သျှမ်းပြည်တောင်ပိုင်း၊ ရွာငံမြို့နယ် စခန်းကြီးကျေးရွာ လမ်းတွင် သီလရှင်များ လိုက်ပါလာသည့် ကားတိမ်းမှောက်ပြီး သီလရှင် (၁၀)ပါးထက်မနည်း ဒဏ်ရာရရှိခဲ့ကြောင်း သတင်းရရှိသည်။

ယမန်နေ့ ဖေဖော်ဝါရီလ (၂၄)ရက်နေ့ တွင် တောင်ကြီးမြို့နယ် ၊ဆီဆိုင်မြို့နယ်၊ ဟိုပုံးမြို့နယ်မှ သီလရှင်များသည် စစ်ကိုင်းမြို့သို့ သွားစဉ် ရွာငံမြို့နယ် စခန်းကြီးကျေးရွာ လမ်းတွင် ဘရိတ်ပေါက်တာ ယာဉ်တိမ်းမှောက်ခဲ့ပြီး သီလရှင် (၁၀)ပါးထက် မနည်းဒဏ်ရာရပြီး ထိုထဲမှ ငါးဦးသည် ဒဏ်ရာပြင်းထန်ကြောင်း သွားရောက်ကူညီသည့် အမျိုးသားတစ်ဉီးက ပြောသည်။

“မနေ့က ကျမတို့လည်း မန္တလေးဆင်းတာ အဲလမ်းမှာ သီလရှင်တွေ အများကြီးပဲ ကားမှောက်လို့တဲ့ ၊ဖုန်းလိုင်းကလည်း မရဘူး၊ တစ်ပါးကလည်း ခြေထောက်ပြတ်ကျသွားတာ၊ သီလရှင်တွေက ၁၂ နှစ်အရွယ်လေးတွေ သူတို့စာရွက်ထဲမှာ မိဘ ဖုန်းနံပါတ်တွေ ရေးလာကြတာ၊ ကျမကို ခေါ်ခိုင်းတာ ဖုန်းလိုင်း မရတော့ ခေါ်မရလို့ ကျမကိုယ်တိုင် ရွာငံ ဆေးရုံလိုက်ပို့ခဲ့တာ။”ဟု ၎င်းကပြောသည်။

အဆိုပါ သီလရှင်များကို စစ်ကိုင်းမြို့မှ ဘုန်းကြီးကျောင်းသို့သွားရောက်စာသင်ရန်အတွက် တောင်ကြီးမြို့နယ် ၊ဆီဆိုင်၊ ဟိုပုံးဘက်မှ သီလရှင်များကို ခေါ်ယူလာကြောင်း ၎င်းက ဆက်ပြောသည်။

ဒဏ်ရာပြင်းထန်သော သီလရှင် ငါးပါးကို ယမန်နေ့ည ၉နာရီခွဲ အချိန်တွင် မန္တလေးပြည်သူ့ ဆေးရုံကြီးသို့ လွှဲပြောင်း ပို့ဆောင်လိုက်ရကြောင်း သိရသည်။

ထိုသို့ ယာဉ်တိမ်းမှောက်၍ ဒဏ်ရာပြင်းထန်သည့် သီလရှင်နှင့် ကိုယ်ရင် များသည် မြန်မာစကားကို ကောင်းမွန်စွာ မပြောနိုင်ဘဲ မိခင်ဘာသာစကား ဖြစ်သည့် ရှမ်း၊ ပအိုဝ်းနှင့် တအာင်း ဘာသာ စကားကိုသာ ပြောနိုင်ကြကြောင်း သိရသည်။

“သူတို့မိဘတွေကို မေးတာ မြန်မာစကား မတတ်တော့ မသိရဘူး၊ အိမ်ပြန်ချင်တယ် ဆိုပြီး အော်ငိုနေကြတာ အဲတစ်လုံးပဲတတ်တာ၊ ကလေးတွေက ပိစိလေးတွေဆိုတော့ သနားစရာလေးတွေ သူတို့ကို သီလရှင်ဝတ်ပေးပြီး စစ်ကိုင်းက ဘုန်းကြီးထဲ ထည့်ပေးလိုက်တာတဲ့ စစ်ရှောင်နေရတော့ စားဝတ်နေရေး ခက်ခဲလို့ ဖြစ်မယ်။”ဟု ဖြစ်စဉ်သိရှိသူ အမျိုးသမီးတစ်ဦးက ပြောသည်။

ထို့အပြင် အဆိုပါ သီလရှင်များနှင့် ကိုယ်ရင်လေးများသည် မိဘများနှင့် အဆက်သွယ်မရသေးကြောင်းနှင့် အကူညီများလိုအပ်နေပြီး ရှမ်း၊ပအိုဝ်း၊တအာင်းနှင့် ဓနုစကား တတ်သူများက အဆိုပါ သီလရှင်များကို ဆက်သွယ်ကာ အကူညီပေးစေလိုကြောင်း အဆိုပါ အမျိုးသမီးက ပြောသည်။

နွေရာသီကျောင်းပိတ်ချိန် ဖြစ်သောကြောင့် သျှမ်းပြည်မှ ကျောင်းသား ၊ကျောင်းသူများကို ရန်ကုန်၊မန္တလေး၊ စစ်ကိုင်းဘက်မှ ဘုန်းကြီးများက ကလေးများကို ပညာသင်ကြားပေးမည်ဟူ၍ လာရောက်ခေါ်ဆောင်လေ့ ရှိကြောင်း ဆီဆိုင်ဒေသခံ အမျိုးသားတစ်ဦးက ပြောသည်။

ခေတ်ကာလ အခြေနေ မကောင်းသောကြောင့် လူကုန်ကူးသူများ လက်ထဲရောက်သွား တတ်သောကြောင့် မိဘများမှ ကလေးများကို လက်လွတ်စပယ် မထည့်ပေးလိုက်သင့်ကြောင်း အဆိုပါ အမျိုးသားက အကြံပေးထားသည်။

ရွာငံ-မန္တလေး လမ်းသည် မတ်စောက်ပြီး အဆင်းအတက်၊ကွေ့များ မှာလွန်စွာ အန္တရာယ်ရှိသောကြောင့် ထိုစခန်းကြီး ကျေးရွာအဆင်းလမ်းတွင် ယာဉ်တိမ်းမှောက်မှုများ မကြာခဏ ကြုံတွေ့ရကြောင်း သိရသည်။