Thursday, December 1, 2022

တန့်ယန်းလွယ်လွမ့် ပရဟိတကျောင်း ကလေးများ စာသင်ကြားရန် အခက်ခဲကြုံနေ

Must read

သျှမ်းပြည် မြောက်ပိုင်း တန့်ယန်းမြို့နယ်ရှိ လွယ်လွမ့် ပရဟိတစာသင်ကျောင်းတွင် ကလေးများ စာပေသင်ကြားရန် အခက်ခဲ ကြုံနေကြောင်း သတင်းသိရသည်။

တန့်ယန်းမြို့နယ်အတွင်း ကိုဗစ် ကူးစက်မှု မြင့်တက်လာသည့်နောက်ပိုင်း အလှူရှင်များလည်း လျော့နည်းသွားသည့်အတွက် ကလေးများစာသင်ကြားရန်နှင့် နေထိုင်စားသောက်ရန်အတွက် ပိုမိုခက်ခဲလာတာဖြစ်ကြောင်း လွယ်လွမ့် ပရဟိတကျောင်းမှ အမျိုးသား တစ်ဦးက သျှမ်းသံတော်ဆင့်ကို ပြောသည်။

“အခက်ခဲတွေက များတယ်၊ ဆရာ/မ တွေကို လစာပေးဖို့လည်းမရှိဘူး၊ ကျနော်တို့ဆီမှာက ကလေးတွေ အားလုံး အယောက် ၉၀ ကျော်ရှိတယ်၊ သူတို့ စားသောက်ဖို့လည်း အခက်ခဲတွေ ဖြစ်နေတယ်၊ ပြီးတော့ စာသင်ခန်း၊ ရေချိုးတဲ့နေရာ၊ အိမ်သာ နဲ့ ကလေးတွေ အိပ်ဖို့နေရာတွေလည်း အခက်ခဲဖြစ်နေ” ဟု ပရဟိတကျောင်းမှ အမျိုးသားက ပြောသည်။

အဆိုပါကျောင်းတွင် ဆရာ/မ ၇ ဦးနှင့် ကျောင်းသား/သူ ၉၀ ကျော် ရှိနေသည်။


ဒါ့အပြင် အကျယ် ၁၈ပေနှင့် အရှည် ပေ ၁ထောင်ကျော် ရှိသည့် ပရဟိတကျောင်းအဝင်လမ်းအား ကတ္တရာလမ်း ခင်းနေသည့်အတွက် ကျောက်၊ သဲများ ဝယ်ယူရန်နှင့် အလုပ်သမားစရိတ်များ ရှင်းပေးရန်လည်း အခက်ခဲဖြစ်နေကြောင်း သိရသည်။

ထို ပရဟိတကျောင်းသည် ကျောင်းတက်ရန် အခက်ခဲဖြစ်နေသည့် ကလေးများအား ကျောင်းစာပညာ သင်ကြားနိုင်ရန်အတွက် လွယ်လွမ့်ပရဟိတကျောင်းတွင် ပညာသင်ကြားပေးနေတာဖြစ်ကြောင်း သိရသည်။

“အဓိကတော့ ကျောင်းမနေရတဲ့ ကလေးတွေ ပညာသင်လို့ရအောင်ပါ၊ ကျောင်းထားဖို့ မိဘတွေ အခက်ခဲဖြစ်နေလို့ ကျောင်းမတက်ရတဲ့ ကလေးတွေရော၊ ရွာဘက်တွေမှာနေပြီး ကျောင်းမတက်ရတဲ့ ကလေးတွေအတွက် ကျနော်တို့ နိုင်သလောက် ခေါ်ပြီး စာသင်ပေးတယ်၊ ကျွေးမွေးထားတယ်၊ နေဖို့လည်း စီစဉ်ပေးထားတာပါ။ ခု အခက်ခဲတွေဖြစ်နေလို့ စေတနာရှင်တွေကို ဖိတ်ခေါ်လိုပါတယ်” ဟု အထက်ပါ အမျိုးသားက ဆက်ပြောသည်။

လွယ်လွမ့် ပရဟိတကျောင်း ဖွင့်လှစ်ခဲ့သည်မှာ ၄ နှစ်ရှိပြီဖြစ်ပြီး တန့်ယန်းမြို့ ၏ တောင်ဘက် ၁ မိုင်ခန့် အကွာတွင် တည်ရှိသည်။

အဆိုပါ ပရဟိတကျောင်းအား ဒေသခံများ၊ သံဃာတော်များနှင့် စေတနာရှင်တို့မှ စုပေါင်း ဖွင့်လှစ်ထားခဲ့တာဖြစ်ကြောင်း သိရသည်။

Leave a Comments

- Advertisement -spot_img

Latest article