Thursday, December 1, 2022

သျှမ်းအမျိုးသားကျောင်းများ ပြန်လည်ဖွင့်လှစ်ရန် လိုအပ်

Must read

သျှမ်းပြည် တောင်ပိုင်းအတွင်း မြောက်ပိုင်းမဟာမိတ်တပ်ဖွဲ့နှင့် RCSS တို့ နယ်မြေစိုးမိုးရေး တိုက်ပွဲများကြောင့် ပိတ်ထားခံရသည့် သျှမ်းအမျိုးသားကျောင်းများ ပြန်လည်ဖွင့်လှစ်ရန် ပြည်သူများက တောင်းဆိုလိုက်သည်။

ထိုကျောင်းများသည် သျှမ်းပြည်တောင်ပိုင်း ကျေးသီး၊ မိုင်းကိုင်၊ လဲချားနှင့် ပင်လုံမြို့နယ်တို့တွင် ရှိနေကြောင်း သိရသည်။

ပြီးခဲ့သည့် ၂၀၂၁ နှစ်ကုန်ပိုင်းမှ စတင်ကာ ယခု ၂၀၂၂ ခုနှစ် ဖေဖော်ဝါရီလအထိ တိုက်ပွဲများဖြစ်ပွားမှုကြောင့် ဒေသခံပြည်သူများစစ်ရှောင်နေရပြီး ဒေသခံကိုယ်ထူကိုယ်ထ တည်ဆောက်ထားသော သျှမ်းအမျိုးသားကျောင်း ၅၀ ကျော်လည်း ပိတ်ထားခဲ့ရကြောင်း ဒေသခံများက ပြောသည်။

“တိုက်ပွဲဖြစ်ပြီဆိုတာနဲ့ ဆရာ/ဆရာမတွေလည်း ဘယ်နေရဲမလဲ၊ ရှောင်ကြရတာပေါ့။ ရှောင်တော့ ကလေးတွေ ပညာရေးပဲထိခိုက်တာပေါ့နော်။ ပြန်ဖွင့်ပေးဖို့လိုအပ်တယ်” ဟု မိုင်းလင်းကျေးရွာအုပ်စုမှ ကျောင်းဆရာတစ်ဦးက သျှမ်းသံတော်ဆင့်ကို ပြောသည်။

အဆိုပါကျောင်းများသည် ဒေသခံများမှ ကိုယ်ထူကိုယ်ထစနစ်ဖြင့်ဆောက်ထားသည့်ကျောင်းများဖြစ်ပြီး ကိုဗစ်ကာလ၊ နိုင်ငံရေးမတည်ငြိမ်မှုကြောင့် စီးပွါးရေးခက်ခဲသည့် ဒေသခံများက ကျောင်းဆရာ/ဆရာမ များအတွက် လုပ်အားခ၊ ဉာဏ်ပူဇော်ခ အပြည့်အဝ မပေးနိုင်ခဲ့ကြောင်းလည်း အထက်ပါကျောင်းဆရာ က ပြောသည်။

သျှမ်းပြည်အတွင်း သျှမ်းကိုယ်စားပြုလက်နက်ကိုင်တပ်ဖွဲ့ ၂ ဖွဲ့က ထိုသို့ ပစ်ခတ်တိုက်ခိုက်မှုများကြောင့် ဆရာ/ ဆရာမများနှင့် ဒေသခံများ စစ်ရှောင်နေရပြီး တချို့ပြည်သူများသည် ထိုင်းနိုင်ငံသို့ ထွက်ပြေးနေရသည်။

လက်ရှိအချိန်တွင် တိုက်ပွဲများ ငြိမ်နေပြီဖြစ်သော်လည်း ရွာသားများအနေဖြင့် ပြန်လည်ထူထောင်မှုများ လုပ်ဆောင်နေရသောကြောင့် ပိတ်ထားရသည့်ကျောင်းများ ပြန်မဖွင့်နိုင်သေးပေ။

ထို့ကြောင့် မိုင်းလင်းကျေးရွာအုပ်စုမှ သျှမ်းအမျိုးသားကျောင်း အပါအဝင် ကျေးသီး၊ မိုင်းကိုင်၊ လဲချား၊ ပင်လုံ မြို့နယ်များအတွင်းရှိ ပိတ်ထားရသည့် သျှမ်းအမျိုးသားကျောင်းများအတွက် ဆရာ/ဆရာမ များနှင့် ကျောင်းသုံးပစ္စည်းများအား ကူညီပံ့ပိုးပေးမည့် အလှူရှင်/အဖွဲ့အစည်းများရှိပါက ဒေသတွင်းကလေးငယ်များ တိုးတက်ရေးရှေးရှု၍ ကျောင်းများပြန်လည် ဖွင့်လှစ်လိုကြောင်း ဒေသခံများက ပြောဆိုလိုက်သည်။

“ဘယ်အဖွဲ့အစည်းမဆို အမျိုးသားရေးအတွက်လုပ်နေတယ်ဆိုရင်ပေါ့၊ ဒီကလေးတွေပညာရေးကိုလဲ အမျိုးသားရေး အမြင်နဲ့မြင်ပြီး ထောက်ပံ့ကူညီပေးစေလိုပါတယ်၊ အခုတိုက်ပွဲလည်း ငြိမ်ပြီဆိုတော့ ကျနော်တို့ ဒေသခံအနေနဲ့ဆိုရင် ကလေးတွေရဲ့ ပညာရေးကို ရှေးရှုပြီး ပြန်ဖွင့်ချင်တာပေါ့” ဟု ပညာရေးကဏ္ဍတွင် ပါဝင်လှုပ်ရှားသည့် အမည်မဖော်လိုသူ ဒေသခံအမျိုးသားက သျှမ်းသံတော်ဆင့်ကို ပြောသည်။

လက်ရှိ သျှမ်းအမျိုးသားကျောင်းများပိတ်ခံထားရသည့်နေရာသည် သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA) တို့ နယ်မြေစိုးမိုးထားသည့်နေရာဖြစ်ကြောင်း သိရသည်။

ယင်းကိစ္စနှင့် ပတ်သက်ပြီး ဒေသအတွင်း သွားလာလှုပ်ရှားနေသည့် SSPP/SSA တပ်ဖွဲ့၏ ပြောရေးဆိုခွင့်ရှိသူ ဗိုလ်မှူး ဖုန်းဟန်ကို ဖုန်းဖြင့်ဆက်သွယ်မေးမြန်းရာ ဒေသတွင်းနှင့် ပညာရေးဖွံ့ဖြိုးတိုးတက်မှုအပိုင်းကို လှုပ်ရှားဆောင်ရွက်မည်ဖြစ်ကြောင်း သျှမ်းသံတော်ဆင့်ကို ပြောသည်။

“ပညာရေးအပိုင်းမှ မဟုတ်ဘူး ဒေသတွင်းဖွံ့ဖြိုးတိုးတက်မှုတွေ ကျနော်တို့ တတ်စွမ်းသလောက် လုပ်ဖို့ ပေါ်လစီအရလည်း ရှိပြီးသား၊ ဘာတွေကို ဘယ်လိုနေရာမှာ လိုအပ်လဲဆိုတာ ပြောပြလို့ရတယ်၊ တင်ပြလို့ရတယ်၊ ကျနော်တို့ဘက်ကနေ ကူညီထောက်ပံ့ပေးဖို့ အသင့်ပါပဲ” ဟု ဗိုလ်မှူး ဖုန်းဟန်က ပြောသည်။

ထို့အပြင် ထွက်ပြေးတိမ်းရှောင်နေသည့် ပြည်သူများနှင့် ဆရာ/ဆရာမများကိုလည်း စိုးရိမ်ကြောက်လန့်မှု မဖြစ်ကြရန်နှင့် ဒေသတွင်း ဖွံ့ဖြိုးတိုးတက်ရေး၊ ပညာရေးပိုင်း ဖွံ့ဖြိုးတိုးတက်ရေး အတူတကွ လက်တွဲ ဖော်ဆောင်ရန်အတွက် ပိတ်ပင်တားဆီးမှုမရှိကြောင်းလည်း ဗိုလ်မှူး ဖုန်းဟန်က ဆက်ပြောသည်။

သျှမ်းပြည်တောင်ပိုင်း ကျေးသီး၊ မိုင်းကိုင်၊ လဲချား၊ ပင်လုံ၊ မိုင်းနောင် စသည့်မြို့နယ်အသီးသီးတွင် မူလတန်းနှင့် မူလွန်အဆင့် သျှမ်းအမျိုးသားကျောင်းများစွာရှိနေပြီး ဒေသတွင်းကျေးရွာနေ ကလေးသူငယ်များ၏ ပညာသင်ယူရာ ဖြစ်ကြောင်းလည်း သိရသည်။

Leave a Comments

- Advertisement -spot_img

Latest article