သျှမ်းပြည်တောင်ပိုင်း၊ ရွာငံမြို့နယ် မင်းပလောင်ရွာ စစ်ရှောင်များသည် ရေရှားပါးမှုနှင့် ကြုံနေရပြီး အရေပြားရောဂါ ဖြစ်ပွားနေကြသည်ဟု စုံစမ်းသိရှိရသည်။
မင်းပလောင်ကျေးရွာတွင် စစ်ရှောင် (၅၀၀)ကျော်ရှိပြီး နွေရာသီရောက်လာပြီဖြစ်၍ သောက်သုံးရေများရှားပါးလာကာ အရေပြားရောဂါကို အသက်(၁၀)နှစ်အောက် ကလေးများ အပါဝင် အသက်ကြီးပိုင်းနှင့် ကိုယ်ဝန်ဆောင်မိခင်များ အဖြစ်များနေကြကြောင်း စစ်ရှောင်ကူညီနေသူများထံမှ သိရသည်။
“အရေပြားရောဂါ ဖြစ်နေတာကအယောက်( ၂၀၀) လောက်ရှိမယ်။ အသက်ကြီးလည်း ပါတယ်။ အရင်ဆေးတွေက ခုရောဂါနဲ့ ကိုက်ညီမှုမရှိတော့ ဆေးနဲ့ အနာကိုက်ညီမှု ရှိမဲ့ ဆေးတွေ လိုအပ်နေတယ်။ခုက ဆေးတွေ မလုံလောက်ဘူး။” ဟု စစ်ရှောင်ကူညီနေသူ အမျိုးသားတစ်ဦးက ပြောသည်။
ထိုကဲ့သို့ အရေပြားရောဂါဖြစ်ရခြင်းမှာ ရေမသန့်သောကြောင့်ဟု ယူဆရပြီး ထိုရောဂါကြောင့် ကလေးငယ် တစ်ဦးသေဆုံးခဲ့ဖူးသည်ဟု ၎င်းက ထပ်လောင်းပြောသည်။
မင်းပလောင် စစ်ရှောင်များအခြေအနေကို ကြည့်ရှု့စောင့်ကြည့်ပေးနေသည့် ဓနုပြည်နယ်အမျိုးသား ကာကွယ်ရေးတပ်တော်(DSNDA) မှလည်း ပြည်သူများအနေဖြင့် စစ်ရှောင်များကို ကူညီပေးစေလိုကြောင်း ပြောသည်။
“မင်းပလောင်ကို ကိုယ်ချင်းစာတရားလေတွေ ရှေ့ထားပြီး ကူညီပေးကြဖို့ ပြောချင်ပါတယ်။ရေထဲသုံးလို့ရမဲ့ ပိုးသတ်ဆေးတွေ လိုအပ်ပါတယ်။ စစ်ရှောင်တစ်ချို့က သူတို့အမျိုးတွေ ရှိတဲ့ရွာကို သွားနေကြတယ်။ တချို့ကြတော့လည်း ဒီတောထဲပဲ နေကြတယ်။ စားနပ်ရိက္ခာတွေလည်း လိုအပ်ပါတယ်။” ဟု DSNDA မှ ပြောရေးဆိုခွင့် ရှိသူတစ်ဦးကသျှမ်းသံတော်ဆင့်ကို ပြောသည်။
ရွာငံမြို့နယ် မင်းပလောင်ကျေးရွာသည် ရွာငံမြို့နှင့် မိုင် ၄၀ကျော် အကွာတွင်တည်ရှိပြီး လက်ရှိတွင်ဖုန်းလိုင်း၊ အင်တာနက်လိုက်များဖြတ်တောက်ခံထားသဖြင့် ရွာမှ နာရီဝက်ကျော် လမ်းလျှောက်ပြီး ဖုန်းလိုင်းရသည့် တောင်ပေါ်တွင် ဖုန်းသွားရောက်ပြောဆိုနေရကြောင်း၊ မင်းပလောင်ကျေးရွာသည် လမ်းပန်းဆက်သွယ်ရေး ခက်ခဲ့သည့် နေရာတစ်ခုဖြစ်သည်။
မင်းပလောင်ကျေးရွာကို ပြီးခဲ့သည့် ၂၀၂၄ ခုနှစ် ဒီဇင်ဘာလ (၂၂)ရက်တွင် စစ်ကောင်စီမှ စစ်ကြောင်း ထိုးဝင်ရောက်ပြီး ရွာလုံးကျွတ်နေအိမ်များကို မီးရှို့ဖျက်ဆီးခဲ့သည်။
Leave a Comments