သျှမ်းပြည် တောင်ပိုင်း ရွာငံမြို့နယ်တွင် စစ်ကော်မရှင်လက်အောက်ခံ ပျူစောထီးတစ်ဦး အသတ်ခံရကြောင်း စုံစမ်းသိရသည်။
ရွာငံမြို့နယ် ကျေးရွာတစ်ခုတွင် နေထိုင်သည့် စစ်ကော်မရှင် လက်အောက်ခံပျူစောထီး အမျိုးသားတစ်ဦး၏ အလောင်းကို ချောက်ကမ်းပါးထဲတွင် တွေ့ရှိခဲ့ကြကြောင်း ရွာငံမြို့နယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
“ပျူစောထီးတစ်ယောက် သတ်ခံရပြီး ချောက်ထဲပစ်ချခံထားရတာ။ ရွာသားတွေက အမှိုက်ပစ်ရင်းတွေ့တာ။ ဘယ်ချိန်သတ်သွားလည်း မသိကြဘူး။ အနံကတော့ ထွက်နေပြီ။ ဒီနေ့(မေလ ၅ ရက်) ရွာမှာ စစ်သားတွေလာပြီး ပျူစောထီး အလောင်းလာကောက်တယ်။” ဟု ရွာငံမြို့နယ်ဒေသခံ အမျိုးသားတစ်ဦးကပြောသည်။
ထို စစ်ကော်မရှင်လက်အောက်ခံ ပျူစောထီး အမျိုးသားသည် အသက် (၅၀) ဝန်းကျင်ရှိ ဦးဖိုးဖော်ဖြစ်ကြောင်း သိရသည်။
အလားတူ ပြီးခဲ့သည့် မေလ ၂ ရက် ရွာငံမြို့နယ် ငါးဆူကျေးရွာတွင် လက်နက်ကိုင်လူတစ်စုက အိမ်တစ်ခုကို ဝင်ရောက်ပြီး ဖခင်ဖြစ်သူ နှင့် သားဖြစ်သူ နှစ်ဦးကို ချည်နှောင်က အမျိုးသမီးတစ်ဦးကို ဓားဖြင့်ထိုးသတ်ခဲ့ကြောင်းသိရသည်။
ရွာငံမြို့နယ်အတွင် စစ်ကော်မရှင်တပ် ၊ စစ်ကော်မရှင်တပ် လက်အောက်ခံ ပျူစောထီးတပ်၊ ပအိုဝ်းပြည်သူ့စစ် (PNO) တပ်၊ဓနုအမျိုးသားလွတ်မြောက်ရေးတပ်ဦး DPLA/DPLF နှင့် ဓနုပြည်နယ် အမျိုးသားလွတ်မြောက်ရေးတပ်မတော် (DSNDA) တို့ သွားလာလှုပ်ရှားမှုရှိကြောင်း သိရသည်။
Leave a Comments