သျှမ်းပြည် လင်းခေးခရိုင် မိုးနဲမြို့ရှိ ရှေးဟောင်းအမွေအနှစ် စေတီပြန်လည်ပြုပြင် မွမ်းမံရန် အကူအညီများ လိုအပ်နေသည့်အတွက် စေတနာရှင်များကို ဖိတ်ခေါ်နေကြောင်း သတင်းသိရသည်။

ပြီးခဲ့သည့် ဒီဇင်ဘာလမှ စတင်ကာ ရှေးဟောင်းယဥ်ကျေးမှု အမွေအနှစ်များကို မြတ်နိုးသည့် ဒေသခံ များ စုပေါင်းကာ မိုးနဲမြို့ရှိ ဆင်တောင်မှ ဆင်ဖြူစေတီ ရှေးဟောင်းစေတီ ပြန်လည်ပြုပြင်မွမ်းမံရေး လုပ်ငန်းစဥ်များ စတင်ခဲ့ပြီး လက်ရှိတွင် လူအင်အား ငွေကြေးအင်အား မလုံလောက်မှုများကြောင့် ပြုပြင်မွမ်းမံခြင်းလည်း မပြီးသေးကြောင်း သိရသည်။

“ဒီ ဆင်တောင်က ဆင်ဖြူစေတီဟာ ဆိုရင် မိုးနဲမြို့ရဲ့ အသက်လို့တောင် ပြောလို့ရတယ်၊ တတိယ မိုးနဲ စတင် တည်ထောင်ကတည်းက ဒီစေတီလည်း ပါလာတာပဲ၊ အခုဆို နှစ်ပေါင်း ၇၀၀ ကျော်ရှိနေပြီပေါ့၊ အခု စေတီရဲ့ အခြေအနေက ခုထားတဲ့ တောင်က တဖြေးဖြေး မြေပြိုကျလာလို့ အပေါ်က စေတီလည်း ယိုင်လာတယ်၊ ဒါကြောင့် ဒီတောင် မြေပြိုတာကို ထိန်းဖို့အတွက်နဲ့ စေတီကို ပြုပြင်ဖို့အတွက် အကူအညီတွေ လိုအပ်ပါတယ်” ဟု မိုးနဲမြို့မှ ရှေးဟောင်းအမွေအနှစ် ချစ်မြတ်နိုးသူ စိုင်းမောင်ကြီးက သျှမ်းသံတော်ဆင့်ကို ပြောသည်။

မိုးနဲမြို့ ဆင်တောင်မှ ဆင်ဖြူစေတီသည် သမိုင်းဝင် ရှေးဟောင်းယဥ်ကျေးမှု အမွေအနှစ်ဖြစ်နေပြီး လက်ရှိတွင် ရှေးဟောင်း ပစ္စည်းပြန်လည်ပြုပြင်မွမ်းမံရေးအတွက် ကျွမ်းကျင်သည့် ပညာရှင် အင်ဂျင်နီယာများက ပြန်လည် ပြုပြင်မွမ်းမံခြင်းအတွက် ခန့်မှန်းခြေ ကျပ်သိန်းနှစ်ထောင် (၂,၀၀၀) နီးပါး ကျသင့်မည်ဟု ပြောဆိုထားကြောင်း လည်း သိရသည်။

အဆိုပါ ဆင်တောင် နှင့် ဆင်ဖြူစေတီသည် AD 1364 ၊ မိုးနဲ တတိယ အဆက်တည်ထောင်ချိန် သတိုးမင်းဖျားမှ အင်းဝပြည်ထောင်ကို တည်ထောင်ချိန်တွင် စတင် တည်ထားကိုးကွယ်ခဲ့သည့်အတွက် နှစ်ပေါင်း ၇၀၀ ကျော် ရှိသည့် သမိုင်းဝင် ရှေးဟောင်း အမွေအနှစ်ဖြစ်ကြောင်းလည်း ရှေးဟောင်းအမွေအနှစ်ချစ်ခင် မြတ်နိုး လေ့လာသူ စိုင်းမောင်ကြီးက ဆက်ပြောဆိုထားသည်။

“လက်ရှိ ဒီသမိုင်းဝင် ရှေးဟောင်းအမွေအနှစ် စေတီက ပြိုကျခါနီး ၊ စောင်းနေပြီ ဖြစ်လို့ ပြန်လည်ပြုပြင်ဖို့ အတွက် လုပ်ဆောင်ရတာ ဖြစ်ပါတယ်၊ တကယ်လို့ မြေငလျင် တစ်ခုဖြတ်သွားရင်လည်း ပြိုကျသွားမယ့် အခြေအနေထိ တောင်ခြေက စောင်းနေပြီ၊ ကျနော်တို့ သျှမ်းရိုးရာ သမိုင်းဝင် အမွေအနှစ်ကို ထိန်းသိမ်းစောင့် ရှောက်တဲ့ အနေနဲ့ ဒီ စေတီ ပြုပြင်မွမ်းမံရေးကို ပါဝင်ကူညီပေးကြပါလို့ ပြောချင်ပါတယ်” ဟု စိုင်းမောင်ကြီး က ပြောသည်။

လက်ရှိ အချိန်တွင်လည်း မိုးနဲမြို့မှ ဒေသခံပြည်သူ လူကြီး လူငယ် အရွယ်ပေါင်းစုံတို့မှ စေတီ ပြုပြင်ရေးတွင် ပါဝင်ကူညီလုပ်ဆောင်နေကြကြောင်းလည်း သိရသည်။

အဆိုပါ စေတီပြုပြင်မွမ်းမံရေး လုပ်ငန်းစဥ်သည် အရှည်ပေ တစ်ထောင် နှင့် နေ့စဥ် ကူညီလုပ်ဆောင် ပေးနေသည့် ဒေသခံ ၁၀၀ ထက်မနည်း ရှိနေကြောင်း သိရသည်။

ရှေးဟောင်းစေတီ အမွေအနှစ် ပြုပြင်မွမ်းမံရေးအတွက် ပါဝင်ကူညီပေးလိုသည့် စေတနာရှင်များအနေဖြင့် ရိက္ခာဖြစ်စေ၊ ငွေကြေးဖြစ်စေ၊ လူအင်အား ဖြစ်စေ၊ ဉာဏ်အားဖြစ်စေ ပါဝင်ကူညီ ပေးနိုင်သည့်အကြောင်းလည်း ပြောဆိုထားသည်။