သျှမ်းပြည်တောင်ပိုင်း ပင်လုံမြို့ ပန်ဟုန်ကျေးရွာအုပ်စု ဆမ်ဆန်ကျေးရွာရှိ ဘုန်းကြီးကျောင်းအတွင်း ဇရပ် မီးလောင်မှုဖြစ်ပွားကာ ကိုရင် ၂ ပါး ပျံလွန်တော်မူသွားပြီး ၁ ပါး ဒဏ်ရာအပြင်းအထန်ရရှိခဲ့ကြောင်း စုံစမ်းသိရှိရသည်။

ဖြစ်စဉ်မှာ မတ်လ ၁၆ ရက် ည ၁၀ နာရီဝန်းကျင်တွင် ဆမ်ဆန်ကျေးရွာရှိ ဘုန်းကြီးကျောင်းအတွင်း ကိုရင်များအိပ်နေသည့် ဇရပ်ဟောင်းတွင် မီးလောင်မှုဖြစ်ပွားကာ ကိုရင် ၂ ပါး မီးထဲပါသွားပြီး ပျံလွန်တော်မူသွားကြောင်း ပန်ဟုန်ကျေးရွာမှ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

“ အဲ့ ဇရပ်က ကိုရင်တွေ အိပ်တဲ့အဆောင်ဖြစ်တယ်။ ဇရပ်က နည်းနည်း ဟောင်းနေပြီ။ သစ်သား ဇရပ် ရေနံဆီသုတ်ထားတဲ့အဆောင်လိုမျိုးဖြစ်တယ်။ မီးလောင်ပြီးတော့ ကိုရင်နှစ်ပါး မီးထဲပါသွားတယ်။ တစ်ပါးကတော့ ဒဏ်ရာအပြင်းအထန် ရရှိခဲ့တယ်။ ညအချိန်မီးလောင်တော့ ကိုရင်တွေက အိပ်ပျော်နေလို့ မထွက်ပြေးနိုင်ခဲ့တာထင်တယ်” ဟု ပန်ဟုန်ကျေးရွာအုပ်စု ဒေသခံ အမျိုးသားတစ်ဦးက ပြောသည်။

မည်သည့်ကိစ္စကြောင့်မီးလောင်သွားသည်ကို မသိရှိရသေးကြောင်း၊ မီးလောင်သည့်ထဲတွင် ပျံလွန်တော်မူသွားသည့် ကိုရင်လေးများမှာ သက်တော် (၁၁)အရွယ် တစ်ပါး နှင့် (၁၂)နှစ်အရွယ် တစ်ပါး ဖြစ်ကြောင်း သိရသည်။

ဒဏ်ရာရရှိခဲ့သည့် ကိုရင်အား လွိုင်လင်ဆေးရုံသို့ ပို့ဆောင်ဆေးကုသနေပြီး သက်တော် (၁၄)နှစ်အရွယ်သာ ရှိသေးကြောင်း သိရသည်။

“ ကိုရင်လေးတွေက ငယ်သေးတယ်။ ဒဏ်ရာရသွားတဲ့ ကိုရင်လေးကိုတော့ လွိုင်လင်ဆေးရုံကို ပို့ဆောင်ထားပေးတယ်။ ဘာကြောင့် မီးလောင်မှုဖြစ်တာလည်းတော့ မသိဘူး။ ဆုံးရှုံးမှုတွေ ဘယ်လောက်ရှိနေလဲ မသိရသေးဘူး” ဟု အထက်ပါ အမျိုးသားက ပြောသည်။

ထိုမီးလောင်သည့် ဇရပ်ထဲတွင် ကိုရင် အပါး ၃၀ ခန့် နေထိုင်လျက်ရှိကြောင်း သိရသည်။

သျှမ်းပြည်အတွင်း‌ နွေဦးဝင်လာသည့် လက်ရှိရာသီတွင် မကြာခဏ မီးလောင်မှုဖြစ်ပွားနေပြီး ပြီးခဲ့သည့် မတ်လ ၉ ရက်နေ့တွင်လည်း တန့်ယန်းမြို့နယ် ရပ်ကွက် (၃)တွင် နေအိမ်မီးလောင်မှုဖြစ်ပွားခဲ့ကာ အသက် ၁၈ နှစ်အရွယ်ရှိ အမျိုးသမီး တစ်ဦး မီးထဲ သေဆုံးသွားရကြောင်း သိရသည်။