏ လိုအပ်ချက်များကို တွေ့ဆုံညှိနှိုင်း ဖြည့်ဆည်းဆောင်ရွက်နိုင်ရေး၊ လွတ်လပ်ပြီးတရားမျှတသော ပါတီစုံဒီမိုကရေစီ အထွေထွေရွေးကောက်ပွဲ အောင်မြင်စွာ ကျင်းပနိုင်ရေးအတွက် ပူးပေါင်းဆောင်ရွက်ရေးနှင့် နယ်မြေဒေသ တည်ငြိမ်အေးချမ်းရေး စသည့် ကိစ္စရပ်များကို ဆွေးနွေးခဲ့ကြောင်း စစ်ကောင်စီဘက်မှ ထုတ်ပြန်ခဲ့သည်။

SHANBurmese

Shannews

သျှမ်းသံတော်ဆင့်