သျှမ်းပြည်မြောက်ပိုင်း တန့်ယန်းမြို့တွင် နှစ်နှစ်ကျော်ကာလအတွင်း ကေတီဗွီ (KTV)နှင့် အနှိပ်ခန်းများ ပေါများလာကြောင်း ဒေသခံပြောဆိုချက်အရ သတင်းရရှိသည်။

ပြီးခဲ့သည့် ၂၀၂၃ နှစ်ဆန်းပိုင်းမှ စတင်ပြီး ယခုလက်ရှိအချိန်ထိ စစ်ကော်မရှင်တပ်နှင့် ‘ဝ’တပ်ဖွဲ့ UWSA တို့ ပူးတွဲထိန်းချုပ်ထားသည့် တန့်ယန်းမြို့တွင် ကေတီဗွီ KTV နှင့် အနှိပ်ခန်းများ ပေါများလာပြီး ဆိုင်ပေါင်း ၆၀ ခန့်အထိ ရှိလာကြောင်း တန့်ယန်းမြို့ဒေသခံ အသက် ၃၀ ဝန်းကျင် ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

“အနှိပ်ဆိုင်တွေက ဆိုင်ပေါင်း ၄၀ ၊ ၅၀ လောက်ရှိတယ်။ ရပ်ကွက်( ၂ )မှာကိုပဲ ဆိုင်ပေါင်း ၂၀ ကျော် လောက်ရှိတယ်။ KTV ၊ မာဆတ်တို့ အကုန်ပေါင်းရင် ဆိုင်ပေါင်း ၆၀ ဝန်းကျင်လောက် ရှိကို ရှိတယ်။ အခုက ဒီမှာ အရမ်းများလာတယ်”ဟု တန့်ယန်းမြို့ အသက် ၃၀ ဝန်းကျင် ၎င်းဒေသခံ အမျိုးသားက ပြောသည်။

တန့်ယန်းမြို့တွင် ၂၀၂၂ ခုနှစ်အထိ KTV နှင့် အနှိပ်ခန်း ၁၀ ဆိုင်ခန့်သာ ရှိခဲ့သော်လည်း လက်ရှိ ၂၀၂၅ စက်တင်ဘာလအထိ နှစ်နှစ်ကျော် ကာလအတွင်း ဆိုင်ပေါင်း ၅၀ ဝန်းကျင် ထပ်တိုးလာပြီး အချို့ဆိုင်များတွင် မူးယစ်ဆေးဝါးများလည်း အလွယ်တကူ ရရှိနိုင်ကြောင်း ၎င်းက ဆက်ပြောသည်။

ထိုကဲ့သို့ တန့်ယန်းမြို့အတွင်း KTV နှင့် အနှိပ်ခန်း ပေါများလာခြင်းကြောင့် အသက် ၁၅ နှစ် ကလေးအရွယ်များမှအစ လူငယ်များနှင့် လူလတ်ပိုင်းများအတွက် စိုးရိမ်စရာဖြစ်ကြောင်း တန့်ယန်းမြို့ အသက် ၄၀ ဝန်းကျင် ဒေသခံအမျိုးသား တစ်ဦးက ထပ်လောင်း ပြောသည်။

“ဒီလိုတွေ ပေါများလာတာကိုမျိုးတော့ မဖြစ်စေချင်ဘူး။ မျိုးဆက်သစ်တွေ အကျင့်ပျက်တာမျိုး ဖြစ်သွားနိုင်သလို လူ့အသိုင်းအဝိုင်းအတွက်လည်း မကောင်းဘူး။ အခန့်မသင့်ရင် HIV ရောဂါ ကူးစက်မှုတွေပါ ဖြစ်လာနိုင်တယ်။ ပြီးတော့ ဆိုင်တွေကလည်း အသက် ၁၈ နှစ်အောက် တွေတောင် ဝင်ရင် မတားဘူး”ဟု ၎င်းဒေသခံ အမျိုးသားက ပြောသည်။

တန့်ယန်းမြို့တွင် ပေါများလာသည့် KTV နှင့် အနှိပ်ခန်းတို့သည် ဌာနဆိုင်ရာများ ပါဝင်ပတ်သက်နေသည့်အပြင် တိုင်းရင်းသားလက်နက်ကိုင်များထံလည်း အခွန်ပေးဆောင်ရကြောင်း အမည်မဖေါ်လိုသည့် အသက် ၃၀ ဝန်းကျင် အမျိုးသားတစ်ဦးက ပြောသည်။

တန့်ယန်းမြို့တွင် ထိုကဲ့သို့ KTV နှင့် အနှိပ်ခန်း ပေါများလာခြင်းကြောင့် လူငယ်များ HIV ကဲ့သို့ လိင်မှတဆင့် ကူးဆက်တတ်သည့် ရောဂါပိုးများ ကူးစက်ပျံ့ပွားလာမည်ကို စိုးရိမ်နေရကြောင်း သိရသည်။