သျှမ်းပြည်တောင်ပိုင်း ရွာငံမြို့နယ် အလယ်ချောင်ကျေးရွာတွင် နေထိုင်သည့် အမျိုးသားဒီမိုကရေစီအဖွဲ့ချုပ်( NLD ) လွှတ်တော်အမတ်၏ နေအိမ်ကို စစ်ကောင်စီတပ်သားများက လာရောက်ချိတ်ပိတ်သွားကြောင်း သတင်းရရှိသည်။
မတ်လ ၂၂ ရက်တွင် စစ်သားနှင့်ရဲသားတချို့က ဖမ်းဆီးခံထားရသည့် NLD အမတ်၏ နေအိမ်ကို ကားတစ်စီးဖြင့် ရောက်ရှိလာပြီး အိမ်တွင်း ပစ္စည်းတချို့ ယူဆောင်ကာ ဦးစိုင်းဝဏ္ဏ၏ နေအိမ်ကို ချိတ်ပိတ်စာကပ်သွားကြောင်း ဒေသခံများက သျှမ်းသံတော်ဆင့်ကို ပြောသည်။
“ပြီးတော့ မတ်လ ၂၂ ရက်က ကားတစ်စီးနဲ့လာတဲ့ စစ်သား တွေက အိမ်ထဲက ဗီဒိုတွေ စားပွဲတွေ၊ TV တွေ နဲ့ အိမ်ထဲက ပစ္စည်းတော်တော်များကို ကားပေါ်တင်ပြီး အိမ်ကို ချိတ်ပိတ်သွားတယ်၊ ရွာလူကြီးကိုလည်း အသိ ပေးတာ မရှိဘူး၊ သူတို့လာလုပ်သွားပြီးမှ ရွာသားတွေ ပြောလို့ ရွာလူကြီးက သိရတာ” ဟု အလယ်ချောင်ရွာသား တစ်ဦးက သျှမ်းသံတော်ဆင့်ကို ပြောသည်။
ဦးစိုင်းဝဏ္ဏနှင့် မိသားစုဝင် ၄ ဦးကို ပြီးခဲ့သည့် မတ်လ ၇ ရက်နေ့တွင် စစ်ကောင်စီတပ်သားတို့က လာရောက် ဖမ်းဆီးခေါ်ဆောင်သွားပြီး မိသားစုဝင် ၃ ဦးက ပြန်လည်လွတ်မြောက်လာသော်လည်း ဦးစိုင်းဝဏ္ဏနှင့် နောက်ထပ် မိသားစုဝင် တစ်ဦးက ဖမ်းဆီးခံထားရဆဲ ဖြစ်ကြောင်း သတင်းသိရသည်။
“ဖမ်းဆီးမှုမှာ မပါတဲ့ ဦးစိုင်းဝဏ္ဏအမေအိုနဲ့ ပြန်လွတ်လာတဲ့ မိသားစုဝင်တွေက နေအိမ်ချိတ်ပိတ်မှု မဖြစ်ခင်မှာပဲ တခြားနေရာကို ပြောင်းရွှေ့နေ ရပါတယ်၊ ပြောရရင် အမေအိုက ကျန်းမာရေး သိပ်မကောင်းဘူး” ဟု ဦးစိုင်းဝဏ္ဏနှင့် နီးစပ်သူ တစ်ဦးကလည်း သျှမ်းသံတော်ဆင့်ကို ပြောသည်။
ရွာငံမြို့နယ်အတွင်း အာဏာသိမ်းစစ်ကောင်စီ တပ်သားတို့၏ အပြစ်မဲ့ပြည်သူများကို သံသယမှုဖြင့် ရိုက်နှက် ဖမ်းဆီးထောင်ချမှုများ တစ်နေ့တစ်ခြား များပြားလာသည့်အပြင် လက်ရှိအချိန်အထိ ချိတ်ပိတ်ခံရသည့် ပြည်သူ့နေအိမ်လည်း ၁၀ လုံး နီးပါးရှိနေကြောင်းသိရသည်။