သျှမ်းပြည်တောင်ပိုင်း၊ရွာငံမြို့နယ် ကျောက်ငှက်ကျေးရွာအုပ်စုတွင် စစ်ကော်မရှင်တပ်က တပ်စွဲထားပြီး ဒေသခံများကို ဖမ်းဆီးကာ ပိုက်ဆံဖြင့် ပြန်ရွေးခိုင်းနေကြောင်း သတင်းရရှိသည်။

ပြီးခဲ့သည့် မတ်လ(၈)ရက်တွင် ကျောက်ငှက်ကျေးရွာမှ အမျိုးသမီးတစ်ဦးအပါအဝင် ဒေသခံ ငါးဦးသည် ဆွေအမျိုးအိမ်သို့ အလည်သွားရာမှ အပြန် ကျောက်ငှက်ကျေးရွာနှင့် အုတ်တွင်းကျေးရွာ လမ်းတွင် စစ်ကော်မရှင်တပ်က ဖမ်းဆီးခဲ့ပြီး ငွေကျပ်သိန်း(၅၀)ဖြင့် ပြန်ရွေးခိုင်းခဲ့ကြောင်း သိရသည်။

ထိုသို့ ငွေကြေးဖြင့် ပြန်ရွေးရာတွင် အမျိုးသမီးတစ်ဦးနှင့် အမျိုးသားတစ်ဦးသာ သာပြန်လည် လွတ်မြောက်လာပြီး ကျန်သုံးဦးမှာ စစ်မှုထမ်းရန်အတွက် ရှေ့တန်းပို့လိုက်ကြောင်း ဖြစ်စဉ်သိရှိသူ ရွာငံဒေသခံ အမျိုးသားတစ်ဦးက ပြောသည်။

“သူတို့က ဟိုဘက်ရွာက သူတို့အမျိုးအိမ်ကို သွားလည်ပြီး အပြန်မှာ ဖမ်းခံရတာ၊ ညနေဘက်ဆိုတော့ စစ်သားတွေကင်းလှည့်တာ အဲတာနဲ့တွေ့တော့ အဖမ်းခံရတာ၊ သိန်း ၅၀နဲ့ ရွာငံမှာ သွားရွေးခဲ့ရတာ အဲဒါတောင် နှစ်ယောက်ပဲလွတ်တာ၊ ကျန်တဲ့သူကို စစ်သင်တန်းပို့လိုက်ပြီ လို့ စစ်တပ်က ပြောလိုက်တာတဲ့။”ဟု ရွာငံဒေသခံ အမျိုးသားတစ်ဦးက ပြောသည်။

အဆိုပါ ဖမ်းဆီးခံရသူများသည် အသက် (၃၀)ဝန်းကျင် အမျိုးသားများဖြစ်ပြီး နေ့စားလုပ်ကိုင်ပြီး မိသားစုကို ရှာကျွေးနေသူများ ဖြစ်ကြောင်း ၎င်းက ဆက်ပြောသည်။

ထို့အပြင် ပြီးခဲ့သည့် မတ်လ ဒုတိယပတ်တွင် သိမ်ကုန်းကျေးရွာအုပ်စုမှ အမျိုးသမီးနှစ်ဦးနှင့် အမျိုးသားတစ်ဦးကို စစ်တပ်မှ လာရောက်ဖမ်းဆီးသွားပြီး ယနေ့အထိ အဆက်သွယ်မရသေးကြောင်း သိရသည်။

“ဘာလို့လာဖမ်းသွားလဲ မသိဘူး၊ညဘက်ကြီး စစ်သားတွေ ကားနဲ့လာဝိုင်းပြီး ဖမ်းသွားတာ၊ ခုထိတော့ အဆက်သွယ်မရသေးဘူး၊ ဘာလို့ဖမ်းတာလဲ မသိဘူး။”ဟု ရွာငံဒေသခံ အသက်(၃၀)ဝန်းကျင် အမျိုးသမီးတစ်ဦးက ပြောသည်။

စစ်ကော်မရှင်တပ်သား များသည် ရွာငံမြို့နယ် ကျေးရွာအုပ်စုများတွင် တပ်စွဲထားပြီး ညဘက်ကင်းလှည့် စောင့်ကြည့်ခြင်း၊ ထမင်းထုတ်ပို့ခိုင်းနေကြောင်း အဆိုပါ အမျိုးသမီးတစ်ဦးက ပြောသည်။

ယခုလက်ရှိ ရွာငံမြို့နယ်တွင် စစ်ကော်မရှင်တပ်နှင့် တော်လှန်ရေးတပ်များ မကြာခဏထိတွေ့မှု ဖြစ်နေသောကြောင့် ဒေသတွင်း မငြိမ်မသက်ဖြစ်နေပြီး စစ်ဆေးရေးတင်းကြပ်ထားကြောင်း သိရသည်။

ပြီးခဲ့သည့် ဖေဖော်ဝါရီလ (၁၈)ရက်တွင်လည်း ရွာငံမြို့နယ် ကျောက်ငှက်-အုတ်တွင်းကျေးရွာ လမ်းပိုင်းတွင် ကင်းလှည့်နေသော စစ်ကော်မရှင်တပ် စစ်ကြောင်းကို ကြားဖြတ် တိုက်ခိုက်ခဲ့ပြီး စစ်ကော်မရှင်တပ်မှ ဗိုလ်(၁)ဦးအပါဝင် (၁၀)ဦးခန့် သေဆုံးပြီး ထိခိုက်ဒဏ်ရာရရှိသူများလည်း ရှိခဲ့သည်။