သျှမ်းပြည် တန့်ယန်းမြို့နယ်ရှိ ‘ဝ’ပြည်သွေးစည်းညီညွတ်ရေးတပ်မတော် UWSA မှ ပြည်သူ့စစ်သင်တန်း အတင်းအဓမ္မ ခေါ်ယူစုဆောင်းနေခြင်းကြောင့် ဒေသခံများ ထွက်ပြေးတိမ်းရှောင်နေရကြောင်း စုံစမ်းသိရသည်။

မေလဆန်းပိုင်းမှ စတင်ပြီး တန့်ယန်းမြို့နယ်အတွင်းရှိ ရပ်ကွက်နှင့် ကျေးရွာအုပ်စုများကို ‘ဝ’တပ်ဖွဲ့ UWSA ၏ (၁၇၁) စစ်ဒေသအောက် တပ်ရင်းများတွင် ရပ်ရွာလုံခြုံရေး အကြောင်းပြကာ ပြည်သူ့စစ်အဖြစ် စစ်သင်တန်းတက်ရောက်ရန် အတင်းအဓမ္မ ခေါ်ယူစုဆောင်းနေခြင်းကြောင့် ဒေသခံများ ထွက်ပြေးတိမ်းရှောင်နေရကြောင်း တန့်ယန်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“သျှမ်းစစ်သား မဟုတ်တဲ့လူ အကုန်လုံး ‘ဝ’တပ်က ပေးတဲ့ စစ်သင်တန်း တက်ရမယ်လို့ ပြောတာ။ တခြားဒေသကိုတော့ မခေါ်သွားဘူး၊ ရပ်ရွာလုံခြုံရေးပဲ ပြန်လုပ်ခိုင်းမှာ အဲ့လိုစည်းရုံးတယ်။ တကယ်တမ်း စစ်သင်တန်း တက်ပြီးရင် သူတို့ အမိန့်အတိုင်း နာခံရမှာပဲ။ နားညုဘက်က သားနှစ်ယောက်ရှိတဲ့အိမ်တွေ ထွက်ပြေးနေရပြီ”ဟု တန့်ယန်းဒေသခံ ၎င်းအမျိုးသားက ပြောသည်။

မေလ ၂၂ ရက်တွင် တန့်ယန်းမြို့ အရှေ့ဘက်ရှိ ဝိန်းမိုင်၊ ဟွေကြိမ်၊ မိန်းကျိုင် စသည့် ကျေးရွာအုပ်စုများမှ ရွာသူကြီးများကို UWSA (၁၇၁) စစ်ဒေသအောက်မှ ဒုခေါင်းဆောင် တာ့ကော် ဆိုသူနှင့် တန့်ယန်းမြို့ ရပ်ကွက် (၆) နေ လုံးလူ ဆိုသူတို့မှ အစည်းအဝေး ခေါ်ယူခဲ့ပြီး စစ်မှုထမ်းသင်တန်း တက်ရောက်ရန် လူသစ်စုဆောင်းခိုင်းကြောင်း ပြောဆိုခဲ့သည်ဟု ဒေသခံများထံမှ သိရသည်။

သို့ရာတွင် ကျေးရွာအတွင်း အရွယ်ရောက်ပြီး အမျိုးသားများ မရှိတော့ခြင်းကြောင့် လူသစ်စုဆောင်းပေးရန် မဖြစ်နိုင်တော့ကြောင်း ရွာသူကြီးများဘက်မှ ပြန်လည်ပြောကြားခဲ့ရာ ကလေးနှစ်ယောက်ရှိသည့် နေအိမ်များမှ အသက်မပြည့်သူများလည်း ခေါ်ယူမည်ဖြစ်ကြောင်း လုံးလူ ဆိုသူက ခြိမ်းခြောက်ခဲ့သည်ဟု ဒေသခံများက ပြောဆိုသည်။

“ရွာလူကြီးတွေက လူမရှိတော့ဘူး၊ ရွာထဲရှိတဲ့ ယောကျ်ားတွေလည်း သျှမ်းတပ်ထဲ ရောက်ကုန်ပြီလို့ ပြောတာ။ အဲ့မှာ ‘ဝ’ဘက်က ပြန်ပြောတာ လူမရှိတာ မဖြစ်နိုင်ဘူး။ သူတို့ကို ပေးစရာ လူမရှိရင် ကလေး ၂ ယောက် ရှိတဲ့အိမ်က အသက်မပြည့်သေးလည်း ယူမယ်။ နောက်တစ်ပတ်အတွင်း မပေးနိုင်ရန် ဟုန်ပန်းခြံမှာ သွားဖြေရှင်းရမယ်လို့ ခြိမ်းခြောက်တယ်”ဟု တန့်ယန်းဒေသခံ ၎င်းအမျိုးသားက ထပ်လောင်းပြောသည်။

လက်ရှိတွင် နားညုကျေးရွာမှ အမျိုးသား ၄ ဦးမှာ UWSA ထံ စစ်သင်တန်း သွားတက်နေသော်လည်း တန့်ယန်းမြို့ အရှေ့ဘက်ခြမ်းရှိ ကျေးရွာများမှ ရွာသူကြီးများမှာ စစ်သင်တန်းစေလွှတ်ရန် လူသစ် မစုဆောင်းပေးနိုင်ခြင်းကြောင့် လုံခြုံရေးစိုးရိမ်ပြီး ထွက်ပြေးတိမ်းရှောင်နေရကြောင်း သိရသည်။

ထို့အပြင် ပြည်သူ့စစ်အဖြစ် စစ်မှုထမ်းသင်တန်း တက်ရောက်ရန် လူသစ်စုဆောင်းမည့်အကြောင်း UWSA တာဝန်ရှိသူများ၏ အစည်းအဝေးအတွင်း ပြောကြားချက်ကို မီဒီယာထံ ဓာတ်ပုံနှင့်တကွ သတင်းပေးပို့သည့် ရွာသားကိုလည်း ဖမ်းဆီးရန် ရှာဖွေနေကြောင်း အစည်းအဝေး တက်ရောက်ခဲ့သူတစ်ဦးက သျှမ်းသံတော်ဆင့်ကို ပြောသည်။

၂၀၂၅ မေလဆန်းပိုင်းမှ စတင်၍ UWSA အခြေချတပ်စွဲထားသည့် ယခင် မန်ပန်ပြည်သူ့စစ် ထိန်းချုပ်နယ်မြေများမှ ကျေးရွာအုပ်စုများ၊ တန့်ယန်း – လားရှိုး ဆက်သွယ်ထားသည့် ကားလမ်းမနှင့် တန့်ယန်း-ပန်ဆန်း ကားလမ်းမ မြောက်ဘက်ရှိ ကျေးရွာအုပ်စုများတွင် ပြည်သူ့စစ်အဖြစ် စစ်သင်တန်းတက်ရောက်ရန် အမိန့်ပေးညွှန်ကြားခဲ့သည်။

တန့်ယန်းမြို့နယ်တွင် UWSA ဘက်မှ တပ်သားသစ် စုဆောင်းခြင်း မဟုတ်ဘဲ ရပ်ရွာလုံခြုံရေးအတွက် ပြည်သူ့စစ် ခေါ်ယူခြင်းဖြစ်ပြီး ၎င်းတို့ကို ၂ လခန့် စစ်သင်တန်းပေးကာ လုံခြုံရေးအစီအမံ လုပ်ဆောင်ပေးခြင်းဖြစ်ကြောင်း ‘ဝ’ပြင်ပဆက်ဆံရေးတာဝန်ခံ ဦးညီရမ်းက သျှမ်းသံတော်ဆင့်ကို မေလ (၂၀) ရက်တွင် ဖြေကြားထားသည်။

အခြားတစ်ဘက်တွင် ထိုင်း-မြန်မာနယ်စပ်ရှိ UWSA တောင်ပိုင်း (၁၇၁) စစ်ဒေသမှ စစ်မှုထမ်းတပ်သားသစ်များ စစ်ရေးပြအခမ်းအနား ကျင်းပခဲ့ပြီး လက်နက်အမျိုးအစားများလည်း ထုတ်ဖော်ပြသခဲ့ကြောင်း မေလ (၂၇) ရက်တွင် WSTV မှ ရုပ်သံ သတင်းထုတ်ပြန်ခဲ့သည်။