သျှမ်းနီတိုင်းရင်းသားများ၏ အိမ်ထောင်စု စာရင်းနှင့် မှတ်ပုံတင်တွင် ပါရှိသည့် လူမျိုး ဆိုသည့်နေရာတွင် ဗမာ ဟု သုံးနှုန်းရေးသားခြင်းသည် လူမျိုး နှင့် လူမျိုးနာမည်ဖျောက်ရန် ကြိုးစားမှုဖြစ်သည်ဟု သျှမ်းနီလူမျိုးများက ဝေဖန်ပြောဆို နေကြသည်။
မတ်လ ပထမပတ်အတွင်းမှ စတင်ကာ စစ်ကောင်စီလက်အောက်ခံ လူဝင်မှုကြီးကြပ်ရေးနှင့် ပြည်သူ့အင်အား ဝန်ကြီးဌာန (လဝက) အဖွဲ့သားများသည် သျှမ်းနီတိုင်းရင်းသားများ ရှိရာဒေသများသို့ ကွင်းဆင်းပြီး မှတ်ပုံတင် နှင့် အိမ်ထောင်စုစာရင်း ပြုလုပ်ပေးခြင်း၊ လှဲလှယ်ပေးခြင်းတို့ကို ပြုလုပ်ရာ လူမျိုးဆိုသည့်နေရာတွင် ဗမာ ဟု အတင်းရေးသားထည့်သွင်းကြောင်း ကြုံတွေ့ရသူ အမျိုးသားတစ်ဦးက သျှမ်းသံတော်ဆင့်ကို ပြောသည်။
“မတ်လ ၉ ရက်နေ့မှာ ဒီပင်ဘောကျေးရွာ (ကချင်ပြည်နယ်၊ မိုးကောင်းမြို့နယ်)မှာ မှတ်ပုံတင်လုပ်တဲ့ အသစ်လဲတဲ့ သျှမ်းနီတွေကို လူမျိုးဆိုတဲ့နေရာမှာ ဗမာလို့ ထည့်လိုက်တာ၊ အရင်က သျှမ်း – ဗမာ လို့ သုံးထားတာကို အခုက သျှမ်းကို ဖျက်ပစ်ပြီး ဗမာလို့ပဲရေးထားတာ” ဟု မှတ်ပုံတင်လဲရင်း ကြုံတွေ့ရသူ ပင်ဘောရွာခံ သျှမ်းနီအမျိုးသား တစ်ဦးက သျှမ်းသံတော်ဆင့်ကို ပြောသည်။
သျှမ်းနီတိုင်းရင်းသားတို့သည် မှတ်ပုံတင်နှင့် အိမ်ထောင်စုစာရင်းတို့လုပ်ရာတွင် မိမိတို့၏ ပင်ကိုယ်လူမျိုးဖြစ် သည့်အတိုင်း သျှမ်းနီဟု ထည့်သွင်းခွင့်မရရှိခဲ့သည့်အပြင် သျှမ်းဗမာ၊ သျှမ်း + ဗမာ ဟု ထည့်သွင်းခံလာရပြီးနောက် ယခုတခါတွင် “ဗမာ” ဟု ထည့်သွင်းရေးသားခံရကြောင်း သိရသည်။
ထိုသို့လုပ်ဆောင်ခြင်းသည် လူမျိုးအမည်ဖျောက်ရန် ကြိုးစားမှုဖြစ်ပြီး မှတ်ပုံတင်မှာ “ဗမာ” လူမျိုးဟု ပြောင်းလဲ ခံရသည့် သျှမ်းနီလူမျိုးများအတွက် ပြန်လည်ဖြေရှင်းပေးရန် လိုအပ်ကြောင်း တိုင်းလိုင် (ရှမ်းနီ) အမျိုးသားများဖွံ့ဖြိုး တိုးတက်ရေးပါတီ၏ ဗဟိုအလုပ်အမှုဆောင်အဖွဲ့ဝင် အမျိုးသမီးတစ်ဦးက သျှမ်းသံတော်ဆင့် ကို ပြောသည်။
“အတင်းထည့်လိုက်တဲ့အခါမှာတော့ လူမျိုးနဲ့ လူမျိုးနာမည်ကို ဖျောက်တယ်လို့မြင်မိတယ်၊ ဒီကိစ္စနဲ့ ပတ်သက်ပြီး ကျမတို့ရဲ့ လူမျိုးနာမည်ပေါ်ပေါက်ဖို့ ဖေါ်ထုတ်ဖို့က ကျမတို့ပါတီရဲ့ ရည်ရွယ်ချက်တစ်ခုလည်းဖြစ်တယ်၊ အဲ့ဒါ ကြောင့်မို့ ဒီကိစ္စကို ပြန်လည်ဖြေရှင်းပေးဖို့ ကျမတို့ လုပ်ဆောင်နေပါတယ်” ဟု သူမက ပြောသည်။
သျှမ်းနီတိုင်းရင်းသားများကို “ဗမာ” ဟု ပြောင်းလဲရေးသားခြင်းနှင့် ပတ်သက်ပြီး အာဏာသိမ်းစစ်ကောင်စီတို့၏ နိုင်ငံရေး အမြတ်ထုတ်ချင်သည့် ရည်ရွယ်ချက်လည်းပါဝင်သည်ဟု သျှမ်းနီတိုင်းရင်းသား လူငယ် တစ်ဦးကလည်း ပြောသည်။
“စစ်ကောင်စီဘက်က လူဦးရေအချိုးအစားနဲ့ လွှတ်တော်ထဲကို အမတ်တင်သွင်းတဲ့စနစ် PR စနစ်နဲ့ ရွေးကောက်ပွဲ ကျင်းပမယ်ဆိုတော့ အခုဖြစ်သွားတဲ့ မိုးကောင်းမြို့နယ်မှာက ကချင်နဲ့ သျှမ်းလူဦးရေက မတိမ်းမယိမ်းရှိနေတယ်၊ သျှမ်းနီဆိုလည်း သျှမ်းနီလူမျိုးကို လျော့ချချင်ပြီး နိုင်ငံရေးအမြတ်ထုတ်ချင်တယ်လို့ မြင်မိတယ်” ဟု အဆိုပါ လူငယ်က ပြောသည်။
သျှမ်းနီတိုင်းရင်းသားများက သျှမ်းနီလူမျိုး တရားဝင်သတ်မှတ်ပေးရေးကို သျှမ်းနီအမျိုးသားညီလာခံမှ တစ်ဆင့် တညီတညွတ်တည်း တောင်းဆိုမှုများပြုလုပ်ခဲ့ကြပေမယ့် မြန်မာပြည် အစိုးရအဆက်ဆက် တို့သည် သျှမ်းနီတိုင်းရင်းသားများကို မှတ်ပုံတင်ထည့်သွင်းရေးသားခွင့် မပြုခဲ့ကြောင်း သိရသည်။
Leave a Comments