သျှမ်းပြည်တောင်ပိုင်း၊ ရွာငံမြို့နယ် မြောက်ဘက်ကျေးရွာများတွင် စစ်ကော်မရှင်တပ်က ဖမ်းဆီးသွားသည့် ရွာငံဒေသခံ (၃)ဦး နှစ်ပတ်ကြာသည်အထိ ပြန်မလွှတ်သေးကြောင်း သတင်းရရှိသည်။

ပြီးခဲ့သည့် မတ်လ ဒုတိယပတ်တွင် ရွာငံမြို့နယ် ကျောက်ငှက်ကျေးရွာအုပ်စုမှ ဒေသခံ (၃)ဦးသည် ဆွေမျိုးအိမ်သို့ အလည်သွားရာမှ အပြန် စစ်ကော်မရှင်တပ်က ဖမ်းဆီးသွားခဲ့ပြီး ယနေ့ မတ်လ (၂၇)ရက်အထိ ပြန်မလွှတ်သေးဘဲ သတင်းအစန မရရှိသေးကြောင်း ရွာငံမြို့နယ် မြောက်ဘက်ကျေးရွာ ဒေသခံများ ပြောပြချက်အရသိရသည်။

ထိုသို့ စစ်ကော်မရှင်တပ်က ဖမ်းဆီးသွားသော ‌ဒေသခံ(၃)ဦးသည် အသက် (၃၀)ဝန်းကျင် လူငယ် အမျိုးသားများ ဖြစ်ကြပြီး နေ့စားလုပ်ကိုင်ကာ မိသားစုဝမ်းရေးကို ရှာဖွေကျွေးမွေးနေသူများ ဖြစ်ကြောင်း ဒေသခံအမျိုးသား တစ်ဉီးက သျှမ်းသံတော်ဆင့်ကိုပြောသည်။

“ဖမ်းသွားတာ နှစ်ပတ်ရှိပြီ၊ ခုထိ ပြန်မလွှတ်သေးဘူး ၊သတင်းအစနလည်း မရဘူး၊ စစ်မှုထမ်းရောင်းစား လိုက်ပြီလို့လည်း ကြားတယ်၊ တကယ်ဆို အဆက်သွယ်ရသင့်ပြီ၊ ဒီဘက်က စိတ်ပူနေတာ အသက်ရှင်လျက် ပြန်တွေ့ဖို့ပဲ ဆုတောင်းမိတယ်။”ဟု ၎င်းက ဆိုသည်။

အလားတူ ပြီးခဲ့သည့် မတ်လ ဒုတိယပတ်တွင် သိမ်ကုန်း‌ကျေးရွာအုပ်စု အမျိုးသမီးနှစ်ဦးနှင့် အမျိုးသားတစ်ဦးကို စစ်ကော်မရှင်တပ်က ဖမ်းဆီးသွားခဲ့ပြီး ယနေ့အချိန်ထိ အဆက်အသွယ်မရရှိသေးပေ။

ထို့အပြင် ရွာငံမြို့နယ် ကျောက်ငှက်ကျေးရွာ အုပ်စုနှင့် ကျောတော ကျေးရွာဘက်တွင် စစ်ကော်မရှင်တပ်က တပ်စွဲထားပြီး အရပ်သားများကို တော်လှန်ရေးတပ်သားများကို ထောက်ပံ့နေသည်ဟု စွပ်စွဲ၍ ဖမ်းဆီးမှုများ ဆက်တိုက် ပြုလုပ်နေကြောင်း သိရသည်။

“ ခုတလော စစ်တပ်က ရွာသားတွေကို လာလာဖမ်းတယ်၊ တစ်ပတ်လောက်နေပြီး ပြန်လွှတ်တယ်၊ ဖမ်းခံရတဲ့ အတောတွင်းမှာ ရိုက်နှက်ထားတာ ရစရာကို မရှိဘူး၊ ခြေထောက်တွေဆို ညိုမဲစွဲသွားတာ၊ လမ်းလျှောက်လို့တောင် မရဘူး၊ တော်လှန်ရေးတပ်ကို ထောက်ပို့လုပ်နေတာလား ဘာလားမေးပြီး ရိုက်တာတဲ့၊ တကယ် စိတ်ရော လူရောလုံခြုံမှုမရှိနေဘူး။”ဟု ကျောက်တော ကျေးရွာအုပ်စုမှ ဒေသခံ အမျိုးသားတစ်ဦးက ပြောသည်။

ယခုလက်ရှိ ရွာငံမြို့နယ်တွင် စစ်ကော်မရှင်တပ်နှင့် တော်လှန်ရေးတပ်များ မကြာခဏထိတွေ့မှု ဖြစ်နေသောကြောင့် ဒေသတွင်း မငြိမ်မသက်ဖြစ်နေပြီး စစ်ဆေးရေးတင်းကြပ်ထားကြောင်း သိရသည်။

ပြီးခဲ့သည့် မတ်လအစောပိုင်းမှ စပြီးကျောက်ငှက် ကျေးရွာအုပ်စုနှင့် ရနဲကျေးရွာ အုပ်စုဘက်တွင် စစ်ကော်မရှင်တပ်က အင်အား အလုံးရင်းဖြင့် တပ်စွဲထားပြီး ဒေသခံများကို ညဘက်ကင်းလှည့်စောင့်ကြည့်ခြင်၊ ထမင်းထုတ်ပို့ခိုင်းနေကြောင်း ဒေသခံများထံမှ သိရသည်။