သျှမ်းပြည်တောင်ပိုင်း မိုင်းကိုင်မြို့နယ် ပြာဆိုင်ကျေးရွာတွင် မိသားစုလိုက် မြေမြုပ်မိုင်းနင်းမိပြီး အမျိုးသား သေဆုံးသွားကာ အမျိုးသမီးနှင့် ကလေး ဆေးကုသရန် ခက်ခဲနေကြောင်း စုံစမ်းသိရသည်။
ဖြစ်စဉ်မှာ မတ်လ ၁၂ ရက်တွင် မိုင်းကိုင်မြို့နယ် ပြာဆိုင်ကျေးရွာတွင် နေထိုင်သည့် မိသားစု (၃)ဦးသည် ကုန်းပေါင်းကျေးရွာသို့ လမ်းလျှောက်သွားရာ မြေမြုပ်မိုင်းနင်းမိသဖြင့် အမျိုးသားဖြစ်သူက သေဆုံးသွားပြီး၊ အမျိုးသမီး နှင့် ၃ နှစ် အရွယ် ကလေးတို့ ဒဏ်ရာပြင်းထန်စွာ ရရှိခဲ့ကြောင်း သိရသည်။
မြေမြုပ်မိုင်းနင်းမိသည့် နေရာသည် မိုင်းကိုင်မြို့နယ် ပန်ကေတု ကျေးရွာနှင့် ပန္နင်းကျေးရွာကြား လူသွားလမ်းတွင် ဖြစ်ပွားခဲ့သည်။ ထိုနေရာသည် တိုင်းရင်းသားလက်နက်ကိုင်တပ်ဖွဲ့များ မကြာခဏ တိုက်ပွဲဖြစ်ပွားသည့်နေရာဖြစ်သည်။
“ပန်ကေတု နဲ့ ပန္နင်းကြားမှာ နင်းမိတယ်။ မိုင်းနင်းမိတော့ အမျိုးသားက သေဆုံးသွားတယ်။ ကျန်နေတဲ့ အမျိုးသမီးနဲ့ ကလေးကတော့ ဒဏ်ရာရရှိခဲ့တယ်။ အခုတော့ သူတို့ကို ဆေးရုံပို့ထားပေးလိုက်တယ်။ ဆေးကုဖို့က ခက်ခဲနေတယ်” ဟု မိုင်းကိုင်မြို့နယ်အတွင်း ပရဟိတ လုပ်နေသည့် အမျိုးသား တစ်ဦးက သျှမ်းသံတော်ဆင့်ကို ပြောသည်။
မြေမြုပ်မိုင်းကြောင့် အမျိုးသမီးသည် ဝမ်းဗိုက်နား ဒဏ်ရာရရှိခဲ့ပြီး ကလေးတွင် ခြေတလုံးဒဏ်ရာ ရရှိခဲ့ကြောင်း၊ လက်ရှိမှာ လွိုင်လင်ဆေးရုံတွင် ဆေးကုသနေကြပြီး ဆေးဖိုးအတွက် အခက်အခဲဖြစ်နေကြောင်း သွားရောက်ကူညီပေးသည့် ပရဟိတ အဖွဲ့ဝင် အမျိုးသားက ပြောသည်။
“ သူတို့ (၃)ယောက်လုံးက မိသားစုတွေဖြစ်တယ်။ အမျိုးသားက ဆုံးသွားတယ်။ ကလေးအမေက ဝမ်းဗိုက်နား ဒဏ်ရာရတယ်။ သူတို့ သားက ခြေတလုံးနား ဒဏ်ရာရထားတယ်။ မိုင်းကိုင်ဆေးရုံက မနိုင်တော့ အခု လွိုင်လင်ဆေးရုံ ပို့လိုက်ရတယ် ” ဟု ကူညီပေးနေသည့် အမျိုးသားက ဆိုသည်။
ယခုနှစ်အတွင်း မိုင်းကိုင်မြို့နယ်တွင် မိုင်းနင်းမိသူ စုစုပေါင်း (၅)ဦး ရှိနေပြီး သေဆုံးသွားသူ (၂)ဦး ရှိနေကြောင်း ဒေသခံများ သတင်ပေးချက်အရ သိရသည်။
