သျှမ်းပြည် တန့်ယန်းမြို့တွင် ရွေးကောက်ပွဲ၌ မဲမထည့်သူများကို ခရီးသွားလာခွင့် ကန့်သတ်မည်ဟု စစ်ကော်မရှင်လက်အောက်ခံဝန်ထမ်းများက ခြိမ်းခြောက်ပြောဆိုခဲ့ကြောင်း စုံစမ်းသိရသည်။

လာမည့် ဇန်နဝါရီလ (၁၁) ရက်တွင် ပြုလုပ်မည့် ရွေးကောက်ပွဲ ဒုတိယပိုင်းတွင် သျှမ်းပြည်မြောက်ပိုင်းမှ တန့်ယန်းနှင့် မိုင်းရယ် (၂) မြို့နယ် ပါဝင်သည်။

ယခု ဇန်နဝါရီလဆန်းပိုင်းမှ စတင်ပြီး တန့်ယန်းမြို့နယ်တွင် ရွေးကောက်ပွဲအတွက် ကြိုတင်မဲများကို စတင်ထည့်ခိုင်းလျက်ရှိရာ မဲမထည့်သူများကို ခရီးသွားလာခွင့် ကန့်သတ်မည်ဟု စစ်ကော်မရှင်လက်အောက်ခံ ဌာနဆိုင်ရာ ဝန်ထမ်းများက ခြိမ်းခြောက်ပြောဆိုခဲ့ကြောင်း တန့်ယန်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“အိမ်ကလူတွေ မဲမထည့်ချင်ဘူး ပြောနေလို့ ရပ်ကွက်လူကြီးက မထည့်လို့ မရဘူးလို့ လာပြောနေတာ။ မဲမထည့်တဲ့လူကို ဂိတ်တွေရောက်ရင် ပေးမဖြတ်ဘူး၊ ခရီးထွက်လို့ မရဘူးလို့ အဲ့လိုခြိမ်းခြောက်နေတာ။ မဲသွားမထည့်ရင် အရေးယူမယ်လို့ ပြောသံကြားပေမယ့် အချိန်မတန်သေးတော့ တကယ်လုပ်မလား မလုပ်ဘူးလားဆိုတာတော့ မပြောတတ်ဘူး” ဟု တန့်ယန်းဒေသခံ ၎င်းအမျိုးသားက သျှမ်းသံတော်ဆင့်ကို ပြောသည်။

လက်ရှိတွင် မဲရုံစောင့်တာဝန်ကျသူများ ကြိုတင်မဲ ထည့်ထားရပြီး လာမည့် ဇန်နဝါရီ (၁၁) ရက်တွင် ကျင်းပမည့် ရွေးကောက်ပွဲ ဒုတိယပိုင်း၌ တန့်ယန်းမြို့နယ်ရှိ ပြည်သူများ မဖြစ်မနေ မဲသွားထည့်ရန် စစ်ကော်မရှင်လက်အောက်ခံ အထွေထွေအုပ်ချုပ်ရေးဦးစီးဌာန ဝန်ထမ်းများမှ ရပ်ကွက်/ ကျေးရွာ အုပ်ချုပ်ရေးမှူးများထံ ညွှန်ကြားထားကြောင်း သိရသည်။

အကယ်၍ ရွေးကောက်ပွဲကျင်းပပြီးနောက် ဆန္ဒမဲ ရေတွက်ရာတွင် နိုင်ငံရေးပါတီများမှ မဲအရေအတွက် မတိမ်းမယိမ်း ရရှိပါက ရပ်ကွက်အတွင်း မဲပေးခဲ့သူနှင့် မဲမပေးသူများကို ပြန်လည်စစ်ဆေးသွားမည်ဟု ဆိုသည်။

“တကယ်လို့ အနိုင်ရတဲ့ မဲအရေအတွက်က နှစ်မဲ သုံးမဲ အဲ့လောက်ပဲ ကွာတယ်ဆိုရင် ရပ်ကွက်ထဲ ပြန်စစ်မယ်။ ဘယ်အိမ်က ဘယ်သူက မဲသွားမပေးဘူးဆိုရင် အရေးယူခံရမယ်လို့ ပြောတယ်။ အခုကတော့ ကြိုတင်မဲတွေ ကောက်နေတယ် တစ်ပတ်လောက်ရှိပြီ။ ပါတီကတော့ ကြံ့ခိုင်ရေးနဲ့ ကျားဖြူရှိမယ်၊ ‘ဝ’ပါတီကတော့ ပြည်သူ့လွှတ်တော် နေရာပဲ ဝင်ပြိုင်တာ” ဟု တန့်ယန်းဒေသခံ ၎င်းအမျိုးသားက ဆက်ပြောသည်။

တန့်ယန်းမြို့နယ် မဲဆန္ဒနယ်တွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ၊ ရှမ်းနှင့်တိုင်းရင်းသားများ ဒီမိုကရက်တစ်ပါတီ (SNDP ကျားဖြူပါတီ) နှင့် ‘ဝ’အမျိုးသားပါတီ (WNP) တို့ ဝင်ရောက်ယှဉ်ပြိုင်ပြီး မြို့မရပ်ကွက် (၁၀)ရပ်ကွက်၊ ကျေးရွာအုပ်စု (၂၆)အုပ်စုတွင် မဲရုံ စုစုပေါင်း (၆၀) ရှိကြောင်း သိရသည်။

အလားတူ မိုင်းရယ်မြို့နယ် မဲဆန္ဒနယ်တွင် ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ (USDP) ၊ ရှမ်းနှင့်တိုင်းရင်းသားများ ဒီမိုကရက်တစ်ပါတီ (SNDP ကျားဖြူပါတီ) နှစ်ပါတီသာ ဝင်ရောက်ယှဉ်ပြိုင်ပြီး မြို့ပေါ်ရပ်ကွက် (၃) ရပ်ကွက်နှင့် ကျေးရွာအုပ်စု (၁၃)အုပ်စုတွင် မဲရုံ(၂၉)ရုံ ရှိကြောင်း စစ်ကော်မရှင်လက်အောက်ခံ ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ထုတ်ပြန်ထားသည်။

ထို့အပြင် မိုင်းရယ်မြို့နယ်အတွင်း ကိုးကန့်တပ်ဖွဲ့ MNDAA တပ်စွဲထားသည့် လွယ်ငင်းနှင့် ဟိုယကျေးရွာအုပ်စုမှ ဒေသခံများမှာ ရွေးကောက်ပွဲတွင် ဆန္ဒမဲပေးရမည့် စာရင်းထဲ ပါဝင်ထားပြီး စာသင်ကျောင်းများတွင် မဲရုံပြင်ဆင်ထားကြောင်း ဒေသခံများထံမှ သိရသည်။

သို့သော် ဒီဇင်ဘာလ (၅) ရက်တွင် စစ်ကော်မရှင်လက်အောက်ခံ ပြည်ထောင်စုရွေးကောက်ပွဲကော်မရှင် UEC ထုတ်ပြန်သည့် ရွေးကောက်ပွဲ ကျင်းပခြင်းမပြုမည့် နယ်မြေစာရင်းတွင် တန့်ယန်းမြို့နယ်မှ ကျေးရွာအုပ်စု (၁၆) စု၊ မိုင်းရယ်မြို့နယ်မှ ကျေးရွာအုပ်စု (၈) အုပ်စု ပါဝင်သည်။

“ကိုယ်စားလှယ်လောင်းတွေကတော့ အပြောင်းအလဲဖြစ်အောင် လုပ်ပေးမယ် သူတို့ကို မဲထည့်ပါလို့ ပြောတာပဲ။ သူတို့ နိုင်နိုင်ရှုံးရှုံး အခြေအနေက ဒီတိုင်းပဲ ဖြစ်နေမှာဆိုတော့ ဘာမှမထူးခြားဘူးလို့ မြင်တယ်။ အကုန်လုံးက စစ်တပ်လက်ထဲမှာပဲ ရှိတာလေ၊ ငါးမျှားသလိုပေါ့ ခြင်းတစ်ခုထဲ ငါးအကုန်ဝင်အောင် လုပ်ထားပြီးသားလေ။ မဲထည့်တဲ့လူ များလည်း သူတို့နိုင်မှာပဲ၊ နည်းလည်း သူတို့နိုင်မှာပဲ” ဟု မိုင်းရယ်ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ရွေးကောက်ပွဲ ပထမပိုင်း ကျင်းပပြီးနောက် ဒီဇင်ဘာလ (၂၉) ရက်တွင် စစ်ကော်မရှင်နှင့် MNDAA ကိုယ်စားလှယ်များ လားရှိုးမြို့၌ ထပ်မံတွေ့ဆုံ ဆွေးနွေးခဲ့ရာ ကိုးကန့်တပ်ဘက်မှ လားရှိုး-သီပေါ-မိုင်းရယ်ကြားတွင် ဖွင့်လှစ်ထားသည့် စစ်ဆေးရေးဂိတ်များ ဆုတ်ခွာပိတ်သိမ်းရန် သဘောတူခဲ့ကြောင်း စစ်ရေးသတင်းရင်းမြစ်တစ်ဦးက ပြောသည်။

သျှမ်းပြည်မြောက်ပိုင်းတွင် ရွေးကောက်ပွဲ ဒုတိယပိုင်း ကျင်းပမည့် တန့်ယန်းမြို့နယ်တွင် ပြီးခဲ့သည့် ၂၀၂၄ ခုနှစ် ဇူလိုင်လအတွင်း စစ်ကော်မရှင် သဘောတူညီမှုဖြင့် ‘ဝ’တပ်ဖွဲ့ UWSA ဝင်ရောက်တပ်စွဲထားပြီး မိုင်းရယ်မြို့နယ်တွင်လည်း ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA လည်း အလားတူ ဝင်ရောက်တပ်စွဲခဲ့သည်။