သျှမ်းပြည်တောင်ပိုင်း မိုးနဲမြို့တွင် ယခုနှစ်အတွင်း ချောင်းရေများ ပိုခမ်းခြောက်လာသည့်အတွက် ပြည်သူများ သောက်သုံးရေ ခက်ခဲလာကြောင်း သတင်းရရှိသည်။
“ ကျမတို့မြို့က အဓိကတော့ ချောင်းရေ၊ မြစ်ရေတွေ သုံးကြတာလေ။ အခု နွေရာသီဆိုတော့ ရေက ခမ်းကုန်တာ။ ရေခမ်းတော့ ရေသုံးဖို့ အခက်ခဲဖြစ်တာပေါ့။ အဲ့ဒီ ချောင်းရေတွေကနေဘဲ သောက်ရေကော၊ သုံးရေကော သုံးကြတာလေ။ လယ်ထဲမှာ ရေသွင်းတဲ့ရေက သပ်သပ်ရှိသေးတယ်” ဟု မိုးနဲမြို့ ဒေသခံ အမျိုးသမီး တစ်ဦးက ပြောသည်။
အဆိုပါ ရေခမ်းခြောက်လာခြင်းသည် ကျောက်မီးသွေး တူးဖော်မှုများနှင့်လည်း သက်ဆိုင်မှုရှိနိုင်ကြောင်းနှင့် ချောင်းရေကို ပြန်လည်ပြုပြင်ခြင်း မရှိသောကြောင့် ရေခမ်းခြောက်လာကြောင်း သိရသည်။
“ ရေခမ်းခြောက်တာက ကျောက်မီးသွေးတူးတာနဲ့လည်း သက်ဆိုင်တယ်။ ကျောက်မီးသွေးက မိုးနဲမြို့နယ်ထဲတူးတာတော့ မဟုတ်ဘူး။ မိုးနဲ နဲ့ မောက်မယ်ကြားမှာ တူးတယ်လို့တော့သိရတယ်။ အဲ့ကနေ တူးလို့ ရေကြောထိမယ်ထင်တယ်။ ပြီးတော့ ပြည်သူတွေကလည်း ချောင်းရေကို သန့်ရှင်းရေးမလုပ်ဘူး။ ချုံတွေလည်းထူးလာတယ်။ သန့်ရှင်းရေးမလုပ်ပေးတော့ ရွံ့တွေလည်း တက်လာတာပေါ့” ဟု မိုးနဲဒေသခံ တစ်ဦးက ပြောသည်။
မိုးနဲမြို့နယ်အတွင်း ပြည်သူများက နားခါးချောင်းရေကို လယ်ယာတွင် အသုံးပြုနေလျက်ရှိပြီး နောင်ဥယာဉ်ချောင်းရေကိုတော့ သောက်သုံးရေအဖြစ် အသုံးပြုနေလျက်ရှိကြောင်း သိရသည်။
အဆိုပါ ရေခမ်းခြောက်မှုကြောင့် ရေကို ဝယ်ယူသုံးစွဲနေရပြီး ပြည်သူများအတွက် စားဝတ်နေရေးခက်ခဲမှု ရှိလာကြောင်း၊ လက်ရှိ နိုင်ငံရေးအခြေနေနှင့် ကိုဗစ် ၁၉ ကာလအတွင်း ပြည်သူများက လုပ်ငန်းရှားပါးနေသည့် အချိန်ဖြစ်ပြီး ဝင်ငွေလည်း နည်းပါးနေလျက်ရှိကြောင်း သိရသည်။
“ အခုတော့ ရေဝယ်သုံးရတာတွေလည်းရှိတယ်။ ထော်လဂျီ တစ်စီးကို ၃၅၀၀ ပေးရတယ်။ ဈေးတော့ မကြီးဘူးဆိုပေမယ့် အခုကာလ စားဝတ်နေရေးခက်ခဲနေတဲ့အချိန်လေ။ ဝင်ငွေလည်း ပုံမှန်မရှိဘူး ဆိုတော့ ဒါလည်း အပူတစ်ခုဖြစ်လာတာပေါ့။ အရင်ကဆိုရင်တော့ အဲလောက်ထိ မစဉ်းစားရဘူးလေ ” ဟု အထက်ပါ အိမ်ရှင်မ အမျိုးသမီးတစ်ဦးက ပြောသည်။
မိုးနဲမြို့တွင် ယခင်က နွေရာသီတွင် ရေကန်ခန်သည့် ကာလမျိုးမရှိခဲ့ကြောင်း၊ ပြီးခဲ့သည့် ၂ နှစ်အတွင်း ရေခမ်းခြောက်မှု ပိုများလာကြောင်း သိရသည်။
မိုးနဲမြို့နယ်အတွင်းရှိ နမ့်ဟူးစက်တော်နားရှိသည့် ကျောက်မီးသွေးကိုလည်း ကုမ္ပဏီများက တူးဖော်ရန်ကြိုးစားခဲ့ဖူးသည်။
Leave a Comments