သျှမ်းပြည်တောင်ပိုင်း ရွာငံမြို့နယ် ပဲရင်းတောင်ကျေးရွာတွင် လူမနေထိုင်သည့် နေအိမ်များကို စစ်သားများက ဖောက်ထွင်းပြီး အိမ်တွင်းပစ္စည်းများကို ယူဆောင်သွားကြောင်း စုံစမ်းသိရသည်။
ပြီးခဲ့သည့် ရက်ပိုင်းအတွင်းတွင် ပဲရင်းတောင်ကျေးရွာမှ စစ်ဘေးတိမ်းရှောင်နေသည့် ပြည်သူ့နေအိမ်များနှင့် ကြောက်လန့်မှုကြောင့် ထွက်ပြေးတိမ်းရှောင်နေရသည့် ပြည်သူ့နေအိမ်များကို စစ်သားများက ဖောက်ထွင်းပြီး အိမ်တွင်းပစ္စည်းများကို ယူဆောင်သွားကြောင်း ဒေသခံများက သျှမ်းသံတော်ဆင့် ကို ပြောသည်။
“ပြီးခဲ့တဲ့ မတ် ၂၀ ရက်နေ့မှာ ပစ်ခတ်မှုဖြစ်သွားတယ်၊ အဲ့ကြောင့် တချို့ရွာသားတွေက တခြားရွာတွေဘက်ကို စစ်ရှောင်သွားနေတယ်၊ တချို့ကလည်း အဖမ်းခံရမှာ ကြောက်လို့ ထွက်ပြေးနေတာလည်းပါတာပေါ့၊ အဲ့ဒါ လူမရှိတဲ့ နေအိမ်တွေကို စစ်သားတွေက သော့ဖျက်ပြီး အိမ်တွင်းပစ္စည်းတွေ ဝင်ယူသွားတယ်” ဟု ပဲရင်းတောင်ကျေးရွာမှ ရွာသားတစ်ဦးက သျှမ်းသံတော်ဆင့်ကို ပြောသည်။
ယခုရက်ပိုင်းအတွင်း ဖောက်ထွင်းခံရသည့် ပြည်သူ့နေအိမ် အနည်းဆုံး ၅ လုံးခန့် ရှိနေပြီး အများစုမှာ တိုက်အိမ်နှင့် စီးပွားရေးအသင့်အသင့်ရှိသည့် အိမ်များကို စစ်သားတို့က ဖောက်ထွင်းပြီး အိမ်တွင်းပစ္စည်းများကို ယူသွားကြောင်း သိရသည်။
“ဆန်တွေ၊ ဆီပုံးတွေ၊ ပျိုးစေ့အိတ်တွေကို သယ်ထုတ်တာ တွေ့ရတယ်၊ ပြီးတော့ သူများရဲ့ သေတ္တာကို ဖျက်ပြီး ရွှေတွေ ငွေတွေလည်း ယူသေးတယ်၊ တခြားတန်ဖိုးကြီးပစ္စည်းတွေကိုလည်း ယူသွားမယ်ထင်တာပဲ၊ အဲ့လို အဖောက်ခံရတဲ့ နေအိမ်က အနည်းဆုံး ၅ လုံးလောက်ရှိတယ်” ဟု ပဲရင်းတောင်မှ ဒေသခံ လူငယ်တစ်ဦးက ဆိုသည်။
ပဲရင်းတောင်ကျေးရွာအတွင်းတွင် ဒေသခံပြည်သူ့ကာကွယ်ရေးတပ် PDF နှင့် ဆက်စပ်သူတို့ ရှိနေသည့် သံသယဖြင့် ဒေသခံရွာသားများကို ဖမ်းဆီးရိုက်နှက်စစ်ဆေးခြင်းများ ပြုလုပ်နေကြောင်း ဒေသခံများက ပြောသည်။
ထို့အပြင် ယမန်နေ့ မတ်လ ၂၆ ရက်နေ့တွင်လည်း ရွာငံမြို့နယ်ရှိ နန်းခုန်ကျေးရွာအတွင်းသို့ စစ်ကောင်စီ တပ်သားတို့က တစ်အိမ်ချင်းလိုက်လံစစ်ဆေးခဲ့ကြောင်းလည်း သိရသည်။
