သျှမ်းပြည် လားရှိုးမြို့နယ်ရှိ ကိုးကန့်တပ်ဖွဲ့ မှ ဟန်နားကျေးရွာအုပ်စုအတွင်း အိမ်ထောင်စုစာရင်း တောင်းခံရန် ကျေးရွာဥက္ကဋ္ဌကို ဖမ်းဆီးခေါ်ဆောင်သွားပြီးနောက် အာမခံဖြင့် ပြန်လွှတ်ပေးခဲ့ကြောင်း စုံစမ်းသိရသည်။
ဇွန်လ (၅) ရက် ညနေ ၆ နာရီအချိန်တွင် လားရှိုးမြို့နယ်ရှိ ကိုးကန့်တပ်ဖွဲ့ MNDAA မှ လောင်ခိုင် ဆိုသူ ဦးဆောင်သည့်အဖွဲ့သည် ဟန်နားကျေးရွာသို့ ရောက်ရှိလာပြီး ဥက္ကဋ္ဌ ဦးဆန်ကြာ ကို ဖမ်းဆီးခေါ်ဆောင်သွားခဲ့ပြီး ဟန်နားကျေးရွာအုပ်စုအတွင်းရှိ အိမ်ထောင်စုစာရင်းများကို လာရောက်ပေးပို့မှသာ ပြန်လွှတ်ပေးမည်ဟု ပြောဆိုခဲ့ကြောင်း လားရှိုးဒေသခံများထံမှ သိရသည်။
MNDAA မှ ဥက္ကဋ္ဌ ဦးဆန်ကြာကို စဉ့်အင်ဘက်ရှိ နားလန်း(ဝၢၼ်ႈၼႃးလၢင်း)ရွာတွင် တစ်ည ဖမ်းဆီးထားပြီး ယမန်နေ့ (ဇွန်လ ၆ ရက်) တွင် ဟန်နားနှင့် နားလန်းရွာမှ ပြည်သူ (၁၀) ဦးမှ သွားရောက်ထောက်ခံပေးပြီးနောက် ပြန်လည်လွတ်မြောက်လာခဲ့ကြောင်း လားရှိုးဒေသခံတစ်ဦးက ပြောသည်။
“ဉက္ကဋ္ဌ လုံးဆန်ကြာကို ကိုးကန့်တပ်က ညနေ ၆ နာရီမှာ လာဖမ်းသွားတာ။ ဟန်နားအုပ်စုထဲက အိမ်ထောင်စုစာရင်း အားလုံးပေးဖို့ ပြောတယ်၊ စာရင်းလာမပေးရင် သူ့ကို သိန္နီဘက်ကို ပို့လိုက်မယ်လို့ ပြောတာ။ မနေ့က ဟန်နားနဲ့ နားလိုင်က ပြည်သူ (၁၀) ယောက် သွားထောက်ခံပြီးမှ ကိုးကန့်က ပြန်လွှတ်ပေးတာ၊ အိမ်ထောင်စုစာရင်း မပို့ပေးရင် သူတို့စစ်သားကိုယ်တိုင် ရွာထဲ လာကောက်မယ်လို့ ပြောတယ်”ဟု လားရှိုးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
လားရှိုးမြို့ပေါ်မှ ကိုးကန့်တပ်ဖွဲ့ တပ်မဆုတ်ခွာခင် ပြီးခဲ့သည့် ဧပြီလကတည်းက မြို့ပြင်ရှိ ဟန်နား၊ စဉ့်အင်နှင့် မောက်တောင်း ကျေးရွာအုပ်စုများတွင် MNDAA မှ အိမ်ထောင်စုစာရင်းများ တောင်းခံခဲ့ကြောင်း ဒေသခံများထံမှ သိရသည်။
အလားတူ သီပေါမြို့နယ် မိုင်းလင်းကျေးရွာအုပ်စုရှိ မန်မိုင်မိုက်နင်(မႆႉၼိမ်)ရွာမှ ကျေးရွာဥက္ကဋ္ဌနှင့် ရှေ့မီနောက်မီ လူကြီး (၂) ဦးတို့ကိုလည်း အိမ်ထောင်စုစာရင်း အကြောင်းပြကာ ကိုးကန့်တပ်ဖွဲ့မှ ဇွန်လပထမပတ်အတွင်း ဖမ်းဆီးခေါ်ဆောင်သွားခဲ့ပြီး ယမန်နေ့ (ဇွန်လ ၆ ရက်) တွင် ပြန်လွှတ်ပေးခဲ့ကြောင်း ဒေသခံများက ပြောသည်။
“မိုက်နိမ် ရွာသူကြီးကိုလည်း ကိုးကန့်တွေ ဖမ်းသွားပြီး ပြန်လွှတ်လာတာ မကြာသေးဘူး၊ ဒါပေမယ့် ရွာထဲက ရှေ့မီနောက်မီ လူကြီး ၂ ယောက်ကို အစားထိုး ပြန်ခေါ်သွားတာ။ ရွာသားတွေ ကိုးကန့်ကို အိမ်ထောင်စုစာရင်း သွားပို့မှ မနေ့က ပြန်လွှတ်ပေးတာ”ဟု လားရှိုးဒေသခံ ၎င်းအမျိုးသားက သျှမ်းသံတော်ဆင့်ကို ဆက်ပြောသည်။
ထို့အပြင် လားရှိုးမြို့နယ် နမ့်ပေါင်၊ ခေးနင်း၊ မန်ပျဉ်နှင့် နောင်မွန်ကျေးရွာအုပ်စုများတွင် ကိုးကန့်တပ်ဖွဲ့ MNDAA မှ ခံတုတ်ကျင်းများ အသစ်ထပ်မံတူးဖော်ပြီး စစ်ရေးပြင်ဆင်သကဲ့သို့ လုပ်ဆောင်လာခြင်းကြောင့် တိုက်ပွဲထပ်မံ ဖြစ်ပွားမည်ကို ဒေသခံများ စိုးရိမ်နေကြောင်း သိရသည်။
ဇွန်လ (၁) ရက်တွင် လားရှိုးမြို့နယ် ဟန်နားကျေးရွာအုပ်စုအတွင်း ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) နှင့် ကိုးကန့်တပ်ဖွဲ့ MNDAA တို့အကြား တစ်ရက်တည်း ထိတွေ့တိုက်ပွဲ နှစ်ကြိမ်ဖြစ်ပွားခဲ့ကြောင်း လားရှိုးဒေသခံများက ပြောသည်။
လားရှိုးမြို့နယ်အတွင်း ဖြစ်ပွားခဲ့သည့် ထိတွေ့တိုက်ပွဲနှင့် ပတ်သက်၍ SSPP/SSA စစ်ကြောင်းထွက်နေချိန် ကိုးကန့်တပ်ဖွဲ့ MNDAA ၏ တပ်မ (၆၁၁) လက်အောက်ခံတပ်မှ ခြုံခိုဝင်ရောက် တိုက်ခိုက်ခဲ့ခြင်းကြောင့် နှစ်ဘက်တပ်ဖွဲ့ အပြန်အလှန် တိုက်ပွဲဖြစ်ပွားခဲ့ရာ ကိုးကန့်တပ်သား (၈) ဦး ကျဆုံးပြီး ဒဏ်ရာရသူရှိကြောင်း SSPP Info မှ ဇွန်လ (၁) ရက်တွင် သတင်းထုတ်ပြန်ခဲ့သည်။
Leave a Comments